Read Siyin Chin Thiampite 13 Bible Online

Thiampite 13 - Siyin Chin bible

Thiampite 13

¹TOPA in Moses le Aaron tungah hi thukhamte pia hi.

²Mihing khat pawpo in a vun tungah, a lauhuai vun natna dong a suak thei tu meima khat ahibuale uilut khat ahibuale a tum thei meima khat a nei le, ama sia Aaron suan thiampite kungah kipaipui tu hi.

³Thiampipa in a meima etsak tu a, a meima sung multe kaangin a meima kiimkot sangin a sa a dum zaw le tua meima sia a lauhuai vun natna hi a, thiampipa in tua pa a nin in thangsak tu hi.

⁴Ahizong tua meima kaangin, a kiimkot zongh dum zaw ngawl a, a multe zongh a kaang buale thiampipa in tua pa ni sali sung koituam tu hi.

⁵Thiampipa in ni sali ni in en kik tu a, a meimate beak ngawlin, kibang lai in, a ngaisun le a dang ni sali sung ma koituam lai tu hi.

⁶Thiampipa in ni sali ni in en kik tu a, a meima thipin tuasia a beak buale ama sia biakna taw kisai in thiangtho hi ci in thangsak tu hi; tuasia meima thawthong bek hi. Tua pa in a puante sawp tu a, biakna taw kisai in a thiang hi tu hi.

⁷Ahizong thiampipa in en a, thiang hi ci in a thansak zawkciang a meima a beak le thiampipa kungah kilak kik hamtang tu hi.

⁸Thiampipa in en kik tu a, a meima a beak le ama sia a thiang ngawlin thangsak tu hi. Tua in a lauhuai vun natna ahi hi.

⁹Mihing khat pawpo in a lauhuai vun natna a nei le tua pa thiampipa kungah kipaipui tu a,

¹⁰thiampipa in en tu hi. A vun tungah meima kaang khat om in, a multe kaang a, a nai a dim le,

¹¹tua meima sia a dam thei ngawl vun natna ahi hi. Thiampipa in tua pa a thiangtho ngawlin thangsak tu a, a thiang ngawl a kimusa hi zo ahikom koituam kul ngawl hi.

¹²Tua vun natna beakin a lu pan a peang dong a theng le,

¹³thiampipa in en kik tu hi. A pumpi tung bup beak zo in a mu le thiampipa in biakna taw kisai in a thiang in thangsak tu hi. A vun theampo hong kaang ahile ama sia biakna taw kisai in a thiang ahi hi.

¹⁴Ahizong a meima balh a kimu po ciang ama sia a thiang ngawl ahi hi.

¹⁵Thiampipa in en kik tu a, a meima a balhin a mu le a thiang ngawlin thangsak tu hi. A meima balh sia vun natna cinopna hi a, tua pa sia a thiang ngawl ahi hi.

¹⁶Ahizong a meima damin a kaan kik ciang, thiampipa kungah tua pa pai tu a,

¹⁷thiampipa in en kik tu hi, tua meima a kaang zo le, a ma biakna taw kisai in a thiang hi a, thiampipa in a thiangin thangsak tu hi.

¹⁸Uilut vei khat a dam zawkciang,

¹⁹a ma santak kang in ahibuale a san le a kang kithua in, hong tum le thiampipa tungah kilak tu hi.

²⁰Thiampipa in en tu a, tua a tum sia, a kiim a vunte sang dum zaw in a sungah a multe a kaang le, thiampipa in ama sia a thiang ngawlin thangsak tu hi. Tuasia in uilut pan a kipan a lauhuai vun natna ahi hi.

²¹Ahizong thiampipa in en in a sung a, a multe kaang ngawlin, a kiim a vunte sangin a dum zaw tuan bua a, ahizong daang pian in a mu le thiampipa in ama ni sali sung koituam tu hi.

²²A meima a beak le thiampipa in ama a thiang ngawlin thangsak tu a; ama sia vun natna vei ahi hi.

²³Ahizong a meima a ngei bangma hi in a beak tuan buale uilut mapawn hi lel a, thiampipa in ama biakna taw kisai a thiangin thangsak tu hi.

²⁴Mihing khat pawpo mei in kaanghin, a sa kaang in ahibuale a san le a kaang a kithua le,

²⁵thiampipa in en tu hi. A meima sung multe kaangin, a kiim a vunte sangin a dum zaw le, mei kakna pan a kipan a lauhuai vun natna hi a, thiampipa in tua pa a thiang ngawlin thangsak tu hi.

²⁶Ahizong a meima santak multe kaang ngawlin, a kiim vunte sangin dumzaw tuan ngawl a, ahizong a daang pian le thiampipa in ama ni sali sung koituam tu hi.

²⁷Ni sali ni in thiampipa in ama en kik tu a, a meima a beak le vun natna ahikom thiampipa in a thiang ngawlin thangsak tu hi.

