Read Siyin Chin Isaiah 40 Bible Online

Isaiah 40 - Siyin Chin bible

Isaiah 40

¹Ih Pathian in, “Ka mite heeneam vun” ci hi. “Amate heeneam vun!

²Jerusalem mite hanthawn vun. Amate in ngei hialma thuak zo a, tu in a mawna teng kimaisak zo hi ci in son vun. A mawna theampo atu a kicingin amate daan ka pia zo hi,” ci hi.

³Aw khat in, “Ngam tawnghtol sungah TOPA atu in lampi khat vawtkhol vun! Ih Pathian atu in sennealngam sungah lam sial vun!

⁴Munkuam theampo dimh vun; mualpi theampo maaitamsak vun. Mualnote zaangtam suak tu a, a hamna mun kinealsak tu hi.

⁵Tuaciang TOPA minthanna kilangh tu a, minam bup in mu tu uh hi. TOPA ama mama in hi thu kamciam zo hi,” ci hi.

⁶Aw khat hong ngingin, “Thu khat thangsak in!” hong ci hi. “Bang thu thangsak tu khi ziam” ci in ka dongh hi. “Mihing theampo sia lopa taw kibang a; ngam sungah a om paakte sangin khuangei nungta zaw tuan ngawl ahi sia thangsak in.

⁷TOPA in tuate vui in a seamsak ciang lopate kongaw in paakte vul hi. Mihingte sia lopate sangin thuak zo zaw tuan ngawl hi.

⁸Hi hi, lopate kongaw in paakte vul a, ahihang ih Pathian ii kammal sia a tawntung kip hi,” ci hi.

⁹Jerusalem awng, mualsaang khat tungah kaato in lungdamna thupha thangsak in! Zion awng, nging takin au keakin, lungdamna thupha taangko in! Lau ngawlin son khe in. A Pathian uh hong pai tu hi ci in Judah khuate tungah son vun!

¹⁰Vaanglianpipa TOPA sia vaangletna taw uk tu in hong pai a, ama ii a suatak sa mite hong tonpui tu hi.

¹¹Tuucing pa khat taw kibangin ama in a tuuhon keamcing tu hi; ama in tuunote kaikhawmin a baan ah toai a, tuate ii puite dam takin paipui tu hi.

¹²Akua in khutkuak dim taw tuipi tee thei tu ziam, ahibuale a khutte taw vantung tee thei tu ziam? Akua in hai khat sungah leitung leitang heang thei tu ziam? tua ahibuale akua in mualliante le mualnote toai tee thei tu ziam?

¹³Bang vawt tu ci sia TOPA tungah akua in son thei tu ziam? Akua in ama hil thei tu ahibuale ngaisutna pia thei tu ziam?

¹⁴Nate bangbangin vawt tuak hi ci a, heak natu le tel natu in Pathian in akua dongh ziam?

¹⁵TOPA atu in minamte sia bangma hi ngawlin, tuimal khat bang zongh hi ngawl hi; a khuala na ah a om tuikulhte sia leivui bangin zaang hi.

¹⁶Lebanon ngam duisung ah a om nganhing theampo sia ih Pathian biakpiak natu in kicing zo ngawl a, a thingkungte zongh biakpiakna meihal natu in tawm lei hi.

¹⁷Minamte theampo sia ama atu in bangma tham hi ngawl het hi.

¹⁸Pathian sia akua taw kitee ngat thei tu ziam? Ama sia bang taw kibang hi ci in bangbang na son thei tu uh ziam?

¹⁹Ama sia thikseakte khutthiamte ii vawt, ngunn huanna sungah a sun suk khamh taw a zut milim taw kibang ngawl hi.

²⁰Ngunn ahibuale khamh taw a vawt zo ngawl pa in a muat ngawl tu thing teal hi. A pukvawk ngawl tu milim khat vawt tu in ama in khutthiamna neipa khat zong hi.

²¹He ngawl nu ziam? Nidang pekin note tungah hong kison hi ngawl ka na ziam? Leitung sia bangbangin kipan cisia za ngeingawl nu ziam?

²²Tuasia in van kalh ah a om leitung ii tungsia ama kumpi tokhum tungah a to pa ii vawt sa ahi hi; a nuai ah om mite sia mitsa nocik bang ahi hi. Puan dalna khat a kikhak bang le a sungah teen natu in puanbuk khat a kiphal bangin Ama in van a phalh hi.

²³Ama in a thahat ngamukte khiasukin bangma ngawl suaksak hi.

²⁴Amate sia a kung moino, a po tuung, a zung kho ngawl laite taw kibang hi. TOPA in vui a vaksak ciang tuate kongaw in taangphaw bangin lenkeak hi.

²⁵A thiangtho Pathian sia akua taw kitee ngat thei tu ziam? Ama taw a kibang akua dang om ziam?

²⁶Van ento in! Na mu aksite akua in bitphua ziam? Ngalkap honkhat lampui bangin, aksite lam a puipa in aksite a phakza he a, khat simin a min taw sam hi! Ama vaanglian mama a — amate khat zongh peuhe ngeingawl hi!

²⁷Tua ahile Israel te awng, ngimna na thuak uhte TOPA in hong heaksak ngawl hi ahibuale thukhaikim om ngawlin na thuak uh ciang TOPA in hong awlmawk ngawl hi ci in banghangin phun nu ziam

²⁸He ngawl nu ziam? Za zo hi ngawl nu ziam? TOPA sia tawntung Pathian ahi hi; ama in leitung theampo bitphua hi. Ama sia toi ngeingawl a, ngim ngeingawl hi. Ama ii ngaisutnate kuama in tel ngawl hi.

²⁹Ama in a thazawmte le a toite thahatsak hi.

³⁰Khangmoite ngawngawn a tha uh kiam hi; tangvalte a tha uh bo in puk thei hi.

³¹Ahihang a hu tu in TOPA a muangte in a tha uh thathak a dim kik sia mu tu uh hi. Amate muvanlaite bangin a tha uh taw leangto tu hi; amate a tai hangin toi ngawl tu uh hi; lam a pai uh hangin a thazawm ngawl tu uh hi.