Read Siyin Chin Isaiah 11 Bible Online

Isaiah 11 - Siyin Chin bible

Isaiah 11

¹David kumpi khang kizopna sia a kiphuktan sa thingkung khat taw kibang hi; ahihang thingbul khat pan a baak meang thak a po bangma in, David suan le paalte sung panin kumpi thak khat khangto tu hi.

²A mite a uk natu in TOPA ii thaa in ama sia ciimna pilna le heakna pia tu hi. Ama in TOPA deina he in thasiana nei tu a,

³TOPA thunitna sungah nuamsa tu hi. Ama in a puasang muna le thu ngalzaakna bangin thukhen ngawl tu hi;

⁴ama in mizawngte a pha in thukhen a, a cimaw mite ii a nga tuak te panpui tu hi. Ama thupiak bangin mite daan kipia in, mi siate thi tu uh hi.

⁵Ama in a mite thukhaikim le thutak taw uk tu hi.

⁶Ngiate le tuute kilemin teang khawmin, pawlbeamte sia kealnote taw lumkhawm tek tu hi. khuinote le tawpi note an nekhawm tu uh a, patangnote in amate cing tu uh hi.

⁷Khuipuite le vompuite an nekhawm tu uh a, a note kilem in lumkhawm tek tu uh hi. Khuite in taangphaw a neak bangma in tawpite zongh in taangphaw ne tu uh hi.

⁸Nauno khat nguu a nei ngul khat kungah kimai in a om hial zongh in bangma kilaw ngawl tu uh hi.

⁹Pathian ii mual thiangtho Zion tungah liamna baina, a sia a kha bangma om ngawl tu hi. Tuipite sia tui taw a kidim bangma in leitung sia TOPA thu heakna taw kidim tu hi.

¹⁰David kumpi suan pan kumpi thak khat sia minam tam mama te atu in lim khat ahi natu ni khat hong theng tu hi. Amate sia a kumpi khuapi sungah kikhawm in ama zatakna pia tu uh hi.

¹¹Tua ni a thet ciang, TOPA in ama ii vaangletna khatvei zangh kik tu a, ama ii mite sung pan Assyria le Egypt ngamsung, Pathros, Ethiopia, Elam, Babylon, Hamath ngamsung teng le tuipi tuikulhte tung, le tuipi dung ngamte ah a kinusia mite, a inn uh ah puak kik tu hi.

¹²TOPA in a kithethaang Israel le Judah mite kaikhawm kikin, leitung kiing li panin a ciapui kik natu thute sia minamte a lak natu in lim lakna laandial khat phut tu hi.

¹³Israel kumpi ngam in Judah ngam eang nawn ngawlin, Judah te sia Israel te ngal hi ngawl tu hi.

¹⁴Amate in nitumna sangah a teang Philistine mite sim khawm tu a, nisuana sangah a teang mite do khawmin suttol tu uh hi. Amate in Edom le Moab mite zothal tu a, Ammon mite in amate thu ni tu uh hi.

¹⁵TOPA in Suez Tuidok kangsak tu a, tuaciang Euphrates ngun tui a kan natu in vuisa vasak hi, mi theampo ii a kaantan zawk tu in luino sali bek khe lai tu hi.

¹⁶A taanghpupite in Egypt ngam a nusiat lai in amate atu lampi lian khat a om bangma in, tua munah a nungta lai Israel a mite atu in Assyria ngam pan a suatak natu lampi lian khat om tu hi.