²⁸Ahizong a meima beak ngawlin, kilamdang tuan ngawl a, a daang pian bek ahile a lauhuai vun natna hi ngawl hi. Mei kakna mapawn khat bek ahikom thiampipa in biakna taw kisai in a thiangin thangsak tu hi.

²⁹Pa ahizong numei ahizong a lu tung ahibuale a kha ah meima a nei ciang,

³⁰thiampipa in en tu hi. A kiim a, a vunte sangin dum zaw in, a sung a multe engin a mal a no le, tua in a lauhuai vun natna hi a, thiampipa in a thiang ngawlin thangsak tu hi.

³¹Thiampipa in a et ciang a kiim a, a vunte sangin a meima dum zaw tuan ngawlin, ahizong ama sung a multe mul dang taw a kibang buale, thiampipa in ama ni sali sung koituam tu hi.

³²Thiampipa in ni sali ni in a meima en kik tu a, beak zaw ngawl, a sungah mul eng om ngawlin, a kiim a vunte sangin a dum zaw tuan buale,

³³tua pa in a meima kiim simngawl teng, a sam le a mul meet tu hi. Thiampipa in ama ni sali sung koituam tu hi.

³⁴Ni sali ni in thiampipa in a meima en kik tu a, a meima beak ngawlin a kiim a vunte sang a dum zaw tuan buale thiampipa in ama biakna taw kisai a thiangin thangsak hi tu hi. Tua pa in a puante sawp tu a, ama a thiangtho tu hi.

³⁵Ahizong a thiang in a thansak zawkciang a meima a beak le,

³⁶thiampipa in en kik tu hi. A meima a beak le, a mul engte et kul nawn ngawl a; tua pa a thiang ngawl ahi hi.

³⁷Ahizong thiampipa in a meima beak ngawlin, a sung a multe ciidam in po a, a meima a damin a ngaisun le thiampipa in ama biakna taw kisai a thiangin thangsak tu hi.

³⁸Pa ahizong numei ahizong a vun tungah a kaangpawlte a om le,

³⁹thiampipa in en tu hi. Tua munte a kaang philphel ahile, vun mealhem natu bekin a piang hi a; tua pa biakna taw kisai in a thiang ahi hi.

⁴⁰Mihing khat a nung sam ahizong, a maisam ahizong a pul hangin tua in ninsak ngawl hi.

⁴¹

⁴²Ahizong a lu kolhna ah a san le a kaang a kithua meima a piang le, tua in a lauhuai vun natna ahi hi.

⁴³Thiampipa in en tu a, a san le a kaang kithua meima a om le,

⁴⁴a lu tungah a lauhuai vun natna vei ahikom thiampipa in ama a thiang ngawlin thangsak tu hi.

⁴⁵A lauhuai vun natna a veipa in puan ek silh tu a, a sam pot ngawlin, a mai nuaisang teng seal a, “A thiang ngawl, a thiang ngawl ka hi hi!” ci in au tu hi.

⁴⁶Tua natna a vei hun sung a thiang ngawl hi a, midangte taw a kikhualana ngiaphual pua sangah teang tu hi.

⁴⁷Samul ahibuale puanneal puansilh tungah,

⁴⁸puanneal puanbek, ahibuale samul puan, ahibuale savun, ahibuale savun taw kivawt khat pawpo tungah a pawl a om ciang, [2]

⁴⁹a hing ahibuale a sanin a beak le thiampipa tung lak tu hi.

⁵⁰Thiampipa in en tu a, tua puan ni sali sung koituam tu hi.

⁵¹Thiampipa in ni sali ni ciang en kik tu a, tua a pawl sia a beak le, tua puan a nin ahi hi.

⁵²Thiampipa in hal tu hi, banghang ziam cile a beak thei ahikom mei taw haltum tu ahi hi.

⁵³Ahizong ama in a ettel ciang, a pawl sia puan tungah kizel ngawlin a mu le,

⁵⁴ama in tua puan a sawp natu le a dang ni sali sung a koituam natu in thupia tu hi.

⁵⁵Tuaciang ama in en tu a, tua a pawl na ii a pianzia a kilaih buale a kizel bua zong nin veve hi; a pawl te omna mun a nung ahizong a mai ahizong mei taw hal tu hi.

⁵⁶Ahizong thiampipa in a et ciang a pawl teng a bo zo le, tua puan ahibuale savun sia tua san tak teng eaukeak tu hi.

⁵⁷Tua zawkciang a pawl te hong piangkik in a kizel kik le a neipa in tua sia hal tu hi.

⁵⁸Ama in tua na sia silthiang in a pawlte a bo le, ama in tuasia silthiang kik tu a, biakna taw kisai in a thiang hi tu hi.

⁵⁹Hisia in samul ahibuale puanneal ahibuale samul puan, savun taw kivawt na khat pawpo tungah a om a pawlte taw kisai zui tu thukham ahi hi; hisia in biakna taw kisai a thiang le a thiang ngawl khensatna daan ahi hi.