Read Siyin Chin Isaiah 43 Bible Online

Isaiah 43 - Siyin Chin bible

Isaiah 43

¹Israel awng, nang hong bitphua TOPA in, “Lau heak in — kong ngum tu hi. Na min taw kong sam zo hi — nang sia Keima mi na hi hi.

²Tui thukte na kaantan ciang, nang taw kong omkhawm tu hi; ngim na thuaknate in hong zo zo ngawl tu hi. Meikuang na kaantan ciang, na kaangh buatu hi; na thuak haksatnate in nang hong nasak ngawl tu hi.

³Banghang ziam cile keima in TOPA na Pathian, Israel te ii a thiangtho Pathian, nangma hong ngumpa ka hi hi. Nangma kong suataksak natu in Egypt ka suplaw tu a; Ethiopia le Seba ka suplaw tu hi.

⁴Na nuntakna ngum tu in minamte theampo ka suplaw tu hi, banghang ziam cile nang sia kei atu in na manpha a, nang kong it a kong upat hi.

⁵Lau heakin — nangma hong ompui khi hi! “Ni suana a khualana pan le nitumna sang a khuala belna panin, na mite inn ah kong ciapui tu hi.

⁶Saksangte tungah amate paisak vun ka ci tu a; thangsang te tungah amate khaktan heak vun ka ci tu hi. Ngam khuala na pan le leitung mun theampo panin ka mite heak kik tahen.

⁷Amate sia keima mite hi a, keima hong minthangsak tu in ka bitphua ahi hi,” ci hi.

⁸Pathian in, “Ka mite zum ah sam vun. Amate in mittang nei hi napi, a mit uh taw hi; amate in bil nei hi napi, a nangong uh hi!

⁹Thu kisitna munah hong pai natu in minamte sam vun. Amate ii pathiante sung pan akua in maisang thu sonkhol thei ziam? Amate sung pan akua in tu a a piang thu sia sonkhol ziam? Hi pathiante in a sonkhol thute maanin, amate kammalte maan hi, ci in a kilangh natu in, a tetti te hong paipui tahen.

¹⁰“Israel mite awng, note in ka tetti te na hi uh hi; kei hong he in nong up natu le, keima bekma Pathian ka hi sia na tel natu uh in ka naseam tu in no kong teal hi. Keima simngawl pathian dang om ngawl hi; om ngeingawlin, maisang zongh ah om ngeingawl tu hi.

¹¹“No hong ngum thei tu sia TOPA ahi, keima khat bekma ka hi hi.

¹²Bang hong piang tu cisia ka sonkhol zo a, tuaciang no hong hu tu in kong pai hi. Ngamdang pathian in hi bang vawt ngeingawl hi; note in ka tetti te na hi uh hi.

¹³Keima in Pathian ka hi a, a tawntungin ka hi tu hi. Kuama in ka vaangletna panin suakta thei ngawl tu hi; ka septe kuama in kheal zo ngawl tu hi,” ci hi.

¹⁴Israel te ii a thiangtho Pathian, note hong ngum TOPA in, “Note hong ngum tu in, Babylon a sim tu ngalkap honkhat kong puak tu hi; khuapi kongpite ka siasak tu a, a mite auna awte in kaana aw suak tu hi.

¹⁵Keima in TOPA a thiangtho na Pathian ka hi hi. Israel awng, no kong bitphua a, keima in note kumpi ka hi hi,” ci hi.

¹⁶Nidang lai pekin TOPA in tuipi kaantan in lampi khat vawt a, a tuipeite kaantanin lamzin khat vawt hi.

¹⁷Ama in siphu ngalleangte le siphute a kihel, a thahat ngalkap hon khat suksiatna ah lampui hi. Amate pukin tho kik nawn ngawl a, meivak kuang muutmit bang ahi hi!

¹⁸Ahizong TOPA in, “Nungsang thute len heak vun a, taanghlai a piang thute thupi in ngaisun heak vun.

¹⁹A thak na khat ka vawt tu sia en vun. Tuasia hong piang zo hi — tu in mu thei nu hi! Ngam tawnghtol sungah lampi khat ka vawt tu a, tualai ah note atu in tui ka luangsak tu hi.

²⁰Ngamsate ngawngawn in kei hong zakta tu hi; ka tealsa mite tui pia tu in sennealngam sungah nguntui ka luansak ciang, ngiate le kalaoh vacimte in kei hong pok tu uh hi.

²¹Amate sia keima atu in ka vawt mite hi a, amate in keima hong pokna lasa tu uh hi!” ci hi.

²²TOPA in, “Israel awng, ahihang kei nong cimtak zo hi; nang in kei nong bia bua hi.

²³Nangma in tuu taw na meihal biakpiaknate kei kungah nong paipui bua hi; na biakpiakna taw kei nong zatak vawt bua hi. Biakpiaknate ngenin vanhngit kong suan bua a, ngimnamtui ngenin, thinngim kong pia bua hi.

²⁴Kei atu in ngimnamtui na lei bua a, na nganhingte ii thau taw nong lungkimsak bua hi. Ahihang na mawnate taw kei tungah vanhngit nong suan zaw pumsai a; khialna na vawtnate taw in ka thin nong ngimsak hi.

²⁵Ahitazong, na mawna hong maisak sia Pathian keima hi a, keima ka hikom hi bangin ka vawt hi. Na khialnate lenin maw kong suan buatu hi.

²⁶“Zum ah pai tawng; nang hong kimawsakna thu hong paipui ta'n! Nangma in a maan na hina thu lak tu in na thu sung in!

²⁷Na taanghpupi masa belpa uh maw hi; na lampuite ka tungah hong khial hi,

²⁸no hong ukte in ka inn thiangtho sia ninsak uh hi. Tua ahikom Israel tungah siatna kong thengsak hi; ka mite selnona ka thuaksak hi,” ci hi.