Read Siyin Chin Thiampite 14 Bible Online

Thiampite 14 - Siyin Chin bible

Thiampite 14

¹TOPA in a lauhuai vun natna pan a dam mihing khat a zeksa thiansua natu in,

²a nuai a zui tu ngeinate Moses tungah pia hi. Ama a thiang hi ci in a kithansak tu ni in, thiampipa kungah kipaipui tu a,

³thiampipa in ngiaphual pua sangah ama paipui in en tu hi.

⁴A natna a dam le, thiampipa in biakna taw kisai a thiang vacim nii sia cedar thing, khausan, hyssop meangte taw a kipaipui khop natu in thupia tu hi.

⁵Tuaciang thiampipa in vacimte khat ciktui thiang a kidim leibeal khat tungah a thalup natu in thupia tu hi.

⁶Ama in vacim dang khat sia la in a kithat vacim ii chi sungah cedar thing, khausan le hyssop taw, pap khawm tu hi.

⁷Ama in vun natna vei a kithiansua tu pa ii tungah salivei a chi the tu a, tua zawkciang ama thiang hi ci in thiampipa in thangsak tu hi. A nungta vacim sia dui sungah leangsak tu hi.

⁸Tua pa in a puan sawp tu a, a multe theampo meetin kibual tu a, tua zawkciang ama biakna taw kisai in a thiang hi tu hi. Ama ngiaphual sung tum thei tu ahihang, buk pua sangah ama ni sali sung a teen kul tu hi.

⁹Ni sali ni in ama in a sam, a khamul, a mitmul le a taanglai a pum tung mul teng theampo meet kik siat tu a; a puante silthiang in kibual tu a, tuaciang ama biakna taw kisai in a thiang hi tu hi.

¹⁰A ni liat ni in kum khat a pha, a mealhem ngawl tuutalno nii le tuu anu khat olive thau taw kihel anvui kilogramme thum le olive thau litre khat ii khenthum sua khenkhat, ama in paipui tu hi.

¹¹Thiampipa in tua pa le biakpiaknate TOPA ompuina Puanbuk kongbiang ah paipui tu hi.

¹²Tuaciang thiampipa in sathau litre khat ii khenthum sua khenkhat taw tuutal note khat khialphel biakpiakna in pia tu hi. Ama in thiampipa atu in tua te TOPA tungah a tuam vilvel letsong in pia tu hi.

¹³Ama in mawphel biakpiak natu le meihal biakpiak natu in nganhing kingawna mun, a thiangthona munah tuuno ngo tu hi. Ama in hi bangin vawt tu hi, banghang ziam cile khialphel biakpiakna sia mawphel biakpiakna taw kibangin thiampipa ii neisa hi a, thiangtho mama hi.

¹⁴Thiampipa in tuuno chi tawm la in, biakna taw kisai a kithiansua pa ii a ziatsang bildawn, a ziatsang khutpi dawn le a ziatsang peangpi dawn noisak tu hi.

¹⁵Thiampipa in olive thau tawm la in a veisang khutpheak sungah sung tu a,

¹⁶a ziatsang khutme khat a sungah papin, TOPA ompuina tualai ah tua sathau pawlkhat salivei the tu hi.

¹⁷Ama in a khutpheak sung a om sathau tawm le tuuno chi tawm la in biakna taw kisai thiang hi, ci in a kithangsak tu pa ii a ziatsang bildawn, a ziatsang khutpi, a ziatsang peangpi tungah noai tu hi.

¹⁸A khutpheak sungah a taanglai sathaute tua pa lu tungah thisak tu hi. Tuabangin thiampipa in a zeksa thiansuana vawt tu hi.

¹⁹Tuaciang thiampipa in mawphel biakpiakna pia in a zeksa thiansuana vawt tu hi. Tuasia zawkciang ama in meihal biakpiak natu in ngan ngo tu a,

²⁰antang biakpiakna taw biaknatau tungah pia tu hi. Hi bangin thiampipa in a zeksa thiansuana vawt tu a, tua pa biakna taw kisai in thiang tu hi.

²¹Tua pa zawngin a dang bangma a pia zo buale a kithiansua natu bekin, tuutal khat khialphel biakpiak natu, thiampipa atu in TOPA tungah a tuam vilvel letsongin pia tu hi. Ama in antang biakpiak natu in olive thau taw a kihel anvui kilogramme khat le olive thau litre khat ii khenthum sua khenkhat paipui tu hi.

²²Ama in inn vakhu nii ahibuale ngam vakhu nii zongh keng tu a, mawmai biakpiak natu in khat, le meihal biakpiak natu in khat hi tu hi.

²³A kithiansua zawk ni liat ni in, Puanbuk kongbiang ah a om thiampipa kungah tuate paipui tu hi.

²⁴Thiampipa in tuu le olive thau keng tu a, thiampipa atu in TOPA tungah a tuam vilvel letsongin pia tu hi.

