Read Siyin Chin Isaiah 37 Bible Online

Isaiah 37 - Siyin Chin bible

Isaiah 37

¹Hezekiah Kumpipa sia amate ii thupuakte a zaak pawpo ciang khuangai in a puan balkeak a, khau-ip puan silhin TOPA Biakinnpi zuan hi.

²Ama in kumpi inn sung ukpa Eliakim, zumsung thuzeakpipa Shebna, le thiampi khanghaamte sia Amoz ii tapa kamsaang Isaiah kungah puak hi. Amate zongh in khau-ip puan silh uh hi.

³Hi thu sia Isaiah tungah a son tu kumpipa ii thupuak hi a: “Tuni sia ngim thuak ni khat ahi hi; daan ih kha a ih maimawl hi. Eite sia numei khat nau suak tu kithoai zo napi, a tha zawm lei hu in a suak zo ngawl taw ih kibang hi.

⁴Assyria kumpilianpa in a ulianbel pa sia a nungta Pathian nunau tu in paisak zo hi. Hi bang nunaunate TOPA na Pathian in za tahen a, nunauna kampaute daan pia tahen. Tua ahiciang a nungta lai ih mite atu in Pathian tungah thungen vun,” ci hi.

⁵Isaiah in Hezekiah kumpipa tung pan thupuak sia a nga ciang,

⁶hi bangin zo kik hi: “TOPA in note hong hun zo ngawl tu hi ci a, Assyria te ii hong son hangin na patau ngawl natu uh in TOPA in note hong son hi.

⁷Tua kumpilianpa sia a ngam ah a cia kik natu in TOPA in kamleang khat zasak tu a, tua zawkciang TOPA in tua munah ama kithatlumsak tu hi,” ci hi.

⁸Assyria kumpilianpa sia Lachish khua pan ding zo a, Libnah khuapi naina ah ngalsimin a omna thu Assyria ulianpa in za hi; tua ahikom ama ii tungah thu dongh tu in tua munah ama pai hi.

⁹Ethiopia kumpipa Tirhakah in Egypt ngalkapte lampui in Assyria te sim tu in hong kuanna thu sia Assyria te in za zo hi. Kumpilianpa in hi thu a zaak ciang, Judah kumpipa Hezekiah tungah lai khat thaak a,

¹⁰“Na muan uh pathian in note sia ka khut sung theng ngawl tu hi ci in note hong son zo hi, ahitazong tua thu in note theamsak heak vun.

¹¹Assyria kumpilianpa in lalsak tu in, a khensat sa ngam khat pawpo a vawtna thu sia na za zo uh hi. Suakta zo tu in ki um nu ziam?

¹²Ka taanghpupite in Gozan, Haran le Rezeph khuapite lalcipsakin, Telassar ah a teang Betheden mite thatlum hi, amate ii pathiante khat zongh in amate hun zo ngawl hi.

¹³Hamath, Arpad, Sepharvaim, Hena le Ivvah khuapite ii kumpite koi sungah om ziam?” ci in at hi.

¹⁴Hezekiah kumpipa in kamtaite tung pan laithak sia saangin sim hi. Tua zawkciang Biakinnpi ah pai in TOPA mai ah tua laithak koi in,

¹⁵a thungetna ah

¹⁶“Cherubim tungah a to, Vaanglianbelpa TOPA Israel ii Pathian awng, nangma bekma Pathian hi a, leitung kumpi ngam theampo na uk hi. Nangma in lei le van na bitphua hi.

¹⁷Tu in Topa awng, hong ngai ta'n a, kote tungah hong piang thute hong en ta'n. A nungta Pathian ahi nang tungah Sennacherib papau in hong nunauna thute theampo ngai in.

¹⁸TOPA awng, Assyria kumpiliante in minam tam mama susia in, a ngam uh siasak a,

¹⁹a pathiante — tuate sia pathian tatak hi ngawl het a, khut taw a vawttawm thing le suang po ii limte bek ahi a pathiante a haltumsak sia ka he siat uh hi.

²⁰Tu in TOPA kote Pathian awng, nangma bek TOPA na hina thu, leitung ngam theampo in a heak natu in, Assyria te khut sung panin kote hong suatak ta'n,” ci hi.

