Read Siyin Chin Isaiah 13 Bible Online

Isaiah 13 - Siyin Chin bible

Isaiah 13

¹Hisia sia Babylon taw kisai, Amoz ii tapa Isaiah ii Pathian tung pan a nga thupuak khat ahi hi.

²Mual kolh khat tungah ngal simna laandial khaito vun! A kiphasak khuapi kongpite a sim natu limlakna in na ngalkapte oksan in a, na khut laamto in.

³TOPA in a thiangtho ngal khat sim tu le ama a thin a uuksakte daan pia tu in, a kiphasak le a muanhuai a ngalkapte sam zo hi.

⁴Mualtung ngamlumna — mihonpite aw, a kikhawm tua minamte le kumpi ngamte ii ngamlumna awte ngai vun. Ngalkaphonpite ii TOPA in a ngalkapte ngalsim tu in kithoaisak hi.

⁵Amate sia leimong ah a om ngam khualate pan hong pai uh hi. TOPA sia a thin uukna taw ngam bup lalthamsak tu in hong pai hi.

⁶Na sa in kap keak vun! Vaanglianbelpa ii sukcip tu ni, TOPA ni, hong nai hi.

⁷Mihing theampo ii khutte zaw vanek tu a, a thinhanna uh kiam tu hi.

⁸Amate a vekpi in launa le nasak mamana thuak tu uh a, numei nausuak tun bangin na sa tu hi. Amate khat le khat launa taw ki en tu a, maizum in a mai uh san tu hi.

⁹TOPA ni — a kiitakhuai, a thin uuk, a thinso vilvel, ni ngilo ni hong theng tu hi. Leitung sia dui kisuaksakin, mawnei theampo kilalcipsak siat tu hi.

¹⁰Aksi theampo le aksi honpite taang nawn ngawlin, ni a sua ciang mial tu a, tha zongh taang ngawl tu hi.

¹¹TOPA in, “Leitung ah ngimna siatna ka thengsak tu a, mi seksolte theampo a mawnate hu in daan ka pia tu hi. A kiphasak theampo ka niamsak tu a, a kisathei theampo le a ngilote theampo daan ka pia tu hi.

¹²A nungta sunte khamh sangin ka tawmsak zaw tu hi.

¹³Vaanglianbelpa TOPA keima in, ka thin uukna ka lak ni in, vantungte ka liingsak tu a, leitung sia ama omna pan kithingkeak tu hi.

¹⁴“Babylon ah a teang ngamdangmite sia savaite kung pan a suakta sangai bang le a cing om ngawl tuute bangin amate ngam tek ah tai in kithethaang tu uh hi.

¹⁵Mat a thuak pawpo kihollum tu hi.

¹⁶A nausente kivellupsak tu a, a innte kiphuul in, a zite a kibuansak tu sia cimaw in en thong tu uh hi,” ci hi.

¹⁷TOPA in, “Babylon sim tu in Medeste ka hol tu hi. Amate in ngunn sia bangma thusim ngawlin, khamh zongh awlmawk ngawl uh hi.

¹⁸Amate in a thal le a thaltangte taw tangvalte thatlum tu uh hi. Amate in nausente hesuak ngawlin, patangte khuangai huai sa ngawl tu uh hi.

¹⁹Babylon sia kumpi ngam theampo sung pan a et hoibel hi a; tuasia in a mite kiphatsakna ahi hi. Ahihang TOPA ahi, keima in, Sodom le Gomorrah ka vawt bangin Babylon ka lawnthal tu hi!

²⁰Tua munah kuama teang kik ngei nawn ngawl tu hi. A vak kawkoai Arab mite, kuama in tua munah puanbuk phut ngei nawn ngawl tu a, tuucingpa in tua munah a tuu honte tha ngeingawl tu hi.

²¹Tua mun sia sennealngam ngamsate teenna le simbute bu tomna mun hi tu hi. Tua munah kalaoh vacimte teangin, sathakte a sia a lalte sungah kinuntaw tu uh hi.

²²Tausaangte le kumpi innte sungah ngam ui le ngiate auna aw hawl tu hi. Babylon khuapi a siat tu hun theng zo hi! A nite cing dektak zo hi,” ci hi.