²⁵Ama in tuu ngo tu a, a chisan tawm la in tua pa ii ziatsang bildawn, a ziatsang khutpi tung le ziatsang peangpi tungah noai tu hi.

²⁶Thiampipa in a veisang khutpheak tungah sathau tawm sung tu a,

²⁷a ziatsang khutme taw TOPA ompuina tualai ah tua sathau pawlkhat salivei the tu hi.

²⁸Ama in chisan a noina mun tengma ahi, a ziatsang bildawn, a ziatsang khutpi tung le a ziatsang peangpi tungah sathau tawm noai tu hi.

²⁹A khutpheak sungah a taanglai sathau teng sia tua pa lu tungah thisak tu a, hi bangin a zeksa thiansuana vawt tu hi.

³⁰Tuaciang ama in inn vakhu khat ahibuale ngam vakhu khat sia,

³¹mawphel biakpiakna in pia tu a, a dang khat sia meihal biakpiakna in antang biakpiakna taw pia tu hi. Hi bangin thiampipa in a zeksa thiansuana vawt tu hi.

³²Hisia in a kiitakhuai vun natna vei a ahihang ama kithiansua natu in a kisamh biakpiaknate a pia zo ngawl sia ii zui tu thukham ahi hi.

³³TOPA in Moses le Aaron tungah,

³⁴inn sungah cipawl natna kizel in a om ciang a nuai a zui tu ngeinate pia hi. (Hite sia Israel mite ii lua tu in TOPA ii a piak tu Canaan ngamsung a tum zawkciang a zak tu ngeinate ahi hi.) TOPA in a inn sungah cipawl natna puak hi ci in mihing khat pawpo in a mu le pai in thiampipa tungah son nanak tu hi.

³⁵

³⁶Thiampipa in cipawlnatna en tu a pai ma in inn sung vanh theampo a pusua natu in thupia tu a; tua ahibuale inn sung vanh teng thiang ngawl hi, ci tu hi. Tuaciang ama sia inn ah pai tu a,

³⁷cipawl natna sittel tu hi. Tuate in ahingpian ahibuale a sanpawl hi a, innpang a nesuk tu bang ahile,

³⁸tua inn sia ni sali sung tawkalh cip in ama in nusia tu hi.

³⁹Ni sali ni ciang ama heak kikin sittel kik tu hi. Tua cipawl natna a beak le,

⁴⁰tua cipawl natna a baanna suangte la in khuapi puasang a ninna munah a vawk natu in thiampipa in thupia tu hi.

⁴¹Tua zawkciang ama in pang sungsang belna teng kiatsak tu a, a kiatna vuite khuapi pua sang a ninna ah vawksak tu hi.

⁴²Tuaciang tua suangte a kilaakna munah suang dangte koi kik tu a, a zutna thak taw zut kik tu hi.

⁴³Suangte la in pangte kiat a, za a zut kik zawkciang cipawl natna tua inn sungah hong om kik veve le,

⁴⁴thiampipa in pai in en tu hi. Tua cipawl natna a kizel ahile tua inn a thiang ngawl ahi hi.

⁴⁵Tua inn phel tu a, a suangte, a thingte le a zutnate khua puasang a ninna munah vawk tu hi.

⁴⁶Tua inn sia taw a kikalh laitakin a sungah a tum khat pawpo sia nitak dong a thiang ngawl hi tu hi.

⁴⁷Hi inn sungah a lum ahibuale an a ne sia in ama puante sawpthiang tu hi.

⁴⁸Thiampipa in inn sia za a kizut zawk in a et ciang cipawl natna a om kik nawn buale, cipawl natna bo thiang zo ahikom ama in biakna taw kisai a thiang inn ci in thangsak tu hi.

⁴⁹Inn thiansua natu in ama in vacim nii, cedar thing tawm, khausan le hyssop baakno meang khat paipui tu hi.

⁵⁰Ama in cik tuithiang koina leibeal tungah vacimte khat ngo tu hi.

⁵¹Tuaciang ama in cedar thing, hyssop, khausan le a nungta vacim paipui in, a kithat vacim chi sung le tuithiang sungah pap tu hi. Tuaciang ama in tua inn salivei the tu hi.

⁵²Hi bangin vacim chi, tuithiang, a nungta vacim, cedar thing, hyssop le khausante taw ama in inn thiansua tu hi.

⁵³Tuaciang ama in a nungta vacim sia khuapi puasang dui sungah leangsak tu hi. Hi bangin ama in a zeksa inn thiansuana vawt tu a, biakna taw kisai in inn thiang hi tu hi.

⁵⁴Hiteng sia a kiitakhuai vun natnate;

⁵⁵meimate, uilutte ahibuale a tum meimate, le puan tung ahibuale inn sungah cipawl natnate taw kisai zui tu thukhamte ahi hi.

⁵⁶

⁵⁷Hi thukhamte in na khat sia thiang ziam thiang ngawl ziam khensat hi.