Read Siyin Chin Isaiah 65 Bible Online

Isaiah 65 - Siyin Chin bible

Isaiah 65

¹TOPA in, “Keima in ka mite ii thu ngetnate zo tu in a kinging sa in om zo napi, amate in thu ngen ngawl uh hi. Amate ii hong mu thei tu in om zo napi, amate in zon tu zongh hong sawm bua uh hi. ‘Hi lai ah om khi hi; hong hu tu khi hi!’ ci in a zo paih tu in om nginge zo napi, ka mite in ka tungah thu hong ngen bua uh hi.

²A thinpui in a maan ngawl ngamta a, amate uuk bang po a ngamta ka mite saang tu in a kinging sa in ka om tawntung hi.

³Amate maizum maw in ka thin hong uuksak tan lai hi. Huan thiangthote sungah amate in doai biakpiakna te vawtin doai biaknataute tungah ngimnamtui hal uh hi.

⁴Zanin mithite ii thaate tungah thu dongh tu in suanghawng sung le thaan ah amate pai uh hi. Amate in voksa ne in doai biakpiakna in a nei, sa huanna satuite hawp uh hi.

⁵Tuaciang amate in midangte tungah, ‘Ko kung hong neak heak vun; ko sia no ii thuthaak tu in thiangtho leih khu hi!’ ci uh hi. Tuabang mihingte ka thuak zo bua hi — amate tungah ka thin uukna sia a mit ngeingawl meikuang khat taw kibang hi.

⁶“Amate daan piak tu in ka khensat zo a, amate ii thuak tute lai sungah kiciamtee zo hi. Amate ii sep sate ka en thong buatu a,

⁷amate ii mawnate le a taanghpupite ii mawnate hangin amate in ka thuaksak tu hi. Amate in doaibiakna mual tungah paaknamtui halin keima hong sonsia uh hi. Tua ahiciang amate ii ngamtatna sate taw kizui in a kilawm bangin daan ka pia tu hi,” ci hi.

⁸TOPA in, “Sapit nga phate kuama in susia ngawl hi; amate in sapittui in vawt zaw uh hi. Tuabangin ka mite a vekpi in ka susia siat buatu a — ka na a seamte ka ngum tu hi.

⁹Israel te sung panin Judah minamte thupha ka pia tu a, amate ii suan le paalte in ka mualtung ngam lua tu uh hi. Ka na a seam, ka tealsa mihingte tua ngam ah teang tu uh hi.

¹⁰Amate in kei hong bia tu uh a, a tuute le a khuite sia a tatna tu mun ahi, nitumna sangah a om Sharon Zaangtam le nisuana sangah a om Ngimna Kuam sungah paipui tu uh hi.

¹¹“Ahihang kei hong nusiate, ka mual thiangtho Zion a awlmawk ngawlte, kaam thu le kaam etna in a dok Gad le Meni pathiante a bia note atu in thutuam hi tu hi.

¹²Note kong sap ciang nong zo bua uh a, kong paupui ciang hong ngai ngawl na hi uh komin, thi ngamh in na thi tu uh hi. Ka thu nit ngawl tu le a sia vawt tu na teal uh hi.

¹³Tua ahikom keima hong bia in ka thu hong nite in neak tu dawn tu hau tu uh a, ahihang note in ngilkial dangtaak in na om tu uh hi, ci in kong son hi. Amate lungdam tu a, ahihang note na mai uh mawl tu hi.

¹⁴Amate lungdamin lasa tu uh a, no na hi uh le thin tamhtham in na kap tu uh hi.

¹⁵Ka tealsa mihingte in na min sia haamsiatna in zangh tu uh hi. Vaanglianpipa TOPA keima in nang kong thisak tu hi. Ahitazong ka thu hong nite min thak khat ka pia tu hi.

¹⁶Tua ngam sungah a om thupha a ngen pawpo in Thumaan Pathian ii thupha a piak tu in ngen tu uh hi. Kiciamna a la pawpo in Thumaan Pathian min taw kiciam tu uh hi. A bosa hunsung a ngimnate bomang tu a kimangil tu hi,” ci hi.

¹⁷TOPA in, “Keima in leithak le vantung thakte ka vawt hi. Nungsang hun a thupiangte kimangil siat tu hi.

¹⁸Ka bitphua sa sungah lungdam thinnuamin om tawntung vun. Ka vawtsa Jerusalem khuathak sia thinnopna taw kidim tu a, a mite lungdam tu uh hi.

¹⁹Jerusalem le a mite hu in keima mama thinnopna taw ka kidim tu hi. Tua munah kaana, hu kingetna om ngawl tu hi.

²⁰Nausente a sen in thi nawn ngawlin, mihing theampo in amate nuntak hun ciam vaal khanghaam in nungta tu uh hi. Kum zakhat bang a nungtate khangmoi in kingaisun tu hi. Tua maa in a thite sia keima in amate daan ka piak hunlam a kilakna lim khat hi tu hi.

²¹Mihingte in inn sa tu uh a, tua ii sungah amate ma teang tu uh hi — tua innte sia kuama dang in zangh ngawl tu hi. Amate in sapithuan vawtin a sapittui ne tu uh hi — midang in neaksak ngawl tu hi. Thingkungte bangin, ka mihingte khansau in nungta tu uh hi. Amate ii sep sa nate taw in lungdamin nuamsa tu uh hi.

²³A nasepna maapai tu a, a tate in tuasiatna thuak ngawl tu uh hi. Keima in amate le a suan a paalte hong pai tu hun sung theampo thupha ka pia tu hi.

²⁴Ka tungah thu hong ngetna sia a thunget tawp ma ngawngawn in ka zo tu hi.

²⁵Ngiate le tuunote an nekhawm tu hi; tawpite in khui anneak bangin, taangphaw ne tu a, ngulte sia kiitakhuai nawn ngawl tu hi. Ka mual thiangtho, Zion tungah liamna baina le siatna bangma om ngawl tu hi,” ci hi.