Read Siyin Chin Isaiah 23 Bible Online

Isaiah 23 - Siyin Chin bible

Isaiah 23

¹Hisia in Tyre taw kisai thupuak ahi hi. Tuipi tung a pai teambaw hawlte awng, khuangai in kap vun! Teambaw tawlngakna na khuapi Tyre sia kilalsak zo hi; a innte le teambaw tawlngakna munte lalcip in om hi. Na teambawte Cyprus pan hong heak kik ciang hi thute na za uh hi.

²Sidon sumvawtte awng, tau in kap vun!

³Egypt ngam ah a piang ante a lei a zuak tu le ngam theampo taw sum vawt kipee tu in tuipi kaantan in mihingte na paisak uh hi.

⁴Sidon khuapi awng, na maimawl hi! Tuipi le tuipi thuk liante in nang hong nialin, “Kei ta khat zongh nei ngei bong. Tapate, tanute ka vaak ka taa ngei bua hi” ci hi.

⁵Tyre khua lalna thu a zaak uh ciang Egypt mite ngawngawn liinglawngin thinkiam tu uh hi.

⁶No Phoenicia mite awng, he in kap vun! Na suatak natu in Spain ngam zot tu hanciam vun!

⁷Hisia in taanghlai pekin a kisaat Tyre khua nuam hi thei na tu ziam? Tuipi kaantan in ngamthakte saatin a teang tu mite a puak sia hi khuapi ahi ziam?

⁸Kumpi khuapi ahi, leitung ah ngual ii zatak, sumvawt thiamte ii khuapi ahi, Tyre khua ah hi bang theampo a pian natu in akua in ngeal ziam?

⁹Vaanglianbelpa TOPA in ngeal hi. Amate ii nasepna tungah a kiphatsak nate a bo natu le a zatak mite maizum natu in TOPA in ngeal hi.

¹⁰Spain ngam ah ngamthak saatin a teang no mihingte awng, pai in lotho vun! No hong khoi tu kuama om nawn ngawl hi.

¹¹TOPA in tuipi tungah a khut vaan in kumpi ngamte lawnthal zo hi. Phoenicia sum vawtna phualpite a kilalsak natu in ama in thupia zo hi.

¹²Sidon khuapi awng, na lungdamna bo zo in, na mite in zawthawk thuak uh hi. Amate Cyprus ah a suakta zongin, ngammuang tuan ngawl tu uh hi.

¹³(Tyre khuapi ngamsate tatna a suaksak sia Assyrian te hi ngawlin, Babylon te ahi uh hi. Ngal matna tausaangte a sa, Tyre khua kulhte a pheltham le khuapi susia in a nusiate sia Babylon te ahi hi.)

¹⁴Tuipi tung a pai teambaw naseamte awng, khuangai in kap vun! Na muan uh khuapi sia kilalcipsak zo hi.

¹⁵Tyre khua sia kumpi khang khat, kum sawmsali sung a kimakngil tu hun hong theng tu hi. Tua kumte a cin zawkciang, Tyre sia hi la sungah pumpi kizuak numei bang hi tu hi:

¹⁶Kuama ii phaw ngawl, a khuangai huai pumpi kizuak numei awng, na tengtongh la in khuapi kiimkot in pai in! Pate khatvei na kung hong zot kik thei natu in tengtongh tumin na lasakte sa kik in.

¹⁷Kum sawmsali a cin ciang, TOPA in Tyre khuapi sia ama sep ngei sia ma seam kiksak tu a, leitung kumpi ngam theampo ah ama le ama a pumpi kizuak tu hi.

¹⁸Ama ii sumvawtna pan a thalaw sumte TOPA tungah ki aap tu hi. Ama in tua sumte kholcip thawthong ngawlin, TOPA a bia mite in amate atu a kisamh an le puante leina in zangh tu hi.