Read Siyin Chin Isaiah 32 Bible Online

Isaiah 32 - Siyin Chin bible

Isaiah 32

¹Khatvei ciangin thutuumna taw a uk kumpi khat le, thukhaikim thu taw a uk ngam lampuite om tu hi.

²Amate khat simin vui vak ciang le suangval vak ciang belhna le bukna bang hi tu hi. Senneal kongaw ngam sungah luitui luang bang le ngam kolhna munah a om suangpi lian khat ii limh bang hi tu hi.

³Tuaciang amate ii mit le bil in mihing cimawte kisapna mu in, za tu uh hi.

⁴Amate thintom nawn ngawlin, heakna telthiangna taw diangin, a ci nopte ahi bang tatak son tu uh hi.

⁵Kuama in mihing mawmaw khat sia zatak huai sa ngawl tu a, mihing tatsia khat sia thumaan kici ngawl tu hi.

⁶Mihing mawmaw khat in mawmawt kam veu pau in, a sia vawt tu vive ngaisun hi. A nasep le a kampau in TOPA selnona vive hi a, ama in ngilkial dangtaakte an le tui pia ngeingawl hi.

⁷Ngaisutna kicing ngawl pa sia ngilo in, a sia vive vawt hi; leilot thu taw mizawngte suksiat sawmin, a nga tu a kilawmte khaktansak tu sawm hi.

⁸Ahihang a zatak huai mipa in thumaan takin ngamta a, a maanna sangah kho din hi.

⁹Thinngimna nei ngawl, a ol no in, a nungta no numeite awng, ka ci bang hong ngai tavun.

¹⁰Tu laitakin lungkim tha tu nu hi, ahihang mai ciang tu hunin sapitngate na law tu uh om ngawl tu a, na thin uh kiam tu hi.

¹¹Thinngimna le nei ngawlin, nuntak ol in na nungta uh hi; ahihang tu in, patau in liing vun! Na puante suutkeak vun a na kawngah puansia lom sawm vun.

¹²Khuangai in na awm uh beang vun, banghang ziam cile leiphana lote le sapithuante kilalsak zo a,

¹³lingnguite le lingkungte ka mite ii leitang tungah po zo hi. Mihingte lungdam takin a teenna innte theampo atu le nuntakna a nuam khuapi atu in kap vun.

¹⁴Kumpi inn ngawngawn kinusia tu a, khuapi taisan in kiloai tu hi. Innte le amate a dal kulhte a tawntung lalcip tu hi. Tua mun ah ngam laate vakin tuute an zong tu uh hi.

¹⁵Ahizong Pathian in ama thaa khatvei ma hong puak kik tu hi. Leisiate leipha suak kik tu a, lo panin an tam mama piang tu hi.

¹⁶Ngamsung mun theampo ah thumaan thutang le thukhaikim thu om tu hi.

¹⁷Mihing theampo in a maan sia seam tek tu ahikom, kilemna le ngam muanna om tawntung tu hi.

¹⁸Pathian ii mihingte in thinngimna te taw kipeal in, a innte sia thinnopna le ngam muanna taw kidim tu hi.

¹⁹(Ahihang duisung ah ngial kia in, khuapi sia kicimhthamsak tu hi.)

²⁰An ciin natu tui kicing piikpeak in, laate le khuite a tat natu mun theampo muanhuai ahiciang mihing theampo bang zata in lungdam tu uh ziam?