Read Siyin Chin Isaiah 2 Bible Online

Isaiah 2 - Siyin Chin bible

Isaiah 2

¹Hisia sia Judah le Jerusalem taw kisai, Amoz ii tapa Isaiah tungah Pathian thu piak ahi hi:

²Maisang hunin Biakinnpi dinna mun ahi, hi mual in mual theampo sung pan a saangbel hi tu a, mualno theampo tungah dokto tu hi. Tua munah minam tam mama kikaikhawmin hong pai ngeingui tu a,

³tuaciang a mihingte in, “TOPA ii mual, Israel te ii Pathian Biakinnpi ah kaato tawng. Ama in ih sep tu a dei sia ih sep thei natu in hong hil tu hi; ama tealsa lampite ih tawn tu hi. Banghang ziam cile Jerusalem pan TOPA ii hilcianna hong pai tu a; Zion panin ama in a mihingte tungah thu son tu hi,” a ci tu hi.

⁴Ama in minam liante sungah thu nawngkaite khensat tu hi. Amate in a namsaute lo thawna tumanh le a teite thingbaak heuna namte in seak tu uh hi. Ngam khat le ngam khat kido kik ngei nawn ngawl tu a, ngal sim tu in kithoai kik nawn ngawl tu hi.

⁵Tu in, Jacob suan le paalte awng, TOPA hong piak khuavak sungah kalsuan tek tawng!

⁶Pathian awng, Jacob suan le paal, na mite na nusia zo hi! Ngam le lei sia nisuana sang pan le Philistia pan mitbum nasepnate taw kidim zo hi. Mihingte in ngamdang ngeinate zui hi.

⁷Amate leitang sia ngunn le khamh taw kidim a, amate ii sum le vanh manphate bo hun nei nawn ngawl hi. Amate ngam sia siphu taw kidim a, a siphu ngalleangte sim zawk hi ngawl hi.

⁸Amate ngam sia milimte taw kidim a, amate khut taw a vawt tawm uhte ma amate in bia uh hi.

⁹A vekpi in kiniamsuksak tu a, kimaizumsak tu hi. Amate mawna maisak heak in TOPA awng!

¹⁰TOPA ii thin uukna pan le a vaangletna le a minthannate pan a suatak natu hanciam in, amate sia mualkawm suanghawng sung ahibuale leihawng tawna sungah buu tu uh hi!

¹¹Mihingte kiphatsakna le, mihingte kisaktheina a kilalsak tu ni khat hong theng tu hi. Tuasia ciang TOPA bekma kipok tu hi.

¹²Tua ni ciang Vaanglianbelpa TOPA in a vaanglian theampo le, a kiphasakte, a kiliansakte theampo niamsuksak tu hi.

¹³Ama in Lebanon Cedar kung saangte le Bashan ngamsung oak thingkung te theampo susia tu hi.

¹⁴Ama in mualpite le mualnote tamkimsak in,

¹⁵tausaang theampo le a muanhuai kulh pangte theampo kikimsak tu hi.

¹⁶Ama in a lianbel le a hoibel teambawte ngawngawn tum suksak tu hi.

¹⁷Mihing kiphatsak nate bo tu a, mihing kisakthei nate kilalsak tu hi. Milimte mangthang siat tu a, tua ni in TOPA bekma kipok tu hi.

¹⁹TOPA in leitung lok tu in hong pai ciang, mihingte in TOPA ii thin uukna pan le a vaangletna le a minthannate pan a suatak natu hanciam in, ahibuale leihawng tawna sungah buu tu uh hi.

²⁰Tua ni hong thet ciang, khamh le ngunn taw a vawt sa milimte, amate ma in vawkkeak tu a, tuate sia buite le bakte nusiat tu uh hi.

²¹TOPA in leitung lok tu in hong pai ciang, mihingte in TOPA thin uukna, vaangletna le a minthannate pan, a suatak natu hanciamin leihawngte sung le mualkawm suanghawngte sungah buu tu uh hi.

²²A thithei mihingte muanin nei nawn heak vun. Amate in bang kimanna nei uh ziam?