Read Siyin Chin Isaiah 36 Bible Online

Isaiah 36 - Siyin Chin bible

Isaiah 36

¹Hezekiah ii Judah kumpi a sep zawk kum sawm le kum li kumin, Assyria kumpilianpa Sennacherib in Judah ngam sungah kulh taw a ki uum khuapi muanhuai theampo simin la hi.

²Tuasia ciang Sennacherib kumpipa in ama ii khutnuai ah Hezekiah kumpipa a tum natu sawl tu in ama ii ulianbel pa sia ngalkap honkhat taw Lachish pan Jerusalem ah paisak hi. Tua ulian pa in puantakte nasepna phual omna lampi, tuili tungnung pan tui laakna luamhui ah omna la hi.

³Ama taw a kimu tu in Judah mite ulian thum; kumpi inn sung sai pa Hilkiah ii tapa Eliakim; kumpi inn sung thuzeakpipa, Shebna; le thu tepteena keam pa, Asaph ii tapa Joah pai uh hi.

⁴Assyria ulian pa in, bangbel in Hezekiah kumpipa sia hi zata in kimuangsak ziam ci sia kumpilianpa in he nuam hi ci in amate son hi.

⁵Ama in, “Ngal sim thiamna le thazaw suanna taangin kammal bek kizangh thei tu in um nu ziam? Assyria te leedo natu in akua in note hong hu tu in muangmaw nu ziam?

⁶Egypt te in hong hu tu hi ci in um nu hi, ahihang tuabangin na muanmawkna sia pumpa kung khat ciangkhut in zak taw kibang tu a — taltan in na khut hong sun tu hi. Egypt kumpipa a suang mihing khat pawpo sia tuabang veu ahi hi,” ci in thudokna nei hi.

⁷Assyria ulianpa in hi bangin dongh thua lai hi, “Tua ahibuale note in TOPA na Pathian ka suang uh hi nong ci tu uh ziam? Hezekiah in biaknatau mun khat bek ah Pathian na bia tu uh hi ci in Judah le Jerusalem mite tungah thu a son lai in, ama ii suksiatte sia TOPA ii munsaang biakinn le biaknataute ahi hi.

⁸Kumpilianpa min tawin kikhap thukimna khat ih nei tu hi. Siphu tung to tu mihing tam na nga zo na uh le siphu tul nii kong pia tu hi.

⁹Note in Assyria ngalkap mang a za nobel khat ngawngawn zongh na dem zo buatu uh hi; tua hi napi Egypt te kung panin leang le siphu ngalkapte hong puak tu na muangmaw lai uh hi.

¹⁰TOPA ii panpuina ngawl taw kei in na ngam uh hong simin lalsak zo tu in hong um nu ziam? TOPA mama in na ngam uh simin lalcipsak tu in kei hong sawl hi,” ci hi.

¹¹Tuasia ciang Eliakim, Shebna, le Joab in ulianpa tungah, “Aramaic kam in hong paupui ta'n. Koma tel khu hi. Hebrew kam taw hong paupui heak in; luphung tungah a om mihingte theampo in hong ngai hi,” ci hi.

¹²Ama in, “Assyria kumpilianpa in note le na kumpipa tung bek ah hi thute theampo son tu in hong sawl sa nu ziam? Hi ngawl hi, noma taw a kibang ma in amate zun le eak ma a ne tu ahi, luphung tungah a to mihingte tung zongh ah ka son hi,” ci in zo kik hi.

¹³Tuaciang ulianpa dingto in Hebrew kam taw au in, “Assyria kumpilianpa ii hong son sia ngai vun.

¹⁴Hezekiah ii na theamsak ngawl natu in ama in note tungah kidop natu in hong son hi. Hezekiah in note hong ngum thei ngawl hi.

¹⁵Tua ahikom TOPA suan le muanin a nei tu in, ama in note zolsak heak vun. TOPA in note hong ngum tu a, Assyria ngalkapte ii na khuapi simin a laak natu pan tawlngasak tu ci in ngaisun tha heak vun.

¹⁶Hezekiah ii thu ngai heak vun! Assyria kumpilianpa in khuapi pan pusuakin ama ii khutnuai ah na tum natu in thu hong pia hi. Note theampo na sapitkung tung uh pan sapitngate, na theikung uh pan theingate hong nesak tu a, na tuikhuk uh pan tui hong dawnsak tu hi —

¹⁷sapittui nei natu in sapitkung om a, anluum vawt natu in an omna, na ngam uh taw a kibang ngam khat ah kumpilianpa ii hong om kik sak mateng tuabangin na om tu uh hi.

¹⁸TOPA in note hong suatak tu ci in ngaisutna taw Hezekiah in note theamsak heak vun. Minam dangte khat pawpo ii pathiante in Assyria kumpilianpa ii khut sung panin amate ngam hun zo na ziam?

¹⁹Tu in Hamath le Arpad ii pathiante koi sungah om ziam? Sepharvaim ii pathiante koi sungah om ziam? Akua in Samaria hun zo ziam?

²⁰Hi ngamte theampo ii pathian khat pawpo in ih kumpilianpa khut sung pan, bang hunin amate ii ngam hun ngei ziam? Tua ahile TOPA in Jerusalem hun thei hi ci in a bang in hong ngaisunsak ziam?” ci hi.

²¹Hezekiah Kumpipa ii sonkhol bangma in amate thim khipkhepin om hi; kam khat zongh huthe ngawl hi.

²²Tuaciang Eliakim, Shebna, le Joah khuangai in a puante balkeak in Assyria ulianpa ii ci teng kumpipa kungah pai in ko uh hi.