Read Siyin Chin Isaiah 61 Bible Online

Isaiah 61 - Siyin Chin bible

Isaiah 61

¹Vaanglianpipa TOPA in a Thaa taw kei hong dim zo hi. Mizawngte tungah lungdamna thupha puak tu, Thin kitamhthamte a damsak tu, A kimante suatakna thu le Thong sungah a kikhumte suatakna thu taangko tu in Ama in kei hong teal zo a hong puak zo hi.

²TOPA in a mite a ngup tu hun le A ngalte a zaw tu hun hong theng zo hi ci sia Thangsak tu in kei hong sawl zo hi. A he a khuangaite theampo heeneam tu in ama in kei hong sawl zo a,

³Zion ah a om a khuangai mite tungah Heena luangin thinnopna le lungdamna, khuangaina luangin pokna la khat puak tu in kei hong paisak hi. Amate sia TOPA mama ii suan sa Thingkungte taw kibang tu hi. Amate theampo in a maan sia seam tu uh a, Pathian sia ama ii sepnate hu in kipok tu hi.

⁴Amate in khuangeipi ma a lalsa in a om khuapite sa kik tu uh hi.

⁵Ka mite awng, ngamdangmite in na na hong sepsak tu uh hi. Amate in na tuu honte cingin, Na lo uh tho in na sapithuante cing tu uh hi.

⁶Note sia TOPA ii thiampite, Ih Pathian ii naseamte hong kici tu hi. Note in minamte haunate na nopsak pui tu uh a, Note in amate ii hauna sia noma hauna ahikomin Na kiphatsak pui tu uh hi.

⁷Na maizumna uh le na min daina uhte bo tu hi. Note in noma leitangh tungah na teang tu uh a, Na haunate uh a zaa nii in khangto a; na lungdamna uh kip tawntung tu hi.

⁸TOPA in, “Thukhaikim ka dei a, kizawthawkna le khialna lian ka huatsa hi. Ka mite thaman thumaan takin ka pia tu a, Tawntung thuciamna khat amate taw ka vawt tu hi.

⁹Amate sia minamte sungah minthang tu uh hi; Amate a mu theampo in Amate sia keima ii thupha ka piaksa minam khat ahi hunlam he tu uh hi,” ci hi.

¹⁰TOPA sepna hangin Jerusalem lungdam hi. Jerusalem sia mothak khat pasal a nei ni in a kizeam bang ahi hi. Pathian in ama sia ngupna le ngalzawna taw tuam zo hi.

¹¹Anciite po in a meento bang tatak ma in Vaanglianpipa TOPA in a mite ngum tu a, Minamte theampo in ama pok tu uh hi.