Read Siyin Chin Isaiah 29 Bible Online

Isaiah 29 - Siyin Chin bible

Isaiah 29

¹Pathian ii biaknatau ahi Jerusalem mama a lal ahi hi! David ii ngiana khuapi sia a lal ahi hi! A an neak poaite le poai khaamnate taw kum khat, kum nii omsak zii po vun,

²tua zawkciang, “Pathian ii biaknatau” a kici khuapi tungah Pathian in siatna thengsak tu hi. Kaana le tauna om tu a, a khuapi buppi sia chi taw a kituam biaknatau khat bang hi tu hi.

³Pathian in tua khuapi sia kiim uum in, sim tu in uumci tu hi.

⁴Jerusalem sia leinuai pan pau nuamin a kisaan thithaa khat bang le leivui sung pan hong suak aw theap khat taw kibang tu hi.

⁵Jerusalem awng, nang hong sim ngamdangmite theampo leivui bangin kimut keak tu a, a kiitakhuai ngalkapte sia taangphaw bangin leangkeak tu hi. Muanmawk ngawl het le thakhat thu in,

⁶Vaanglianbelpa TOPA in vanto le zinliing taw nang hong suatak tu hi. Ama in vuipi nguapi le a kuang vazak mei khiak tu a,

⁷tuasia ciang Pathian ii biaknatau khuapi a sim minamte ii ngalkap hon theampo, a ngalhiam le a ngalvanh a vekpi — na theampo — zanin khua ngaisut bang, mangmat khat bangin mang vadi tu hi.

⁸Jerusalem sim tu in a kikhawmtua minamte theampo sia, andu ngilkial in a pukthi dek mihing khat in a mang in an ne a, a khanlaw ciang a ngilva tuan ngawl, ahibuale tuidu dangtaak mihing khat in a mang in tui ne a, a khanlaw ciang a dangko in a thoto taw kibang tu hi.

⁹Paisuak vun a, mawmaw in om vun! Paisuak vun a, mittaw in om vun! Sapittui ne ngawl bulin kham vun! Zu mal khat zongh ne ngawlin hoi vatut vun!

¹⁰Mutthip natu in TOPA in na mut hong suaksak hi. Kamsaangte sia mihingte ii mittang hi tu a, ahihang Pathian in amate mit humcipsak hi.

¹¹Kamsaan mukholnate theampo ii a khiakna sia note hong lak ngawl tu hi; a kikhakcip laizial khat taw kibang tu hi. Laisim thei khat kungah paipui in, nang hong sim tu in sawl le te a laizial kikhak cip ahikom kei sim thei bong hong ci tu hi.

¹²Laisim thei ngawl khat tungah tua lai pia in hong simsak ta'n ci in sawl le te, ama in kei sim thei bong ci in hong zo kik tu hi.

¹³TOPA in, “Hi mihingte in kong bia tu uh hi hong ci a, ahihang amate kammalte sia khiakna nei ngawlin, a thinsung in thudang ngaisun hi. Amate biakna sia bangma hi ngawlin, a teptee pak uh mihingte zui tu ngeinate bekma hi lel hi.

¹⁴Tua ahiciang keima in amate muanmawk khol ngawlin a kiitakhuai tuasiatna, khat zawkciang khat ka tungsak tu a, lamdang ka sasak tu hi. Mihing ciimte a mawmaw suakin, a pilna theampo sia kimanna nei ngawl tu hi,” ci hi.

¹⁵A ngealnate TOPA tungah a iimcip nuamte, a lal ahi hi! Amate a tup a sawmte vawt ku uh a, kuama in hong mu buan te, hong he buan te ci in ngaisun uh hi.

¹⁶Amate in na theampo lumlet uh hi. Beal seakpa le tungman a koisia thupi zaw ziam? Mihing khat ii a vawt sa na khat in a vawt pa tungah, “Nang in kei nong vawt bua hi,” ahibuale, “Na vawt sia nangma in na he bua hi,” ci thei tu ziam?

¹⁷Kam tepteena sungah, khuangei ngawlin taam thukpui sia lo ngam hong suak tu a, tuaciang lo ngam sia taam suak kik tu hi, ci hi.

¹⁸Tua ni ciang, nangongte in laibu a ngingin a kisim sia za thei tu a, khuazing sungah a om mittawte in, a mit uh hakin khuamu tu uh hi.

¹⁹Zawngkhal in, a kiniamkhiak mihingte in, TOPA ahi, Israel ii a thiangtho Pathian ii a piak lungdamna sia khatvei nga kik tu uh hi.

²⁰Tuasia sia midangte a zawthawk vawtte le Pathian a melsiate ii bona hi tu hi. Mawnei theampo kilalsak tu hi.

²¹Ngual dang a sonsiate, khialna lian neite, daan piak tu a khaktante le thumaan mihingte tungah thu khaikim in thu a khen thei ngawl natu leilot thusonte sia Pathian in lalsak tu hi.

²²Tua ahikom tu in ngimna pan Abraham a suatak, Israel te ii Pathian TOPA in, “Ka mite awng, note hong kimaimawlsak nawn ngawl tu a, maizumna taw na mai uh daang nawn ngawl tu hi.

²³Keima kong piak tu tanote na mu uh ciang, keima sia Israel ii a thiangtho Pathian ka hi hunlam na tel tu uh hi. Zatakna nong pia tu uh a, lamdang sa in launa taw ka mai ah na ding tu uh hi.

²⁴Mihing mawmawte in thu tel thei tu a, a phuphun mihingte in a kihil tu uh sia lungdam tu uh hi,” ci hi.