Read Siyin Chin Isaiah 60 Bible Online

Isaiah 60 - Siyin Chin bible

Isaiah 60

¹Tho in, Jerusalem awng, ni bangin taang in; TOPA vaangletna sia na tungah taang hi!

²Minam dangte sia khuazing in tuamcip tu a, Ahihang TOPA khuavak sia na tungah taang tu hi; Ama ompuina ii taanna sia nang taw omkhawm tu hi.

³Minamte sia nangma khuavak sungah hong zuan tu a, kumpite sia nangma ii ni thak khuavak hong zuan tu uh hi.

⁴Bang thu piang ziam na kiim na paam en in: Inn ah hong cia tu in na mite kikhawm uh hi! Na tapate uh mun khuala pan hong cia tu uh hi; Na tanute sia patangnote bangin kitoai tu hi.

⁵Hi thu mu in thinnopna taw na kidim tu hi; Na lungdam leilamin na liing tu hi. Minamte ii haunate nang kungah hong kipuak tu a; tuipi ngal panin amate ii haunate hong theng tu hi.

⁶Midian le Ephah panin, kalaoh vanhpua honpite hong pai tu hi. Amate sia Sheba panin hong pai tu a, Khamh le ngimnamtui hong paipui tu hi. Mihingte in TOPA sep sa thuphate son tu uh hi!

⁷Kedar le Nebaioth te ii tuute theampo biakpiakna in nang kungah hong kipuak tu a, TOPA lungkim natu in biaknatau tungah kipia tu hi. TOPA in a Biakinnpi sia minthangsak seseam tu hi.

⁸Vakhute a ngil a zot bangin Meeikaai bangin hong pai vanawm teambawte sia bang teambawte ahi ziam?

⁹Tua teambawte sia ngam khuala na pan hong pai hi a, Pathian ii mite inn ah hong ciapui ahi hi. Minam theampo in ama mite a zaktasak Israel te ii a thiangtho Pathian TOPA ii min patoai natu in, amate in ngunn le khamh hong paipui uh hi.

¹⁰TOPA in Jerusalem tungah, “Ngamdangmite in na luphungte ciang kik tu a, A kumpite in nangma na seam tu uh hi. Ka thin uukin nang daan kong pia a, Ahihang tu in ka maipha le kong hesuakna nang kong lak tu hi.

¹¹Minamte ii kumpite in amate ii haunate nang kungah hong paipui thei natu in, na kongpite sun le zan in kihong tu hi.

¹²Ahihang nangma na a seam ngawl minamte sia kilalcipsak tu hi.

¹³“Ka Biakinnpi mealhoisak natu, ka khuapi minthansak natu, Lebanon taamthing sung panin a phabel thing ahi, taakthing, juniper le cypress te sia Nang, Jerusalem khua a kisak kik natu in hong kipuak tu hi.

¹⁴Nang hong zawthawk vawt mite ii tapate hong pai tu a, Nang zatakna hong lak tu in kun tu hi. Khatvei lai in nang hong nomu theampo sia na peang ah bokin hong bia tu uh hi. Amate in nang sia, ‘TOPA ii Khuapi,’ ‘Zion, Israel ii A thiangtho Pathian ii Khuapi,’ hong ci tu uh hi.

¹⁵“Nang sia hong kinusia nawn ngawl, hong ki ensan nawn ngawl tu a, A kinusia khuapi le a ngamkhing khuapi na hi nawn buatu hi. Keima in nang sia a lian le a mealhoi in kong vawt tu a, A tawntung, a tawntungin lungdamna munin kong vawt tu hi.

¹⁶A nu in a tasen a op bangma in Minamte le kumpite in nang hong keam cing tu hi. TOPA ahi Keima in nang kong ngum zo a, Israel ii a vaanglian Pathian in Nang hong suataksakna thute na he tu hi.

¹⁷“Keima in, taau luangin khamh, Thik le thing luangin ngunn le taau, Suang luangin thik kong puak tu hi. Nang hong ukte in nang hong zawthawk vawt nawn ngawl tu hi; Thukhaikim thu le kilemna taw amate in kong uksak tu hi.

¹⁸Thazaw suangin kizawthawkna awte kiza nawn ngawl tu hi; Suksiatna in na ngam hong siasak kik nawn ngawl tu hi. Luphung khat bangin nang kong dal, kong pao tu hi; Nang hong ngum zo ka hikom nong pok tu hi.

¹⁹Sun hunin ni in na khuavak hi nawn ngawl tu a, Zan hunin tha zongh na khuavak hi nawn ngawl tu hi; Keima TOPA sia a tawntung na khuavak ka hi tu hi; Ka vaangletna khuavak sia nang tungah taang tu hi.

²⁰Na hee, na khuangaina nite bo tu hi. Keima TOPA sia a tawntung na khuavak ka hi tu a, Ni le tha sangin ngei khozaw tu hi.

²¹Na mite theampo in a maan seam tu a A tawntungin tua ngam lua tu hi. A theampo tungah ka letna a pualaak tu in tuate ka suan a, ka vawt hi.

²²Na minam sung pan a nobel le a kiniamkhiakbel Na innkuan ngawngawn zongh a thahat minam khat bangin lian tu hi. A hun cin ciang keima in hi thu a manlangin ka piangsak tu hi. Keima in TOPA ka hi hi!” ci hi.