Read Siyin Chin Solomon ii La 7 Bible Online

Solomon ii La 7 - Siyin Chin bible

Solomon ii La 7

¹Nang sia a tuanngen ngaknu khat na hi hi! Na peangdap sungah na peangte hoi lawlawm hi. Na pheizangte phatzia sia limsuai thiamte ii limsuai taw kibang hilhel hi.

²A kamh ngeingawl sapittui namtui kuang khat tua munah om hi. Mangtaang vawng khat tua munah om a, unok paakte in kiim uum hi.

³Na noaite sia a taa khawm vahel apeang sangai, a omkhawm vahel saza nii taw kibang hi.

⁴Na ngawng sia saiha tausaang khat taw kibang hi. Na mitte sia Heshbon khuapi kongpi hui ah a om tuicingte bang ahi hi. Na naak sia, Damascus khua a cing Lebanon tausaang bangin ithuai hi.

⁵Na lutang sia Carmel Mual bangin saangto kiukiau hi. Na sam kipheakte sia naipuan cii phabelte bangin tee vasip a; ama ii phatna in kumpipa ii mit le thin suu hi.

⁶Na mealpha mama a, hoi lawlawm nii hi; Nong itna in ka lung hong kimsak siat hi.

⁷Palm thingkung khat bangin na ngaibaang a, na noaite sia date nga bom kaaite bang ahi hi.

⁸Palm kung khat tungah kaato in a nga ka lo tu hi. Kei atu in na noaite sia sapit bom bang hi a, na ngim sia apple min bang namtui in,

⁹Na muk sia sapittui phabel taw kibang hi. Tua ahile sapittui sia ka ngaino kungah luang tahen a, a muk le a ha khuum tahen.

¹⁰Ka ngaino neisa ka hi a, ama in dik hong sa hi.

¹¹Kong it ngaino awng, hong pai ta'n a, ngam sungah pai in khuanote ah zan ngiak tawng.

¹²Zingtuung in ih tho tu a sapitkungte, a khang ziam, paakte a palh ziam, talee kungte a paak ziam ih en tu hi. Tua munah kong itna kong pia tu hi.

¹³Mandrakes dei aikung ngim namtui na za tu a, tuaciang thingnga lim theampo sia ih kongbiang hui ah om tu hi. Kong it ngaino awng, thingnga a lui le a thak nang atu in kong khealsiasak hi.