Read Siyin Chin Isaiah 24 Bible Online

Isaiah 24 - Siyin Chin bible

Isaiah 24

¹TOPA in leitang lalsakin ngamkhingsak tu hi. Ama in lei maitang heakcipin, a mite thethaang tu hi.

²Mihing theampo — thiampite le mihingte silate le tote, vanh leite le vanh zuakte, sum pukthaakte le sumpute, a hau a zawng, a thuakna uh kibang kim tu hi.

³Leitang tamhtham in kisiacip tu hi. TOPA in son zo a tuabangin kivawt tu hi.

⁴Leitang ko ngaw in tul hi; leitung buppi zawngkhal hi; lei le van a nii in lal hi.

⁵Mihingte in Pathian thukhamte paltan na taw le a tawntungin a kikhomsuan tu a vawt thuciamna a siatsakna taw leitang ninsak uh hi.

⁶Tua ahikom Pathian in leitang haamsiat zo hi. A mite in amate ii vawt bangin thuak uh hi. A nungta mihing tawm vaial hi.

⁷Sapitkungte vul in sapittui tawm hi. Khatvei lai in a lungdamte tu in khuangai a,

⁸a lungdamhuai tengtongh le khuang ngingte thim zo hi.

⁹Sapittui a neak uh hang lungdam in lasa thei nawn ngawlin; kuama in a limna he nawn ngawl hi.

¹⁰Khuapi sungah na theampo kibuai in om a, kihuk natu in amate a inn sung tek ah kikhabil uh hi.

¹¹Sapittui a om nawn ngawl hu in mihingte lampi ah au uh hi. Lungdamna mangtatam siat zo a, leitung pan kibosak zo hi.

¹²Khuapi sia siacip in, a kongpite kisaat tham zo hi.

¹³Hi sia in leitung theampo ah a om minam sim tungah a piang tu thu ahi hi. Tuasia in Olive ngate kithing siatin, sapitkung tung pan sapit sanghte a kilaw siat zawkciang an kila siat sa lo taw kibang tu hi.

¹⁴A suakta sunte lungdam in lasa tu uh hi. Nitumna sangah a omte in TOPA ii letna thu son tu a,

¹⁵nisuana sangah a omte in ama pok tu uh hi. Tuipi dung ah a teang mihingte in Israel te ii Pathian, TOPA pok tu uh hi.

¹⁶Leitung a khuala belnate panin a thumaan Israel minamte a kipokna late ih za tu hi. Ahihang kei atu in lametna bangma om ngawl hi! Kei zawm dikdek ing! Ngual a leeheakte in tawp ngawlin thetheam lai a, ngual a leeheakna nasia vaial hi.

¹⁷Mihing theampo awng, hong ngai tavun! Launate, dumte le thaangsia nate in note hong ngak nginge hi.

¹⁸A lauhuai patauna pan suatak tu a hanciam pawpo dum sungah taak tu a, dum sung pan a suakta pawpo thaang sungah kiman tu hi. Vantung pan a biing a bealin a sun bangin nguazu tu a, lei tawdapte liing tu hi.

¹⁹Leitang kektham, tamhtham in, kikhen keak tu hi.

²⁰Leitang mama sia zukham khat bangin hoi vatut tu a, vuipi sungah vui ii seam buk bangin huang tu hi. Leitung sia a mawnate in nengcip ngawpin, puk in tho kik ngei nawn ngawl tu hi.

²¹TOPA ii, tungsang vaang neite le leitung ukte daan a piak tu hun khat hong theng tu hi.

²²Dum sungah thongtaakte bangin Pathian in kumpi honkhat kaikhawm tu hi. Amate daan piak tu hun hong thet mateng TOPA in thong sungah khabil tu hi.

²³Tha mial tu a, ni taang nawn ngawl tu hi, banghang ziam cile, Vaanglianbelpa TOPA sia kumpi hi tu hi. Jerusalem khua Zion Mual panin ama in uk tu a, mipi lampuite in a vaangletna mu tu uh hi.