Read Siyin Chin Isaiah 63 Bible Online

Isaiah 63 - Siyin Chin bible

Isaiah 63

¹“Edom ngam Bozrah khuapi pan hong pai hisia pa akua ziam? Puansan silhin pha tak a kizeam, vaangletna le thahatna taw hong pai hisia pa akua ziam?” “A hun zo tu in vaangletna a nei, ama ngalzawna thu thangsak tu in hong pai, TOPA ahi hi.”

²“Sapittui vawt tu in sapitnga a cilpa taw kibangin, banghang in a puan tuabang keakin san ziam?”

³TOPA in, “Keima in sapitngate ka totcil bangin minamte ka tuanhcil zo a, kei hong hu tu in kuama hong pai ngawl hi. Thin uukin amate ka tuanhcil a, amate ii chi sia ka puan tung theampo ah baang zo hi.

⁴Ka mite ka ngup tu hun hong theng zo hi ci in ka khensat hi; a ngalte daan piak tu hun hi zo hi.

⁵Ka et ciang kei hong hu tu kuama a om ngawl hunlam mu in, lamdang ka sa hi. Ahihang ka thin uukna in keima hong thahatsak a, keima mama in ngal ka zo hi.

⁶Ka thin uukna taw in minam bup tuanhcil in ka sucip hi. Amate ii nuntakna chisan sia lei ah ka bua hi,” ci in zo hi.

⁷TOPA ii a kip a kho hong itna thu ka son tu hi; Ei atu in ama hong sep sakte theampo hangin ama ka pok hi. Ama ii hesuakna le tawntung itna hangin Israel mite ama in thupha tam mama pia zo hi.

⁸TOPA in, “Amate sia ka mite hi; kei hong theam ngawl tu uh hi,” ci hi. Tua ahikom TOPA in amate sia

⁹a thuakna theampo panin, ngum hi. Amate a ngum sia vantunglalang khat hi ngawl a, TOPA ama mama ahi hi. A itna le a hesuakna taw amate suatak hi. Ama in a bosa hun sungah amate keamcing tawntung hi,

¹⁰ahihang amate in TOPA langpanin a thaa thiangtho khuangaisak hi. Tua hu in TOPA sia amate ngal suakin amate do hi.

¹¹Ahizong amate in TOPA naseampa Moses ii hun lai in a bosa hunte phawk kik a, “A mite ii lampuite, tuipi panin a hunkhia TOPA sia tu in koi sungah om ziam? Moses tungah a thaa a pia, TOPA sia koi sungah om ziam?

¹²Ama minthan tawntung natu in Moses tungtawnin a vaangletna taw na lian a seam pa, tuipi tuite khen a, tuithuk kaantan in a mite lam a pui pa TOPA koi sungah om ziam?” ci in dongh uh hi. TOPA in lampui a, amate sia ngam siphu bangin a peang sina kho mama a, lutu ngeingawl hi.

¹⁴Khuite leipha kuam sungah a kipaipui bangin TOPA in a mite tawlngasak hi. TOPA in a mihingte hi bangin lampui a, ama min thangsak hi.

¹⁵TOPA awng, a thiangtho le a minthang na teenna vantung panin, ko hong ensuk ta'n. Ko nong thin nopmawk belna sia koi sungah om ziam? Na vaangletna koi sungah om ziam? Nong itna le nong hesuakna koi sungah om ziam? Ko hong ngaingon heak in.

¹⁶Nangma in kote pa na hi hi. Ka taanghpupi Abraham le Jacob te in ko hong thusim ngawl uh hi, ahihang TOPA, kote hong suatak tawntung pa, nangma in kote pa na hi hi.

¹⁷Banghangin na lampi panin kote lam hong pialsak ni ziam? Banghangin nang kung pan lampial tu in thinpui mama tu in hong vawt ni ziam? Na na a seam mihingte atu le nangma mihing ahi tawntungte atu in hong heak kik ta'n.

¹⁸Na mi thiangthote ahi, kote sia, ka ngalte in tawmvei sung teng hong notkeak hi: amate in na inn thiangtho sia tuanhcil hi.

¹⁹Nangma in kote hong ukpa ahi ngeingawl bangkeak, kote in nangma mi ahi ngeingawl bang keakin nong vawt hi.