Read Siyin Chin Isaiah 39 Bible Online

Isaiah 39 - Siyin Chin bible

Isaiah 39

¹Hi hun sungin Baladan ii tapa, Babylon kumpipa ahi Merodach Baladan in Hezekiah kumpipa cii natna thu za ahikom lai khat le letsong khat thaak hi.

²Hezekiah in kamtaite pha takin vaidawn a, a hau nate — a ngunn le a khamh, a hel namtui te le a paaknamtui te banah a ngalvanh theampo lak hi. A vanh kholna inndoite ah vanhte ahizong, a ngamsung theampo ah a om vanhte ahizong a lak ngawl khat zongh om ngawl hi.

³Tuaciang kamsaang Isaiah sia Hezekiah kumpipa kungah pai in, “Hi mite koisung pan hong pai a, nang tungah bang hong ci ziam” ci in dongh hi. Hezekiah in, “Amate sia a khuala mama na ngam Babylon pan hong pai ahi uh hi,” ci in zo hi.

⁴“Amate in kumpi inn sungah bang teng mu ziam?” “Na theampo mu uh hi. Vanh kholna inndoite ah amate ka lak ngawl bangma om nawn ngawl hi,” ci in Hezekiah in zo hi.

⁵Tuaciang Isaiah in kumpipa tungah, “Vaanglianbelpa TOPA in,

⁶na kumpi inn sungah a om, na taanghpupite ii tu ni dong a kholsa vanh theampo Babylon khua ah a kipuak tu hun khat hong theng tu hi. Bangma taang ngawl tu hi.

⁷Nangma sung pan a piang na suan na paalte pawlkhat sia kipaipui tu a, Babylon kumpipa inn sungah numei uk seam tu in a cil kinget tu hi,” ci in son hi.

⁸Hezekiah kumpipa in ama ii nuntak sung tengin thinnopna le ngammuanna om tu hi, a cinopna ahi hunlam tel ahikom, “TOPA kung pan hong pai nong thupuak sia pha hi,” ci in zo kik hi.