²¹Tuaciang kumpipa ii thungetna, TOPA ii a zona thu teng sia Isaiah in Hezekiah kumpipa kungah thupuaksak hi.

²²TOPA in, “Sennacherib awng, Jerusalem khuapi in nang hong nuisan in hong nomu hi.

²³Na selno a na nunau sia akua hi tu na um ziam? Keima Israel te ii a thiangtho Pathian hong melsia na hi hi.

²⁴Na siphu ngalleang theampo taw Lebanon mualsaangbel sia na zawna thu, kei tungah a kisuangtaak tu in na naseamte nong puak hi. Nangma in a saangbel cedar thingkung le a hoibel cypress thingkungte tua munah phuktan in, ngam thuk belnate dong na thetna sia kisuantaak na in nong nei hi.

²⁵Ngamdang ah tuikhuk to in tui na neak theina le na ngalkapte in a peangte taw tuanhin Nile ngun a kosak sia na kiphatsak pui hi.

²⁶“Taanghlai pek pan hite theampo ka ngeal sa ahi hunlam za ngeingawl ni ziam? Tuasia, tu in ka zomto zo hi. Kulh taw ki uum khuapi muanhuaite sia niinthukte na suasak natu in thahatna kong pia hi.

²⁷Tualai ah a teang mite sia thahatna nei ngawl a; lau in lungmang uh hi. Amate in lo sungah lopate bang, ahibuale innkhum tungah a po lopate, nisuana sang pan vuisate ii seamkeak bang ahi hi.

²⁸“Ahitazong na thu theampo, bang vawtin, a koisung teng pai cisia ka he siat hi. Ka tungah na thin uukna ka he hi.

²⁹Tua na thin uukna thu le na kiphatsakna thu he siat zo ka hikom tu in na naak ah thikkoai khat kong thua tu a, na kam ah kamkhau thua in, nong paina lampi zui in kong cia kiksak tu hi,” ci hi.

³⁰Tuaciang, Isaiah in Hezekiah kumpipa tungah, “Hi thu in maisang hong piang tu lakna lim ahi hi. Tu kum le mai kum ciangin ngamh an bek na ne tu uh hi; ahizong kum kik ciangin thaicii tu in an na la tu uh a, sapitkung suanin a nga na ne tu uh hi.

³¹Judah minam sung pan a suakta mite sia khangto in, lei thukna ah zung tha in nga a nga thingno kungte bang hi tu hi.

³²Jerusalem khua sung le Zion Mual tungah a suakta mihing om tu hi, banghang ziam cile Vaanglianbelpa TOPA in hi bang piangsak tu in khensat zo hi.

³³“Tuaciang hi thu sia Assyria kumpilianpa taw kisai TOPA ii sonsa ahi hi: ‘Ama in hi khuapi sung tum ngawl tu a, thaltang khat taw zong kap ngawl tu hi. Lum toai ngalkapte kuama khuapi nai ah pai ngawl tu a, a kiim ah ngalnan natu kulh kivawt ngawl tu hi.

³⁴Ama sia hi khuapi sungah tum ngawlin, hong paina lampi ma zui in cia kik tu hi. Keima TOPA pau zo khi hi.

³⁵Ka minthan natu le ka naseampa David tungah ka kamciam hu in hi khuapi hungin ka dal tu hi,’ ci hi,” ci hi.

³⁶TOPA ii vantunglalang khat Assyria te ngiaphual ah pai in ngalkap 185,000 thatlum hi. A zing ciang zingsang khuavak tuungin tua munah amate a thi siatsa in kisial hi!

³⁷Tuaciang Assyria kumpilianpa Sennacherib sia nungkin in Nineveh ah heak kik hi.

³⁸Ni khat ni in Sennacherib in a biakinn sungah a pathian Nisroch bia in a om laitak, a tate sung pan nii ahi, Adrammelech le Sharezer te in amate ii namsaute taw a pa thatlum in, tua zawkciang Ararat ngam ah ngelin suakta uh hi. A tate sung pan a dang khat ahi Esarhaddon in a kumpilian za lua hi.