Read Siyin Chin Isaiah 44 Bible Online

Isaiah 44 - Siyin Chin bible

Isaiah 44

¹TOPA in, “Israel, ka naseampa, ka teal mi, Jacob suan le paalte awng, tu in ngai vun.

²No hong bitphua TOPA ka hi hi; na sua hun pan kipan, kong hu zo hi. Lau heak in; nangma in kong it kong teal mi, ka naseampa na hi hi.

³“A dangko leitang tungah tui ka pia tu a leiko tungah luitui ka luangsak tu hi. Na tate tungah ka thaa ka bua tu a, na suan na paalte tungah ka thupha ka pia tu hi.

⁴Amate in pha takpi in tui a kibuak lopate le, luitui luangte hui ah a po pakngiam thingte bangin khang tu uh hi.

⁵“Mite, khat zawkciang khat in, ‘Keima in TOPA aa ka hi hi,’ ci tu hi. Amate in Israel mite taw kikop tu in hong pai tu uh hi. mi simin a baan tungah TOPA min at in ama le ama sia Pathian ii mihing khat ka hi hi,’ ci tu hi.” ci hi.

⁶Israel dalin, a uk TOPA, Vaanglianbelpa TOPA in: “Keima in a masabel, a khakbel le khat bek ahi Pathian ka hi hi; keima simngawl pathian dang om ngawl hi.

⁷Keima sep bangin akua dang in seam thei ziam? A kipatciil pan a tawpna hun dong a piang tu thu theampo akua in sonkhol thei ziam?

⁸Lau heak vun, ka mite awng! Taanghlai hun pan kipan tu hun dong hong piang tu thu ka sonkhol sa theampo note in na he uh a, tuaciang, note in ka tetti na hi uh hi. pathian dang a om ziam? Ka zaak ngeingawl a vaanglian pathian dang khat po om ziam?” ci hi.

⁹Milim a vawt mite theampo mannung ngawlin, amate ii a man neisak mama pathiante sia luithawthong hi. Hi bang pathiante a biate sia a mit uh taw in, bangma he ngawl uh a — amate kimaimawlsak tu hi.

¹⁰pathian khat bangin biak tu in thik milim vawt tu sia bangma a phatna om ngawl hi!

¹¹Tuabangte a bia theampo in maizumna nga tu hi. Milim a vawt mite sia mihing ma hi lel uh hi. Amate hong paisak tavun a, thusitna thuaksak vun — amate patau tu a, maimawlna thuak tu uh hi.

¹²Thik seakpa in thikbek khat la in meikam tungah pum taw zaap hi. Ama ii a thahat khut taw ama dei bang lim a sua natu in, sek vikin seak hi. Ama in na a sep ciang, ngilkial dangtaak in toi hi.

¹³Lettama pa in thing pitee hi. Ama inn sungah a koi tu in, ama in leikaang taw lim khat suai in, ama na zakte taw khuakin, a mealpha mihing lim khat vawt hi.

¹⁴Ama in a zak tu in cedar thingkungte phuk tu hi, tua ahibuale oak thingkung ahizong cypress thing ahizong duisung panin teal tu hi. Tua ahibuale laurel thingkung suanin a khan natu in nguatui ngak tu hi.

¹⁵Mihing khat in thingkung khat sia thingthu tu le milim vawt natu in zangh hi. Ama in thing khen khat sia a meilum oai tu le anluum em natu in zangh hi; khen khat taw pathian vawtin bia hi.

¹⁶Ama in thing pawlkhat sia meikhuk ah thut hi; sa em in ne a, lungkim hi. Ama in mei oai in, “Khualum a bang zata nuam ziam! Mei sia pha mama ta a!” ci hi.

¹⁷Thing a om lai sia taw ama in milim khat vawt a, tuaciang a mai ah kun in bia hi. Ama in milim tungah thungen in, “Nang in ka pathian na hi hi — hong ngum ta'n!” ci hi.

¹⁸Tuabang mite sia mawmaw leilam ahikom amate in bang teng vawt khu ziam ci zongh he ngawl hi. Amate in thumaan thutak a mu thei ngawl natu in, a mit uh si in, a tel thei ngawl natu in a ngaisutna khak uh hi.

¹⁹Milimte a vawtpa in hi bangin a ci thei natu ciimna heakna nei ngawl hi, “Thing pawlkhat ka thuttum hi. Meikam tungah anluum pawlkhat ka em a, sa zongh em in ka ne hi. A om lai thingte sia milim in ka vawt hi. Hi munah thingtawng khat ii mai ah ka kunsuk hi!” ci hi.

²⁰Ama sia vut ne te taw kibang lel hi. Ama ii mawmawt ngaisut nate in lamkhialsak zo a ama sia kihu zo nawn ngawl hi. A khut sungah a toai milim sia pathian hi vet ngawl hi, ama in ci nuam ngawl tu hi.

²¹TOPA in, “Israel awng, hi thu ciamtee in; ka naseampa na hi sia ciamtee in, ka naseam tu in nang kong bitphua a, kong mangil ngei buatu hi.

²²Na mawnate meeikaai bangin ka bosak zo hi. Ka kungah hong cia kik ta'n; keima in nang hong ngumpa ka hi hi,” ci hi.

²³Lungdamin au vun, no vantungte awng! Au vun, lei sung a thuk munte awng! Lungdamin au vun, mualte le ngam sungah a om thingkungte theampo awng! TOPA in a letna sia ama mi Israel te a ngupna taw in hong lak zo hi.

²⁴“Keima in TOPA, nang hong ngumpa ka hi hi. Keima in nang hong bitphuapa ka hi hi. Keima in TOPA, na theampo A bitphuapa ka hi hi. Keima nguakin vantungte ka zalhkeak hi; leitung ka vawt lai in, kuama in kei hong hu ngawl hi.

²⁵Aisaan theite a mawmaw ka sua tu a, aksi en theite ii thuson kholnate a lungmanhuai ka sua tu hi. Mipilte ii kammalte ka nial a amate pilna sia mawmawtna ahi hunlam ka lak hi.

²⁶Ahihang ka naseampa in thuson kholna khat a nei ciang, ka ngealnate pualaak tu in, kamtai khat ka puak ciang tua ngealnate le sonkholnate ka taangtungsak hi. Jerusalem ah mite teang kik tu hi ci in Jerusalem tungah ka son a, Judah ngam khuapite kisa kik tu hi ci in Judah ngam khuapite ka son hi. Tua khuapite sia a siatcipnate sung pan tho to tu hi.

²⁷Thupiakna kam khat taw tuipi ka kangcipsak hi.

²⁸Keima in Cyrus tungah, ‘Nangma in keima luangin a uk tu pa na hi hi; Keima dei bangin na seam tu hi: Jerusalem khua a kisak kik natu le Biakinnpi tawdapphate a kipha natu in thu na pia tu hi,’ ka ci hi,” a ci hi.