Read Siyin Chin Isaiah 50 Bible Online

Isaiah 50 - Siyin Chin bible

Isaiah 50

¹TOPA in, “Pasal khat in a zi a khul bangin keima in ka mite hawlkeak hong sa nu ziam? Tua ahile, zi khulna laite koisungah om ziam? Mihing khat in a tate sila in a zuak bangin, keima in note saltaang tu in zuak hong sa nu ziam? Hi ngawl hi, noma mawna hangin saltaang in a pai na hi uh a; noma khialna liante hangin hong kihawl khia ahi hi.

²“Ka mite hun tu kong pai ciang banghangin ka mite in hong awlmawk ngawl ziam? Ka sap ciang amate in banghang hong zo ngawl ziam? Amate a hun tu in keima thazawm lei ka hi ziam? A sungah a om ngasate tui kisamh in a thi natu sia ka thupiakna taw in tuipi tui ka kangsak thei a, ngunte sennealngam ka suaksak thei hi.

³A thisate atu khuangai bang keakin, vantung sia ka zingsak thei hi,” ci hi.

⁴Vaanglianpipa TOPA in a ngim a toite ka thahatsak thei natu in ka pau tute hong hil zo hi. Ama ii hong hil tute ka ngai thei natu in zing simin ama in kei hong thalawpsak hi.

⁵TOPA in thu tel theina kei hong pia zo a, keima in ama langpan ngawlin ka nungngat bua hi.

⁶Kei hong saatte ka nungzaang ka ngat hi. Amate in kei hong selno zazaan a, ka khamulte hong phaisak in ka maitang hong cilphii ciangin ka ngat nginge hi.

⁷Ahihang amate ii hong selnonate in kei bangma hong tatsak zo ngawl hi, banghang ziam cile Vaanglianpipa TOPA in kei hong hu hi. Hong selnonate ka thuak tenton hi. Kei hong kimaimawlsak ngawl tu cisia ka he hi,

⁸banghang ziam cile Pathian hong nai a, ama in ka maw ngawlna thu pualaak tu hi. Kei tungah akua in thu hong vawt ngam tu ziam? Thukhenzum ah pai tek tawng! Maw hong suan tahen!

⁹Vaanglianpipa TOPA mama in kei hong panpui a — tua hi le akua in kei sia mawnei hi ci in tetti lak thei tu ziam? Kei tungah thu hong vawtte theampo bomang tu hi; amate sia nget ii neak puan bangin bo tu uh hi.

¹⁰TOPA zakta in, a naseampa thu a ni note theampo awng, na paina uh lampi zing tatak tha tu hi, ahihang TOPA muangin, na Pathian uh suang vun.

¹¹Ngualdangte lalcipsak tu a sawm note theampo sia noma ii sawmnate in noma hong lalcipsak tu uh hi. TOPA ama mama in hi thu piangsak tu hi; thinngim lungmanna na thuak tu uh hi.