Read Siyin Chin Isaiah 64 Bible Online

Isaiah 64 - Siyin Chin bible

Isaiah 64

¹Banghangin vantung hongkeak in hong tuaksuk ngawl ni ziam? Mualte sia nang hong mu a, hong kiita in liing tu uh hi.

²Meisa khat tungah a kisuang tuiso bangin amate liing tu uh hi. Hong pai ta'n a na vaangletna na ngalte tungah pualaak in, minamte na mai ah liingsak in!

³Nong pai lai in kote muanmawk khol ngawl, a lauhuai nate na vawt hun khat om hi; mualte in nang hong mu in, hong kiita in liing uh hi.

⁴Ama sungah lametna a nei mihingte atu in tuabang na a seam, nangma bang Pathian khat sia kuama in mu ngeingawl a, za zongh za ngeingawl uh hi.

⁵Na deisak bangin nuntak tu a phawkte le a maan na seam in a lungdamte na phatvawt hi. Ko tungah na thin uuk hi, ahizong kote in mawna khialna ka vawt leleng uh hi; na thin uuk mama napi in taanghlai pan kipan kote in mawna khialna ka vawt tan uh hi.

⁶Eite theampo ih maw siat zo hi. Ih ngamtatna a phabelte ngawngawn a nincip hi siat hi. Ih mawnate hangin vui ii letkeak thingteekote taw ih kibang hi.

⁷Thungen in nang kung hong zuan kuama om ngawl a; huna ngen tu in nang kung hong pai kuama om ngawl hi. Ka mawnate uh hangin nangma in ko kung pan kisealin nong nusia zo hi.

⁸Ahizong TOPA awng, nangma in kote Pa na hi hi. Kote in tungman bang hi a, nang in beal seakpa bang na hi hi. Nangma in kote nong bitphua a,

⁹tua ahikom ko tungah hong thin uuk lei heak in a, ka mawnate uh taw ko hong len top heak in. Kote sia nangma mihingte ka hi uh hi; kote hong hesuak ta'n.

¹⁰Na khuapi thiangthote sia sennealngam khat bang ahi hi; Jerusalem sia a kinusia a lalcip khat ahi hi,

¹¹thiangtho in a et hoi, ka taanghpupite ii nang hong pokna mun ahi ka Biakinnpi uh sia, mei in kaanghtum zo hi. Kote ii nop ka sakna mun theampo lal siat zo hi.

¹²TOPA awng, hi thute theampo phamaw sa tuan ngawl ni ziam? Nangma sia bangma lok ngawlin kote thuak laak tu za dongin ngim hong thuaksak tu ni ziam?