Read Siyin Chin Thiampite 1 Bible Online

Thiampite 1 - Siyin Chin bible

Thiampite 1

¹TOPA ompuina Puanbuk sung pan TOPA in Moses sam a,

²Israel te ii biakpiakna a nei ciang a zui tu in a nuai a ngeinate pia hi. Mihing khat pawpo in nganhing taw biakpiakna a nei ciang, a khuihon ahibuale, a tuuhon ahibuale a kealhonte sung pan khat pia tu hi.

³A khuihonte sung pan khat taw meihal biakpiakna a pia ahile, a mealhem ngawl khuital khat hi tu hi. TOPA ii a saan natu in TOPA ompuina Puanbuk kongbiang ah pia tu hi.

⁴Ama in khuital lu tungah a khut nga tu a, tuasia ama mawphel natu biakpiakna in kisaang tu hi.

⁵Tualai ah ama in tua khuital ngo tu a, Aaron suan thiampite in khuital chi sia TOPA tungah a piak zawkciang Puanbuk kongbiang ah a om biaknatau pangh li ah a chi the tu hi.

⁶Tua zawkciang ama in a vun hoai in a sa sem tu a,

⁷thiampite in biaknatau tungah thing seng in mei taw tu hi.

⁸Amate in a kisemsa sabak teng, a lu le a thau taw mei tungah koi tu hi.

⁹Ama in a sungkua le a nungpeangte nii, sil tu a vaipuak nei thiampipa in sa teng biaknatau ah hal tu hi. Tua an taw biakpiakna ii ngimnam sia in TOPA lungkimsak hi.

¹⁰Mihing khat in a tuu ahibuale a kealte sung pan khat taw biakpiakna a nei le, a mealhem ngawl a tal khat hi tu hi.

¹¹Ama in biaknatau saksang ah tuasia ngo tu a, biaknatau pangh li ah thiampite in a chi the tu hi.

¹²A sa a sem zawkciang thiampipa in a sa teng mei tungah koi tu a, a lu le a thau zongh kihel tu hi.

¹³Ama in a sungkua le a nungpeangte nii sil tu a, thiampipa in TOPA tungah biakpiaknate pia in biaknatau tungah hal tu hi. Tua an taw biakpiakna ngimnam in TOPA lungkimsak hi.

¹⁴Mi khat in vacim khat taw meihal biakpiakna a pia le, ngam vakhu khat ahi buale, inn vakhu khat hi tu hi.

¹⁵Thiampipa in tua biakpiakna sia biaknatau ah paipui tu a, a ngawng meaktan in, biaknatau tungah a lu hal tu hi. Biaknatau pangh ah a chi taaksak tu hi.

¹⁶A longtawl le a tawl sungah a om teng la tu a, vut koina, biaknatau ii nisuana sangah vawk tu hi.

¹⁷Ama in a thate nii pan len tu a, a thate tatsak ngawlin a pum balkeak tu a, biaknatau tungah a pum bup hal tu hi. Tua an taw biakpiakna ii ngimnam in TOPA lungkimsak hi.