Read Siyin Chin Thiampite 16 Bible Online

Thiampite 16 - Siyin Chin bible

Thiampite 16

¹TOPA tungah a thiangtho ngawl mei taw biakpiakna a piak ciang a kithat Aaron tapate nii thi zawkciang TOPA in Moses paupui hi.

²Ama in, “Thiangtho Bel Mun sung puankhai ii nungah a hun lian ciang a tum natu in na suapuipa Aaron son in, banghang ziam cile tua mun sia Thuciamna Thingkuang sitna tung meei sungah ka kilaakna mun ahi hi. Tua thu a ni buale ama kithatlum tu hi.

³Ama mawphel biakpiakna in khuitalno khat le meihal biakpiakna in tuutal khat a paipui zawkciang bek in Thiangtho Bel Mun ah tum thei tu hi,” ci hi.

⁴Tuaciang TOPA in a nuai a zui tu ngeinate pia hi. Aaron, Thiangtho Bel Mun ah a pai ma in kibual nanak tu a, thiampi puante: puanneal puantual silhin, ngoaipuan tom teang tu a, kawngkhau sawm in dial khim tu hi.

⁵Israel taangpite in mawphel biakpiak natu in kealtal nii le meihal biakpiak natu in tuutal khat Aaron tungah pia tu hi.

⁶Aaron in ama mawna le a innkuanpuite mawna a mai natu in khuital khat sangaw biakpiakna in pia tu hi.

⁷Tuaciang ama in TOPA ompuina Puanbuk kongbiang ah keal nii paipui tu hi.

⁸Tualai ah, “TOPA atu” ci a, a kiciamtee suang khat le “Azazel atu” ci in a kiciamtee suang dang khat, suang nii zanghin ama in lai meetang sawk tu hi.

⁹TOPA atu in meetang taw a teal kealtal khat sia Aaron in mawphel biakpiakna in pia tu hi.

¹⁰Azazel atu a kiteal keal sia a nungta in TOPA tungah pia tu a, mipite mawmai natu in sennealngamsung Azazel kungah paisak tu hi.

¹¹Aaron in ama le a innkuanpuite atu mawphel biakpiakna in khuital a piak ciang,

¹²ama in biaknatau pan meikam kuang khat dim le ngimnamtui phate khutdim nii la tu a, Mun Thiangtho Bel ah paipui tu hi.

¹³Tualai TOPA ompuina munah ama in ngimnamtui sia mei tungah koi tu a, a khu in Thuciamna Thingkuang sitna sia seal tu hi, tua hile ama in tuasia mu ngawl tu a, thi ngawl tu hi.

¹⁴Ama in khuital chi tawm la tu a, a khutme taw a sitna mai teng the in, tuaciang Thuciamna Thingkuang mai teng salivei the tu hi.

¹⁵Tua zawkciang, ama in mipite mawphel biakpiakna in kealtal ngo tu a, Thiangtho Bel Mun ah a chi paipui in khuital chi a the bangma, a sitna tung le Thuciamna Thingkuang mai teng the tu hi.

¹⁶Tuabangin Israel mite ii thiantho ngawlna le mawna theampo ii nitsakna panin Thiang Bel Mun sia a zeksa thiansuana vawt tu hi. Biakna taw kisai in a thiang ngawl ngiaphual laizang ah tua Puanbuk om ahikom Aaron in Puanbuk sia tuabangin a thiansua kul tu hi.

¹⁷Thiangtho Bel Mun ah a zeksa thiansuana vawt tu in Aaron a tum pan kipan a pusua kik dong, Puanbuk sungah kuama om ngawl tu hi. Ama atu, a innkuanpuite atu le Israel taangpi bup atu a zeksa teng a vawt zawkciang,

¹⁸meihal biakpiakna pia tu le biaknatau thiansua tu in biaknatau ah ama pai tu hi. Ama in khuital chi tawm le keal chi tawm la in biaknatau king a dokna teng noai tu hi.

¹⁹Ama in a khutme taw sachi pawlkhat biaknatau tung salivei the tu hi. Hi bangin ama in tua biaknatau Israel mite mawna pan thiansua in, thiangthosak tu ahi hi.

²⁰Aaron in Thiangtho Bel Mun le TOPA ompuina Puanbuk sung mundang teng le biaknatau atu in a zeksa thiansuana a vawt zawkciang, Azazel atu in a kiteal keal nungta lai sia TOPA tungah pia tu hi.

²¹Ama in tua keal lu tungah a khutte nii nga tu a, Israel mite siatna, mawna le leedona teng theampo pualaak in, tuabangin keal lu tungah suan siat tu hi. Tua zawkciang tua keal sia tuabang a seam tu, a kisep pa in sennealngam sungah beng tu hi.

²²Tua keal in kuama teen ngawlna ngam sungah amate mawna theampo pua in paipui tu hi.

²³Tuaciang Puanbuk sungah Aaron tum tu a, Thiangtho Bel Mun sung a tum ma in a silh thiampi puan teng suutin tua munah nusia tu hi.

²⁴Ama in mun thiangtho ah kibual tu a, ama puante silh tu hi. Tua zawkciang pusuak in ama mawna le mite mawna teng a mai natu in meihal biakpiakna pia tu hi.

²⁵Ama in mawphel biakpiak natu in nganthau sia biaknatau tungah hal tu hi.

²⁶Sennealngam sung Azazel kungah keal a beng pa in ngiaphual ah hong cia kik ma in a puante sawp in kibual nanak tu hi.

²⁷Mawphel biakpiak natu in a kizangh khuital le keal ii chi, mawmai natu in Thiangtho Bel Munah a kipaipui sia ngiaphual pua sangah paipui in kihal tu hi. A vun, a sa le a ngilzangte theampo kihal tu hi.

²⁸A hal pa ngiaphual hong heak kik ma in a puante sawp in kibual nanak tu hi.

²⁹A nuai a ngeinate maisang hun theampo ah zui tu ahi hi. A tha salina, ni sawm ni in Israel te le a teen khoppui ngamdangmite in an tang tu a, na seam ngawl het tu hi.

³⁰Tua ni in biakna taw kisai in a thian natu in amate mawna theampo a thiansua tu in a zeksa teng vawt tu hi.

³¹Tua ni sia a thiangtho mama ni khat hi tu a, tua ni in an tang tu a, na seam ngawl tu hi. Hi ngeinate maisang hun theampo ah zui tu ahi hi.

³²A pa za a laih tu in thupha piak kipsakna a vawtsak sa le a ki aap sa, Thiampi Lianbelpa in a zeksa thiansuana vawt tu hi. Ama in thiampi puante silh tu a,

³³Thiangthobel Mun TOPA ii ompuina Puanbuk a taanglai teng, biaknatau, thiampite le taangpi taangta theampo, thiansua natu in a zeksa teng vawt tu hi.

³⁴Hi ngeinate maisang hun theampo ah zui tu ahi hi. Israel mite mawna theampo thiansua natu in hi zeksa ngeina sia kum khat in khatvei kivawt hamtang tu hi. Tuabangin Moses in TOPA thupiak bangin seam hi.