Read Siyin Chin Isaiah 27 Bible Online

Isaiah 27 - Siyin Chin bible

Isaiah 27

¹Tua ni in tuipi sungah a om nganhing pui sia a that tu le kizialin a kual, a kiitakhuai Leviathan ngul sia daan pia tu in TOPA in a vaang nei, thisakna namsau zangh tu hi.

²Tua ni in a dei huai sapithuan thu TOPA in son tu a,

³“Keima in tua huan cingin tui ka buak tawntung hi. Kuama ii suk siat thei ngawl tu in sun le zanin ka cing hi.

⁴Sapit huan tungah ka thin uuk nawn ngawl hi. Mot tu ling le lingkungte a om le ka haltum tu hi.

⁵Ahihang ka mite ii ngalte in, kei ii huuk tu a dei le, keima taw kilemna hong vawt tahen. Hi hi, amate in kei taw kilemna vawt tahen,” ci tu hi.

⁶Mailam sangah, Jacob ii suan le paal ahi Israel mite, thingkung khat bangin zung tha tu a, hong mom in a paak palh tu hi. Leitung sia amate ii nga taw kidim tu hi.

⁷TOPA in Israel te ii ngalte nasia takin daan a piak za in Israel te daan pia ngawl a, a thi a bo zongh tam ngawl hi.

⁸TOPA in a mihingte ngamdang ah saltaang tu in a puakna taw daan pia hi. TOPA in amate sia nisuana sang pan hong va vui ngilo in seamkeaksak hi.

⁹Ahizong, Israel te ii mawnate sia, lawkite ii biaknatau suangte, leikaang bangin a kingoaicip zawkciang le Asherah numeipathian lim te a bo zawkciang, le ngimnamtui halna biaknataute a om nawn ngawl ciang bekin, kimaisak bek tu hi.

¹⁰A muanhuai khuapi sia lalcip in om hi. Ngamkol khat bangin kinusia hi. Ngan thana le ngan lup thei na mun suak hi.

¹¹Thingbaakte kongaw in taltan a, numeite in thingkang tu in tom uh hi. Banghang ziam cile mihingte in bangma tel ngawl ahikom amate a Bitphuapa Pathian in amate khuangai huai sa ngawl tu a, hesuakna lak ngawl tu hi.

¹²Tua ni in, Euphrates ngun pan kipan Egypt ngamngi dong, taangcilte khat po in a zungtaang a tak le a si a khen bangin, TOPA in a mihingte khat zawkciang khat kaikhawm tu hi.

¹³Tua ni a thet ciang, Assyria le Egypt ngam ah saltaang in a om Israel te theampo tua mun pan sap kikna tu lemle khat kitum tu hi. Amate hong cia a, Jerusalem khua ama ii mual thiangtho tungah TOPA bia tu uh hi.