Read Siyin Chin Isaiah 7 Bible Online

Isaiah 7 - Siyin Chin bible

Isaiah 7

¹Jotham ii tapa, Uzziah ii tupa ahi, Ahaz kumpipa in Judah ngam a uk lai in ngal piang hi. Syria kumpipa Rezin le Israel te kumpipa Remaliah ii tapa Pekah in Jerusalem khua sim a, ahihang la zo ngawl hi.

²Syria ngalkap honte Israel ngamsung theng zo hi ci thu Judah kumpipa kung a thet ciang, ama le a mite theampo lausak mama ahikom, vui ii seam thingkungte bangin liing vadil uh hi.

³TOPA in Isaiah tungah, “Kumpipa Ahaz taw kimu tu in na tapa Shear Jashub paipui in. Ama sia puan khuite nasepna phual paina lampi tung, tuicing tungnung kung pan tui laakna luam tawpna ah mu tu nu hi.

⁴Ama kinging sa in a om khinkhian natu le a thin patau ngawl natu in son in. Kumpipa Rezin le ama ii Syria mite le Pekah kumpipa ii thin uukna te sia meikuang valiat thingkhua nii panin meikhu sia sangin lauhuai ngawl zaw hi.

⁵Syria sia Israel le a kumpipa taw a sia khat vawt tu tum hi.

⁶Amate in Judah ngam simin, amate sangah Judah mite a pawl natu in lausakin, Tabeel ii tapa kumpi tu in koi sawm uh hi.

⁷“Ahihang TOPA ahi, Keima in, hi thu piang ngeingawl tu hi, ci in ka thangsak hi:

⁸Banghang ziam? Syria sia a khuapi Damascus sangin thahat zaw ngawl a, Damascus sia Kumpipa Rezin sangin thahat zaw ngawl ahihang hi. Israel ngam ahile, ngam khat in a din zawk nawn ngawl natu in kum sawmluk le kum nga sungin kitamhtham dipdeap tu hi.

⁹Israel sia a khuapi Samaria sangin thahat zaw ngawl a, Samaria sia Pekah kumpipa sangin thahat zaw ngawl hi. “Na upna a kip buale nang na kip zo buatu hi,” ci hi.

¹⁰TOPA in Ahaz tungah thudang khat puak hi:

¹¹“Limlakna khat hong piak natu in, TOPA na Pathian tungah ngen in. Tuasia in a thukna mithi khua pan ahibuale a saangna vantung pan hi thei hi,” ci hi.

¹²Ahaz in, “Limlakna ngen ngawl tu khi hi. TOPA ze et nuam ngawl khi hi,” ci in zo hi.

¹³Isaiah in, “David kumpipa suan le paalte awng, tu in ngai vun. Mihingte na thin na veilaaksakna uh sia no atu in sia khop zo hi — Pathian zongh a thin vei la sak lai tu nu ziam?

¹⁴Tua ahile pha zo hi, TOPA ama mama in limlakna khat hong pia tu hi: ngaknu moi khat naungil om in tapa khat nei tu a, ama min ‘Immanuel’ ci in phuak tu hi.

¹⁵Ama thu in a sia a pha khen thei tu in hong let hun ciang, mihingte in khuinoai dawn in khuaitui ne tu hi.

¹⁶Tua hun hong thet ma ngawngawn in, note hong lausak kumpi niite ii ngamte kinusia cip tu hi.

¹⁷“Judah ngam pan Israel kumpi ngam a kikhen zawk a, a tung ngeingawl ngim ngana nite sia TOPA in nangma, na mite tung le kumpi innkuan bup tungah tungsak tu hi — ama in Assyria kumpipa hong puak tu hi.

¹⁸“Tua hun hong thet ciang Egypt te atu, Nile ngunnaak a khuala belna pan tho bangin hong pai natu le, Assyria te atu in amate ngam pan khuai bangin hong pai natu, a limlakna in, TOPA in phiit tum tu hi.

¹⁹Amate mualkawm, luamkawm, suanghawngte sungah hong pai tu a, lingkung sawlpaang kawm theampo le ngantatna mun theampo ah hong kiliim nitnut tu uh hi.

²⁰“Tua hun hong thet ciang, TOPA in sam meet pa khat — Assyria kumpilianpa! — sia Euphrates ngunngal khat pan sam tu a, ama in na khamulte, na sam le na pumpi tung mul teng meet tu hi.

²¹“Tua hun hong thet ciang, lothopa khat in khuila khat le keal nii bekma suatak zo ahitazong in,

²²tuate in noaitui tam mama pia tu a, ama kisap theampo nei siat tu hi. Hi hi, ngam sungah a taanglai, a nungta lai tawmno teng in a neak tu khuinoai le khuaitui nei tu uh hi.

²³“Tua hun a thet ciang, sapithuan pha mama, sapitkung tulkhat a om huan khat ciang, ngunn dangka tulkhat a mante sia lingkung le lingngui te in khannelh tu hi.

²⁴Mihingte in thal le thaltangte taw tua munah sa vai tu uh hi. Hi hi, a ngam bup sia lingkung le lingnguite taw kidim tu hi.

²⁵Khatvei lai a, ankung kiciinna mualte theampo sia lingte in po nelh siat tu a, tua munah kuama pai ngawl tu hi. Khui le tuute tatna mun hi tu hi,” ci in zo kik hi.