Read Siyin Chin Isaiah 26 Bible Online

Isaiah 26 - Siyin Chin bible

Isaiah 26

¹Judah ngam sungah mihingte in hi la a sak tu ni khat hong theng tu hi; Ih khuapi muanhuai hi! Pathian mama in tua luphungte hung hi!

²Khuapi kongpite hongin a thumaan minam, a maan a seam a mihingte tumsak vun.

³TOPA awng, nang hong muangin, tupna kho a nei mihingte a kicing thinnopna na pia hi.

⁴A tawntung TOPA muang in; ama in a tawntungin eite hong dal tu hi.

⁵Ama in mihing kiphasakte kiniamkhiaksak hi; amate teenna a muanhuai khuapi lalsakin, a kulhte cimhthamsakin leivui suaksak hi.

⁶Zawthawk vawt a thuak mihingte in tu in tua khua zothal a, a peang nuai ah tuanhcil uh hi.

⁷TOPA awng, mihing phate atu in a lampi ngilsakin; a khualhawna lampi na tamkimsak hi.

⁸Na deina bang kong zui uh a, nang sungah lametna kong nei uh hi; Kote deina theampo sia nangma na hi hi.

⁹Zan in ka thin theampo taw nang kong thangai uh hi; leitung le a mihingte tungah thu na khen ciang amate theampo in thukhaikim thu sia he tu uh hi.

¹⁰Mihing seksolte tungah nang dik napi in, amate in a maan a vawt tu he ngeingawl uh hi. Mihing thutangte teenna hi ngam ngawngawn zongh ah amate in khialna vawt veve lai hi; amate in na letna thusim ngawlin nial uh hi.

¹¹Na ngalte in amate daan na piak tu hunlam he ngawl uh hi. TOPA awng, amate maizumsak in a, ngim ngasak in; amate atu in, na koisak sa daan piaknate thuaksak in. Na mite na it mama zia amate lak in.

¹²TOPA awng, kote mavan daupaina nong pia tu hi; kote ii matutna theampo sia nangma ii sepna hang ahi hi.

¹³Kote TOPA Pathian awng, kote sia ngual dangte in hong uk zo a, ahihang nangma bekma in kote TOPA na hi hi.

¹⁴Tu in amate thi zo a, nungta kik ngawl tu uh hi; amate ii thaa te thoto ngawl tu uh hi, banghang ziam cile nangma in amate daan na pia zo a, na lalsak zo hi. Kuama in amate phawk nawn ngawl hi.

¹⁵TOPA awng, nangma in koma ii minamte nong khangtosak a, a ngamngi theampo na keak hi, hi thu in nang hong thupisak hi.

¹⁶TOPA awng, na mihingte daan na pia hi, a thinna sa in nang tungah thu hong ngen uh hi.

¹⁷Numei nausuak tu a tut ciang na sa in a au bangin TOPA awng, kote nong ausak zo hi.

¹⁸Kote in na sa bot sa in om ka hi uh hang bangma a piang bua hi. Kote ngam atu in ngalzawna bangma ka nei bua uh hi; bangma taangtut ka nei bua uh hi.

¹⁹Ka mipui a thisate nungta kik tu uh hi! A pumpi uh nungta kik tu uh hi. Thaan sungah a mute theampo thoto tu a, lungdamin lasa tu uh hi. A tee vasip daaitui in leitung thathak a piak bangin TOPA in taanghlai pek a, a thisate nungtasak tu hi.

²⁰Ka mihingte awng, na inn sung uh ah tum vun a, na inn uh khak vun. Pathian ii thin uukna a thai dong tawmvei sung buu zii vun.

²¹TOPA in vantung a teenna mun panin leitung mihingte mawna hangin daan pia tu in hong pai tu hi. Leitung ah a kithatlum ku mihingte kipualaak tu a, leitang in tua a kithatlumte seal nawn ngawl tu hi.