Read Siyin Chin Isaiah 9 Bible Online

Isaiah 9 - Siyin Chin bible

Isaiah 9

¹Amate hi bang ngimna hun sung pan a suatak natu lampi om ngawl tu hi. Zebulun minamte le Naphtali minamte teenna ngam sia minsiatna thuak ngei a, ahizong mai sangah hi ngam sia Mediterranean tuipi nisuana ngam sang pan kipan Jordan ngunngal khat dong le ngamdangmite teenna Galilee ngam ngawngawn dongin ngam thupi suak tu hi.

²Khuazing sung a vak mihingte in khuavak lian khat mu zo hi; Amate sia a limh zingna ngam khat ah teang uh a, ahizong tu in amate tungah khuavak taang hi.

³TOPA awng, nangma in amate lungdamna lian na pia zo hi; nangma in amate na lungdamsak zo hi. Amate in nangma sepsak sate sungah lungdam uh a, mihingte in an a laak ciangin ahibuale a vanh matte a hawm uh ciangin a lungdam bangma in lungdam uh hi.

⁴Banghang ziam cile, nangma in amate ii vanhngit puakna hakkol le amate ii liangko a saat, ciangkhut na thiaktan zo hi. Nidang lai a Midian ngalkaphonpi na zaw bangkeak ma in na mite nengcipin hong zothaw minam sia na zo zo hi.

⁵Ngalsim a hong kuan ngalkapte ii peangdapte le chi baang amate puante theampo sia mei taw kihal tu hi.

⁶Eite atu nausen khat hong suak hi! Ei atu tapa khat hong kipia hi! Tuaciang ama in eite hong ukpa hi tu hi. Ama sia, “Lamdang, Thu lakpa” “Vaanglian Pathian,” “Tawntung Pa,” “Kilemna Kumpi” kici tu hi.

⁷Ama ii kumpi vaangletna sia kizomin khang tawto tu a; ama ii kumpi ngam sungah kilemna a tawntungin om tu hi. Ama in David kumpipa ii za lai tu a, ama ii vaangletna in a maan le thukhaikim bulphu in tu pan kipan hun bo dongin uk tu hi. Vaanglianbelpa TOPA in hite theampo khensatin seam tu hi.

⁸TOPA in Israel kumpi ukna, Jacob suan le paalte tungah thukhenna pia zo hi.

⁹Israel mite theampo, Samaria khuapi sung a teang pawpo te in hi thu TOPA in vawt zo hi ci in he tu hi. Tu in amate kiphasak in kisathei uh hi. Amate in,

¹⁰“Uksuang innte pukcip zo hi, ahihang suanginn taw ka laih tu hi. Sycamore thing zawlsaute ki attan zo hi, ahihang a phabel cedar thing taw ka laih tu hi,” ci uh hi.

¹¹Amate sim tu in, TOPA in a ngalte hol hi.

¹²Nisuana sang pan Syria le nitumna sang pan Philistia in Israel valhtum tu in a kam uh kaa zo hi. Tuabangza ngawngawn zongin TOPA thin uukna thaisak zo ngawl a; daan pia tu in a khut vaan lai hi.

¹³Israel mihingte kisiik kik ngawl hi; Vaanglianbelpa TOPA in amate daan a piak zawk ngawngawn zongin, TOPA kung zuan kik tuan ngawl uh hi.

¹⁴Ni khat sungin TOPA in Israel lampuite le a mihingte daan pia tu a; a lu le a mei saattan tu hi.

¹⁵A khanghaam le a zatak huai pasalte sia a lu hi a — leilot thu a hil kamsaangte sia a mei ahi hi!

¹⁶Hi mihingte lampuite in amate lamkhialsak a, lungmang bikbeksak hi.

¹⁷Tua ahiciang TOPA in tangvalte khat zongh suaktasak ngawl tu a, meingongte le tangate khat zongh hesuak ngawl tu hi, banghang ziam cile mihing theampo in Pathian sel a, seksol in kamsia nawno pau uh hi. Tua hang zongin TOPA thin uukna thai zo ngawl a, daan pia tu in a khut kivaan lai tu hi.

¹⁸Mihingte ii seksolna in lingkungte le a mulnei lingkungte a kaanghtumsak mei bangin kuang hi. Meikhu lomtangh a piangsak ngamkaang bangin kuang hi.

¹⁹Vaanglianbelpa TOPA thin uukna hangin ama ii daan piakna sia ngam le lei ah meikuang taw hal bangin mihingte lalsak hi, kuama po in ama atu bek ngaisun hi.

²⁰Ngamsung koima po ah, mihingte in a zontawm, a mutawm an bekno khat pawpo ne a, ahihang a ngil uh va ngeingawl hi. Amate in a tate ii sa ngawngawn ne uh hi!

²¹Manasseh mihingte le Ephraim mihingte khat le khat kisim a, tuaciang amate in Judah sim khawm uh hi. Tuabangza ngawngawn zongin TOPA thin uukna thaisak zo ngawlin; daan pia tu in a khut kivavaan lai hi.