Read Siyin Chin Isaiah 18 Bible Online

Isaiah 18 - Siyin Chin bible

Isaiah 18

¹Ethiopia ngunte ngalkhat ah ngam khat om a, tualai ah thaphil nging kiza hi.

²Tua ngam panin, tongciinte sia pumpa taw a kivawt ngunkuang taw Nile ngun zui in paisuk uh hi. Sawl tangzang kamtaite awng, na inn uh ah cia kik vun! Nguntuite ii a khentanna ngam ah a om a thahat, a vaanglian minam, a tun saangin a ciineal, leitung theampo ii kiitak na mite teng tungah thu khat puak kik vun.

³Ngai vun, leitung ah a teang mite theampo awng! Mualdawn ah a kikhai tu limlakna laandial khat zong vun! Lemle a kitum tu aw ngai vun!

⁴TOPA in kei tungah, “Keima in anlaak hun zan khualum lai daaituite a taak bang vakhial le, sun lai nitaang kiukiau bangin vantung pan kong ensuk tu hi.

⁵Sapit ngate a kikaikhop ma, a paakte pul siat in a ngate a min ciang, sapitkung pan a baakte nam taw ol takin a kiheu bangin, ngalte in Ethiopia te susia tu hi.

⁶A ngalkap te ii mithi luangte sia vacimte le ngamsate atu in kinusia thal tu hi. Khaal sungin vacimte le, phalbi sungin ngamsate in tuate taw kivaak tu uh hi,” hong ci hi.

⁷Ngunte ii khentan hi ngam, a thahat a vaanglian hi minam, a tun saangin a ciineal, leitung theampo ii a kiitak hi mihingte tung panin biakpiaknate Vaanglianbelpa TOPA ii a saan thei tu hun khat hong theng tu hi. Vaanglianbelpa TOPA a kibiakna mun, Zion Mual tungah amate hong pai tu uh hi.