Read Siyin Chin Isaiah 54 Bible Online

Isaiah 54 - Siyin Chin bible

Isaiah 54

¹Jerusalem awng, nang in tasel numei khat bang na hi zo a, ahihang tu in lungdam in lasa in na au thei hi. A pasal taw a kop tawntung nupi khat sangin tu in nang in ta tam na nei zaw tu hi.

²Na teenna puanbuk khan in; a khau sausak in khetphinte khen kip in!

³Na ngamkiim theampo ah na ngamngite na keak tu hi; tu laitak a minam dangte ii lua, na ngam sia na mite in la kik tu hi. Tu laitak a, a kinusia khuapite sia mihing taw kidim kiksak tu hi.

⁴Lau heak in — na mai hong kimawlsak kik ngawl tu hi; hong kizawngsak ngawl tu hi. A khangmoi zi khat bangin na thumaan ngawlna le, meingong khat bangin, thinkiam a na lunglen mamana te na mangil tu hi.

⁵Nangma hong bitphuapa in na pasal bang hong hi tu a — ama min sia Vaanglianbelpa TOPA ahi hi. Israel te ii a thiangtho Pathian in nang hong ngum tu a — ama in leitung theampo a ukpa ahi hi.

⁶Israel awng, nang sia a pasal ii taisat thinngim mama in a om zimoi khat taw na kibang hi. Ahihang TOPA in ama kungah nang hong sam kik a,

⁷“Tawmvei no sung nang kong nusia hi; itna lian taw kong pui kik tu hi.

⁸Ka thin uuk hu in tawmvei no sung kong nungngat a, ahihang a tawntungin nang kong itna kong lak tu hi,” hong ci hi. Nang hong ngum TOPA in tuabangin ci hi.

⁹“Leitung ah tuipi liim kik nawn ngawl tu hi ci in Noah hun lai in kong kamciam hi. Na tungah hong thin uuk kik ngawl tu khi hi ci in tu in kong kamciam hi; nang kong teih buatu a daan kong pia buatu hi.

¹⁰Mualliante le mualnote a cimh ta zongin, nang kong itna bo ngeingawl tu hi; thinnop natu kong kamciam sia ka len tawntung tu hi,” hong ci hi. Nang hong it TOPA in tuabangin ci hi.

¹¹TOPA in, “Nang hong heeneam tu om ngawl, ngimna a thuak, a hu tu om ngawl khuapi, Jerusalem awng, na tawdapphate suangmanpha taw ka ciang kik tu hi.

¹²Na tausaangte suangmanpha san taw, na kongpite mei bang a taang suangmanpha taw, na kulh theampo suang manpha taw ka vawt tu hi.

¹³“Keima mama in na mite ka hil tu a, nopsakna le kilemna ka pia tu hi.

¹⁴Thutang le thumaan in na tha hong khosak tu hi. Zawthawk vawtna le launa, patauna taw na kipeal tu hi.

¹⁵Khat po in nang hong sim le, kei thukimna om ngawlin hong sim hi a; nang hong do pawpo puk tu hi.

¹⁶“Meikhuk vawtin, ngalhiamte a piangsak thikseakpa ka bitphua hi. Ngual thalup natu in hiamhte a zangh ngalkap pa zongh ka bitphua hi.

¹⁷Ahihang ngalhiam khat zongh in nang bangma hong law zo ngawl tu hi; nang hong mawsiatte theampo na zo kik natu na he tu hi. Ka naseamte ka panpui tu a, zawna ka pia tu hi,” ci hi. TOPA in ci zo hi.