Read Siyin Chin Isaiah 30 Bible Online

Isaiah 30 - Siyin Chin bible

Isaiah 30

¹TOPA in: “Judah ngamukte a lal ahi hi, banghang ziam cile amate in kei hong langpan uh hi. Amate in kei ngealna ahi ngawlte zui in, kei deina langpanin thuciamnate vawt a, mawna khat zawkciang khat vawt thawthua uh hi.

²Amate in kei ngaisutna hong dongh ngawlin huna ngen tu in Egypt ah pai uh hi. Egypt te ii huuk tu a thangai manin, Egypt kumpipa muang uh hi.

³Ahihang kumpipa in amate hu zo ngawl tu a, Egypt te ii huukna in siatna taw tawp tu hi.

⁴Amate ii tongciinte sia Egypt te ii khuapite ahi, Zoan le Hanes theng zo napi,

⁵Judah mite in huna a muanmawk uh bang a pia zo ngawl, a muanhuai ngawl minam khat sia a muan thaak phawphot uh a kisiik tu hi,” ci in son zo hi.

⁶Hi thu sia thangsang sennealngam sungah a om nganhingte taw kisai Pathian thupuak ahi hi: “Tongciinte sia tawpite teenna, a nguu nei ngulte le a leang thei ngulpui omna, a lauhuai ngam sungah vak kawkoai uh hi. Amate huna mal khat zongh a pia zo ngawl minam khat a piak tu in a manham letsongte, a kalaoh le a laate tungah suanh uh hi.

⁷Egypt te ii a piak huna sia lui thawthong ahi hi. Tua ahikom Egypt sia, ‘Bangma hong law thei ngawl Ngulpui’ ci in min ka phua hi,” ci hi.

⁸Tua mihingte bang taw kibang ziam cisia laibu khat sungah at in ci in Pathian in kei hong sawl hi, tua hile mihingte bangza in tatsia ziam ci in tepteena kho khat om tu hi.

⁹Amate in Pathian langpan tawntung, leilot tawntungin, TOPA hilnate nial tawntung uh hi.

¹⁰Amate in kamsaangte a thim khipkhep natu in sawl uh hi. Amate in, “A maan sia bang ziam ci in ko hong son heak vun. Koma zaak nopte bek hong son tavun. A maan bua zong koma ii om ngei bangin hong omsak tavun.

¹¹Ka lampi uh hong awn tavun a, hong khak heak vun. Na Israel te ii a thiangtho Pathian ii thu za nuam ngawl khu hi,” ci uh hi.

¹²Ahizong Israel te ii a thiangtho Pathian in, “Kei kong sonte thusim ngawlin zawthawk tatna le theamna na suang uh hi.

¹³No, a maw na hi uh hi. No sia a kektham suk pang saang khat taw kibang nu hi; thakhat thu in puk tu nu hi.

¹⁴Zan niknek ahikom meikhuk sung pan meikam lua tham natu ahizong, tuikuang sung pan tui sua tham natu ahizong a bek lian zongh a om ngawl leibeal khat bangin nang hong kitamhthamsak tu hi” ci hi.

¹⁵Vaanglianpipa TOPA Israel te ii a thiangtho Pathian in mihingte tungah, “Hong heak kik tavun a, keima hong muang hiithiat tavun. Tua hile na tha uh hat tu a, ngammuang tu nu hi,” ci hi. Ahihang nong nial uh hi!

¹⁶Tuasia luangin, siphu tai ngang mama tung to in na ngalte khut sung pan suatak tu na sawm uh hi. Maan nu hi — suatak natu ahile noma sep tu ma hi! Na siphute ngang khop hi ci in ngaisun nu hi, ahihang no hong delte ngang zaw lai tu hi!

¹⁷Ngalte ngalkap khat na mu uh ciang no, a tulkhat in na taikeak tu uh a, tuaciang ngalte nga in note theampo hong taikeaksak zo tu hi. Mualdawn ah a kiphut laandial mung om liiliai khat simngawl buang, na ngalkap honte sung panin bangma kinusia ngawl tu hi.

¹⁸Tuabang hi napi note hong hesuak tu in TOPA in hong ngak veve hi. Ama sia note tungah hesuakna lak tu in a kinging sa in om hi, banghang ziam cile ama in a tawntungin a maan seam hi. TOPA tungah muanna a nei te in mi lungdamte ahi hi.

¹⁹No Jerusalem ah a teang mihingte kap nawn ngawl tu nu hi. TOPA sia hesuak thei a, ama tungah huna ngenin na kaa uh ciang ama in hong zo tu hi.

²⁰TOPA in haksatna hunte no hong phulsak zo tu a, ahizong ama mama tua munah note hong hil tu in om tu hi, tua ahiciang note in ama na zon uh kul nawn ngawl tu hi.

²¹Lam ziat, ahibuale lam vei ah na pial tha uh le na nungsang pan ama in, “A lampi in hisia hi. Zui in,” hong cina aw na za tu hi.

²²Ngunn taw kizut in khamh taw a kituam, na milimte na la tu uh a, tuaciang ninteak bangin vawkkeak in, “Ka muna ah om heak vun!” ci in na ausan tu uh hi.

²³Anciite na poai po uh ciang po a, khang a an tam na laak natu in TOPA in nguazusak tu hi, tuaciang na ngante in a tat natu mun zai nei tu uh hi.

²⁴Na lo hong thawsak khuitalte le laate in a phabel le a limbel lopate ne tu uh hi.

²⁵Na ngalte ii kulhte a kilaak ni ciang le a mite a kithalup ni ciang, muallian le mualnote theampo tung panin luitui luang tu hi.

²⁶Tha in nitaan za ma in taang tu a, ni in a taan ngeina sangin a zaa salivei in taang zaw tu hi, ni sali sung nitaanna bup sia ni khat a kingawm taw kibang tu hi. TOPA in a mihingte tungah a thuaksak liammate tuamsakin a damsak ciangin hi thu theampo hong piang tu hi.

²⁷TOPA ii vaangletna le minthanna sia a khuala panin kimu thei hi. Mei le meikhu in TOPA ii thin uukna lak hi. Ama pau a, a kammalte mei taw kibangin kuang hi.

²⁸Tuipawm in na theampo a taikeak bangin a mai ah vui vasak hi. Tua in minamte phialmang in susia ngawpin, amate ii a sia a ngealnate bosak hi.

²⁹Ahizong Pathian ii mihing, note in, poai thiangtho khaam ni zan a, na vawt uh bangin lungdam in la na sa tu uh hi. Israel te a huu TOPA sia Biakinnpi ah a pai uh lai in tamngai aw zui in a paite bangin na lung uh dam tu hi.

³⁰TOPA in ama ii vaangletna aw mihing theampo in zasak tu a, ama ii thin uuk tutna thuak tu hi. Meikuangte, meei puakthamte, ngialtang kiate, a biing a bealin sun bangin nguazuknate om tu hi.

³¹Assyria mite in TOPA ii aw a zaak uh ciang le a daan piakna a nasia mama sia a thuak uh ciang lau tu uh hi.

³²TOPA ii amate ngim a piak kikik ciang, ama mite in khuang le tengtongh aw zui in lungdam tu uh hi. Pathian ama tatak ma in Assyria mite sim tu hi.

³³Nidang pek panin Assyria kumpilianpa kihal natu mei phualpi mun khat kivawt zo hi. Tua mun sia thukin zai a, thing a vum in kiseng hi. TOPA ii husan ahi a kipee tan meikuang in tua mei taw tu hi.