Read Siyin Chin Isaiah 52 Bible Online

Isaiah 52 - Siyin Chin bible

Isaiah 52

¹Jerusalem awng, thahat in a, lian kik in! Pathian ii a thiangtho khuapi awng, puan et hoi silh in! Pathian um ngawl mite na kongpite sungah tum kik ngei nawn ngawl tu uh hi.

²Jerusalem awng, nangma le nangma kisuaktasak in! Leivui sung pan thoto in a, na kumpi tokhum tungah to in! A kiman Zion mite awng, no hong khiina thikkhaute suut vun!

³Vaanglianpipa TOPA in a mite tungah, “Sal na tan uh lai, no atu in sum hong kipiaksak ngawl hi; tuasia bangma in no hong kisuatak natu in bangma hong kipiaksak ngawl tu hi.

⁴Egypt ngam sungah ngamdangmite bangin a teang tu in na pai uh lai in, noma uk thu in na pai uh hi; ahitazong, Assyria te in zawthawk thu taw no hong lakeak a, no atu in bangma hong pia ngawl hi.

⁵Tu in Babylon ah tuabang ma in piang hi: note sia ngalmatte na hi uh a, no atu in bangma hong kipia ngawl hi. No hong ukte kiphasak, kihisak in kei hong melsia tawntung uh hi.

⁶Khatvei ciangin note tungah thu hong sonpa, keima Pathian ka hina thu na tel tu uh hi,” ci hi.

⁷Mualte kaantan in thupha, kilemna thu puak a hong pai kamtaipa khat ih mu tu sia lamdang lawlawm hi! Ama in ngalzawna thangsak a, Zion tungah, “Na Pathian sia kumpi ahi hi!” ci hi.

⁸Khuapi a cingte au uh a, lungdam in au khawm tek uh hi! Zion ah TOPA hong heak kik sia amate in a mit tek taw mu thei uh hi.

⁹A kisia Jerusalem awng, lungdam in au keak vun! TOPA in a khuapi suatak tu a, a mite heeneam tu hi.

¹⁰TOPA in ama ii a thiangtho vaangletna zangh tu hi; ama in a mite ngum tu a, leitung theampo in mu tu uh hi.

¹¹Biakinn vanh a pua note theampo awng, Babylon nusia vun. A kikhaam vanhte thutha heak vun; a thiangtho in om vun a, tuaciang nusia vun.

¹²Tutung sia manlang bingbung in nusiat kul ngawl tu hi; suatak tu hanciam ngawl tu nu hi. TOPA na Pathian in note lam hong pui tu a, na kiim na paam uh pan hong dal tu hi.

¹³TOPA in, “Ka naseampa in ama ii nasepna zo tu hi; ama sia nasia takin kipatoai tu hi.

¹⁴Mihing tam mama in ama a mu uh ciang lamdang sa leih uh hi; ama sia mihing taw kibang ngawl za dongin a mealhem hi.

¹⁵Ahihang tu in minam tam mama in ama lamdang sa tu uh a, kumpite sia lamdang sa in pau thei ngawl liang tu uh hi. A heak ngeingawl na pawlkhat amate in mu in tel tu uh hi,” ci hi.