Read Siyin Chin Isaiah 17 Bible Online

Isaiah 17 - Siyin Chin bible

Isaiah 17

¹TOPA in, “Damascus sia khuapi khat hi nawn ngawl tu hi; ninthuk kholna khat bek hi tu hi.

²Syria khuapite kinusia top tu hi. Tua mun sia tuu le khui tatna mun hi tu a, kuama in tuate bengkeak ngawl tu hi.

³Israel sia a dal tu om ngawl tu a, Damascus te sia a suatakna taan tu hi. Syria mi a nungta laite sia Israel mite bangma in maimawl tu uh hi. Keima, Vaanglianbelpa TOPA in ka son zo hi,” ci hi.

⁴TOPA in, “Israel ii letna a bo tu ni khat hong theng tu a, a hauna sia zawnna taw kilaih tu hi.

⁵Israel sia ankung a kisaattan, an kila sa lo khat, Rephaim kuam sung lo kolh khat taw kibang tu hi.

⁶Israel mi tawm bekma nungta lai tu a, a kungdawn pek ah a nga pum nii pum thum simngawl, ahibuale a nuaisang a baakte tungah a kikhe lai tawmno teng simngawl, a nga dang teng theampo a kilo siat sa olive kung khat taw kibang tu hi. Keima, TOPA Israel te ii Pathian in, ka son zo hi,” ci hi.

⁷Tua ni a thet ciang, mihingte in amate a Bitphuapa ahi, Israel te ii a thiangtho Pathian kungah hu ngenin zuan tu uh hi.

⁸Amate in a khut uh taw a vawttawm biaknataute suang nawn ngawl tu a, ahibuale a khut vateak taw a vawt sa — Asherah numeipathian limte le ngimnamtui halna taute muang nawn ngawl tu hi.

⁹Tua ni a thet ciang pha tak a kidal khuapite sia Israel te kung pan a taikeak Hiv te le Amor te ii nusiat khuapite bangin lalcipin taisan tu hi.

¹⁰Israel awng, nang hong suatak a, a thahat suangpi khat bang a hong dal Pathian sia na mangil zo hi. Tuasia taangin, ngamdang pathian khat biak natu in huan thiangthote na vawt hi.

¹¹A kungte na suan ni zing mama in meangin, a paak hial zongin an laak tu na nei peang buatu hi. Ngimna le a dam thei ngawl natna bek om tu hi.

¹²Ngam thahatte ii ngam sungah tuipi nging bang, tuihual puite kisuk bangin buaina om lialua hi.

¹³Minamte sia tuihualte bangin maisang manaw in pai uh hi, ahihang Pathian in amate teih in pau ahikom nungkin kik a, suumpei sungah taangphawte bang le mualpangh ah leivui bangin kinotkeak hi.

¹⁴Nitak sangin amate kiitakhuai mama a, ahihang zingsang in bo hi. Tuasia in ih ngam ih lei hong suttolte theampo ii thuak tu ahi hi.