Read Siyin Chin Thiampite 12 Bible Online

Thiampite 12 - Siyin Chin bible

Thiampite 12

¹TOPA in Moses tungah Israel mite atu in,

²zui tu a nuai a ngeinate pia hi. Numei khat in tha sim nin a nei hunsung bangma in tapa khat a nei zawk ni sali sung sia biakna taw kisai in thiangtho ngawl hi.

³Ni liat ni in a tapa vunteap ki at tu hi.

⁴Tuaciang numei in a chi luanna pan biakna taw kisai in a thiantho dong ni sawmthum le ni thum sung ngak tu hi. Ama in a kithiansuana hun a cin mateng a thiangtho na khat zongh tham thei ngawl tu a, a thiangtho Puanbuk sungah tum ngawl het tu hi.

⁵Numei khat in tha sim nin a nei hunsung bangma in tanu khat a nei zawk ni sawm le ni li sung biakna taw kisai in thiangtho ngawl hi. Tuaciang a chi luanna pan biakna taw kisai in a thian natu in ni sawmluk le ni luk ngei lai tu hi.

⁶Tapa ahizong tanu ahizong nei in a thiansua na hun a cin zawkciang, ama in TOPA ompuina Puanbuk kongbiang ah a om thiampipa tungah meihal biakpiak natu in kum khat a pha tuuno khat le mawphel biakpiak natu in inn vakhu ahibuale ngam vakhu khat paipui tu hi.

⁷Thiampipa in TOPA tungah tua nu ii a zeksa biakpiakna piaksak tu a, ama thiantho ngawlna teng thiansuana in a zeksa teng vawtsak a, tuaciang ama biakna taw kisai in thiangtho tu hi. Hi thu in numei khat ii a naunei zawkciang a zui hamtang tu ahi hi.

⁸Numeinu in tuuno khat a nei zo bua ahile inn vakhu nii ahibuale ngam vakhu nii, meihal biakpiak natu in khat, mawphel biakpiak natu in a dang khat paipui tu a, tuaciang thiampipa in tua nu a thiantho ngawlna pan a thiansua tu in a zeksa teng vawtsak tu a, tuaciang ama biakna taw kisai in thiangtho tu hi.