Read Siyin Chin Isaiah 41 Bible Online

Isaiah 41 - Siyin Chin bible

Isaiah 41

¹Pathian in, “A khuala ah a om ngamte awng, thimdide in om vun a ka thu hong ngai tavun! Zum ah na thu sung tu in kinging vun; thu son thei natu hun nga tu nu hi. Akua thumaan ziam ci in khensat tu in paikhawm tek tawng.

²“Nisuana sang panin ngalzo pa hong paipui in, a paina theampo ah ngal a zosak sia akua ziam? Akua in kumpite le minamte tungah ama zawna pia ziam? Amate sia leivui bang keakin ama ii namsau in saatsuk hi. Taangphaw sia vui ii letkeak bangin a thaltangte in amate thethaang hi.

³Ama in ngammuang takin a nung pan zui in a del ciang, a peang in lei thutha man ngawl tu za in manlang hi!

⁴Hi bangin, a piangsak sia akua ziam? A kua in taanghthu suak tu in piangsak ziam? Tua munah a kipatciil pan kipan keima TOPA ka om a, keima TOPA sia a khakbel dongin tua munah ka om tu hi.

⁵“A khuala ngammite in ka sep sate mu zo hi; amate lau in kiitakna taw liing uh hi. Tua ahikom amate a vekpi kikhawmin hong pai uh hi.

⁶Khutthiamte sia khat le khat kihu in kihanthawn uh hi.

⁷Lettama pa in khamh seakpa tungah ‘Pha mama hi!’ ci hi. Milim a nealin a zeam pa in thikpim taw a kilh pa hanthawn hi. Amate in, ‘A kipeena pha hi’ ci uh hi — tuaciang amate in milim sia a koina munah kho takin kilh uh hi.

⁸“Ahihang nang, ka naseampa Israel awng, kong tealsa mi na hi a, ka lawmpa Abraham ii suan le paalte na hi hi.

⁹Leimongte panin nang kong paipui hi; a khualabel a kingte panin kong sam a, ‘Nang sia ka naseampa ni hi’ kong ci hi. Kei in nang kong nial bua a, nang kong teal hi.

¹⁰Lau heak in — nang kong ompui hi! Keima in na Pathian ka hi hi — bangma lau heak in! Kong thahatsak tu a, kong hu tu hi; kong dal tu a, kong ngum tu hi.

¹¹“Nang tungah hong thin uukte sia ngallel maizumna he tu uh hi. Nang hong sim mite thi tu a,

¹²leitung panin mang vadi tu uh hi.

¹³Keima in na TOPA Pathian ka hi hi; nang kong thahatsak a, ‘Lau heak in; hong hu tu khi hi’ ci in kong son hi,” ci hi.

¹⁴TOPA in, “Israel awng, note in mi cii tawmte le a thazawmte na hi uh hi. lau heak vun; hong hu tu khi hi. Keima, Israel ii a thiangtho Pathian sia nang hong ngumpa ka hi hi.

¹⁵A hiam, ha thak a nei ancilna bangin kong vawt tu hi. Note in mualpite cilin na susia tu uh hi; mualnote leivui suak tu hi.

¹⁶Amate sia vui sungah na lawn tu uh hi; vui va in amate len a, vuipi in amate thethaang tu uh hi. Tuasia ciang keima in na Pathian ka hi hu in na lungdam tu uh hi; Israel ii a thiangtho Pathian ahi keima nong pok tu uh hi.

¹⁷“Ka mite tui kisamh in tui a zon uh ciang, tuidu in a dang a ko ciang, TOPA, keima in amate thungetna ka zo tu hi; Israel te ii Pathian, keima in amate ka nusia ngei buatu hi.

¹⁸Mualkolte kawm ah ngunte ka luangsak tu a, mun kuamte sungah ciktui ka luangsak tu hi. Sennealngam sia tuilite ka suaksak tu a, leiko na mun sia ciktui luangte ka suaksak tu hi.

¹⁹Sennealngam ah cedar kungte, acacia, myrtle le olive kungte ka posak tu hi. Ngamkolna ah taakthingte, juniper thing le cypress thingte po in dui hong suak tu hi.

²⁰Hi teng mite in mu in TOPA, keima in hi nate vawt zo hi ci sia he tu uh hi. Israel te ii a thiangtho Pathian in hite a piansakna thu sia amate in he tu uh hi,” ci hi.

²¹Israel te ii kumpi ahi, TOPA in hite son tu nei hi: “No, minamte ii pathiante awng, na thu uh hong sung tavun. Na nial natu a phabel thute hong paipui tavun!

²²Hi sungah hong pai tavun a, bang piang tu ziam hong sonkhol tavun, tua hile tuasia hong pian ciang ih he tu hi. A piang sa thute zum ah thiang son vun a, tuate ii cinopna hong son tavun.

²³Mai sangah bang thu hong piang tu ci sia hong son tavun — tuaciang note sia pathiante na hi hunlam kong he thei tu uh hi! Thupha pawlkhat vawt vun, ahibuale siatna pawlkhat tungsak vun; launa le lamdangsakna taw hong kidimsak tavun!

²⁴Noma le na vawtte theampo bangma hi ngawl hi; no hong biate kiihuai hi!

²⁵“Nisuana sangah a teang mihing khat ka teal zo hi; saksang pan a sim tu in ama ka puak tu hi. Beal seakpa khat in tungman a totcil bangin, ama in ngamukte sia buan bangin tuanhcil tu hi.

²⁶Maan tatak nu hi kong ci thei natu in hi thu piang tu hi ci in akua in sonkhol nu ziam? Tua taw kisai kuama in kam khat zongh son ngawl nu hi; khat beak zongh in na kampau za ngawl hi!

²⁷Zion mite tungah tua thu a son phitbel sia, TOPA, keima ka hi hi; ‘Na mite hong pai hi! Amate inn ah hong cia uh hi!’ ci thu a son tu in Jerusalem ah kamtai khat ka paisak hi.

²⁸Tua pathiante sung ka et ciang, son tu a nei kuama om ngawl hi; ka thudokte khat zongh in hong zo thei ngawl hi.

²⁹Hi pathiante theampo sia a luithawthong ahi hi; amate in bangma vawt thei vet ngawl hi — hi milimte sia thazawmin vaang nei ngawl hi.”