Read Siyin Chin Isaiah 1 Bible Online

Isaiah 1 - Siyin Chin bible

Isaiah 1

¹Hi laibu sungah, Amoz ii tapa Isaiah tungah Judah kumpite ahi Uzziah, Jotham, Ahaz le Hezekiah te hun lai in Judah le Jerusalem huvau Pathian pualaak thute kihel hi.

²TOPA in, “Leitung le vantung awng, kong ci bang ngai vun! Ka vaak ka taa sa ka tate in kei hong langpan uh hi.

³Khuite in a topa he uh a, laate in a topa ii an piakna mun he hi. Ahihang ka mihing Israel te in tua za in he ngawl hi. Amate in tel vet ngawl uh hi,” ci hi.

⁴No a khial a maw minam, siatna vawtin a seksol mihingte a lal tu hi zo nu hi! Na mawnate in note hong kaisuk hi! Israel te ii a thiangtho Pathian, TOPA nialin na nungngat zo uh hi.

⁵Banghangin hong langpan lalai nu ziam? Daan thuak thua nuam lai nu ziam? Israel te awng, na lu tung theampo liamma dim zo a, na thin uh ngim mama hi.

⁶Na lutang pan na peang dong, na pumpi tung a dam mun om ngawl hi. Liamna chinumte, meimate le liamma balhte taw kidim nu hi. Na liammate kisil ngawlin, kituam ngawl hi. Zatui zaha kinoai ngawl hi.

⁷Na ngam uh lalcip zo a, na khuapite kihaltum zo hi. Na mu tangin ngamdangmite in na ngam uh hong laaksak a, na theampo susia uh hi.

⁸Jerusalem khuapi bek taanglai a, tua zongh ki uumci a — sapithuan sungah huan cingpa ii buk ahibuale, tangmai huan ah thaampheang bangin, a hung tu le a cing tu nei ngawl hi.

⁹Vaanglianbelpa, TOPA in mi pawlkhat hong nungtasak lai buathong le, Sodom le Gomorrah bang keakma in Jerusalem kilalsak siat zo tu hi.

¹⁰Jerusalem awng, no hong ukte le na mihingte sia Sodom le Gomorrah a te bang keakma na hi uh hi. TOPA in no tungah hong cina ngai vun. Ih Pathian ii no hong hilna nadon vun.

¹¹Ama in, “Kei tungah nong piak bul biakpiaknate theampo dei tu in hong um nu ziam? Nganhing a limci, a thaute le meihal biakpiakna a nong nei tuute zaa sangin a kicing vaal zaw ka nei hi. Khuitalte, tuute le kealte ii chi cimtak zo khi hi.

¹²Kei bia tu in nong pai uh ciang, hite theampo keng tu in akua in hong sawl ziam? Ka Biakinnpi sung tuanhcil kawkoai tu in akua in hong sawl ziam?

¹³Nong paipui uh biakpiaknate kimanna nei ngawl hi. Na hal uh paaknamtui ngim ka kii hi. Thadet Poaite, Sabbath nite le biakna kikhopnate ka thuak zo bua hi; tuate a vekpi in na mawnate uh in ninsak siat hi.

¹⁴Na Thadet Poaite le na ni thiangthote ka ngaimaw hi; tuate in vanhngit khat hi a, ka puakna in ka cimtak hi.

¹⁵“Thungen in na khutte na lapto ciang note kong en buatu hi. Bang zata thu na ngen ta uh zongin kong ngai buatu hi, banghang ziam cile na khutte chi taw kituam hi.

¹⁶Noma le noma kithiangsak vun. Ka mu tangin a sia na vawt uh theampo vawt nawn heak vun. Hi hi, a sia ngamtatnate kheal vun a,

¹⁷tuaciang a maan sep tu kisin vun. Thukhaikim thu omsak vun — a kizawthawk vawtte hu vun, tangate ii nga tuakte pia vun a, meingongte panpui vun” ci hi.

¹⁸TOPA in, “Tu in, thukhensat tawng. Note in mawna chisan na baang uh a, ahihang vuuk bang a thiang tu in kong sil tu hi. Note tungah a sannum baang kale zong, tuu mul bangin na kaang tu uh hi.

¹⁹Keima thu bek nong ni uh le lei pan a piang a pha nate na ne tu uh hi.

²⁰Ahihang kei nong langpan uh le note thi tu nu hi. Keima, TOPA in ka son zo hi,” ci hi.

²¹Khatvei lai in a thumaan khuapi sia pumpi zuak numei khat bangin ngamta hi! Khatvei lai tua khuapi sia mihing thutangte taw kidim a, ahizong tu in mithatte bekma taang lai hi.

²²Jerusalem awng, khatvei lai in ngunntang bang na hi a, ahizong tuciangin na mannung bua hi; sapittui pha taw na kibang ngei a, ahizong tuciangin tuidam bek na hi hi.

²³Na lampuite sia ngual leedote le ngutate ii lawmte veu hi a; amate in letsong le sumngukte saang tawntung uh hi. Amate in tangate, zumkong maangkong ah panpui ngeingawl a, meingongte ii a thusun ngai ngeingawl uh hi.

²⁴Tua ahiciang tu in, Vaanglianbelpa TOPA, Israel te ii a vaanglian Pathian ii a ci bang ngai vun: “Ka ngalte ahi note tungah phu kong la tu a, note in kei ngim nong pia nawn buatu uh hi.

²⁵Note tungah thu kong vawt tu hi. Thik sia mei taw a kithiansua bangin note kong thiansua tu a, na thiantho ngawlna theampo kong hepsak tu hi.

²⁶Taanghlai in na nei uhte bangma in no hong uk tute le ngaisutna hong pia theite kong pia tu hi. Tua zawkciang Jerusalem sia a thutang, thumaan khuapi kici tu hi.”

²⁷TOPA thutang ahikom, Jerusalem le tualai ah a om a kisiik kik theampo, ama in ngum tu hi.

²⁸Ahihang mawna a vawtte le ama a langpante theampo, ama in sucip tu a; ama a taisan peuma thatlum tu hi.

²⁹Thingkungte na biak ngei hang le huan thiangthote na vawt ngei uh hu in na hee tu uh hi.

³⁰Note in a thi dek limkung khat le, kuama tui buak ngawl husuan khat taw kibangin na vulcip tu uh hi.

³¹Mei eak leang khat hu a, taangvawng a kak bangma in, mihing thahatte sia a sia a vawtna uh taw ma amate kilalcipsak tu a, amate lalna sia kuama in phel zo ngawl tu hi.