Read Siyin Chin Isaiah 25 Bible Online

Isaiah 25 - Siyin Chin bible

Isaiah 25

¹TOPA awng, nangma in ka Pathian na hi hi; nang kong patoai tu a, na min ka pok tu hi. Nangma in nalamdangte na vawt siat zo hi; taanghlai pek a na ngealnate thumaan takin na vawt siat zo hi.

²Khuapite na siasak zo a, a kulhte na lalcipsak zo hi. Ih ngalte ii sak kumpi innte bo zo hi.

³A thahat ngammite in nang hong pok tu hi; a ngilo mite ii khuapite sungah nang hong kikiita tu hi.

⁴Mizawngte le a cimawte in nang hong beal zo a, ngim le kham hun sungah ngammuanna nga uh hi. Vuipi vak ciang bukna na pia a, ni sat ciang nilim na pia hi. A ngilo mite in phalbi vuipi bangin le,

⁵kongaw ngam ah nguatui hang bangin sim hi. Ahihang TOPA nangma in ka ngalte na thimsak zo hi; mihing ngilote ii aunate, sun nisa sia meei ii a votsak bangin, na thimsak hi.

⁶Vaanglianbelpa TOPA in hi sung Zion Mual tungah leitung minamte theampo atu in anneakpoai khat — a limbel an le a phabel sapittui taw na vawtsak tu hi.

⁷Hi lai ah minam theampo ii heena meeikaaite ama in thakhat thu in hepsak tu hi.

⁸Vaanglianpipa TOPA in thina a tawntungin mangthangsak tu hi! Ama in mihing theampo ii thitui nawlsak in, a mite ii leitung mun theampo ah a thuak maimawl na sia laaksak tu hi. TOPA ama mama in ci zo hi!

⁹Tuasia a pian ciang, mihing theampo in, “Ama ih Pathian hi! Ama ka muang zo uh a, ama in hong suatak zo hi. Ama in TOPA hi! Ama ka muang zo uh a, ama in kote hong ngum zo ahikom. tu in lungdam thinnuamin ka om uh hi” ci tu uh hi.

¹⁰TOPA in Zion Mual dal tu hi, ahihang nganhing eak sungah taangphawte a kitotcil bangin Moab mite kituanhcil tu hi.

¹¹Amate in tui op tu hanciam bangin a khut vaan tu uh hi, ahihang Pathian in amate niamsuksak tu a, a khutte cimaw in khuumsuk tu hi.

¹²TOPA in Moab te ii a muanhuai luphung saangte susia in leivui suaksak tu hi.