Read Siyin Chin Thiampite 18 Bible Online

Thiampite 18 - Siyin Chin bible

Thiampite 18

²Israel mite a sonsawn tu in Moses tungah, “Keima in TOPA na Pathian ka hi hi,

³Na om ngeina uh Egypt mite omziate ahizong ahibuale tu in note kong paipuina Canaan ngamsung a teang mihingte ii omziate ahizong zui heak vun.

⁴Ka thukhamte zui in kong thupiakte seam vun. Keima in TOPA noma Pathian ka hi hi.

⁵Sep tu kong sawl te seam vun a, kong piak thukhamte zui vun; tuabang na hina uh taw na nuntakna na hu tu uh hi. Keima in TOPA ka hi hi,” ci hi.

⁶TOPA in a nuai a zui tu ngeinate pia hi. Na mealheakte khat pawpo taw omkhop khialna vawt heak vun.

⁷Na nu taw numei le pa khialna vawtin na pa maizum pia heak in. Na nu maimawlsak heak in.

⁸Na pa zino dangte khat pawpo taw numei le pa khialna vawtin na pa maizum pia heak in.

⁹Inn khat sungah khangkhawm na hi uh zong, na hi bua uh zong, na suapuinu ahibuale na suapuisealnu taw numei le pa khialna vawt heak in.

¹⁰Na tunu taw numei le pa khialna vawt heak in; na maizum natu hi tu hi.

¹¹Na suapuisealnu taw numei le pa khialna vawt heak vun, ama zongh na suapuinu ma ahi hi.

¹²Na pa suapuinu ahibuale na nu suapuinu taw omkhop khialna vawt heak in.

¹⁴Na pa suapuipa ii zi khialpui heak in; ama zongh na nu khat ma ahi hi.

¹⁵Na tapa zi khialpui heak in.

¹⁶Na suapuipa zi khialpui heak in.

¹⁷Na khialpui nu ii tanu ahibuale a tunu khialpui heak in; na mealheakte ma hi a, chi kinai omkhop khialna ahi hi.

¹⁸Na zi nuntak laiteng na zi tu in na nuphal nu la heak in.

¹⁹Numei khat nin a nei laitak omkhoppui heak in, banghang ziam cile ama biakna taw kisai in thiang ngawl hi.

²⁰Ngual zi khialpui heak in; na khialpui le biakna taw kisai in hong ninsak tu hi.

²¹Molech pathian biakna ah zak tu in na tate khat zongh pia heak in, banghang ziam cile tua in TOPA ahi Pathian ii min daisak tu hi.

²²Pa le pa omkhop khialna vawt heak in; Pathian in ngaimaw hi.

²³Pa ahizong numei ahizong kuama in nganhing taw omkhop khialna vawt heak hen; tuabang khialna in biakna taw kisai in no hong ninsak hi.

²⁴Hi ngamtatnate taw a thiang ngawl kisua tawm heak vun, hi ngam na thet ma a, a teangsa doai biate in hi bangin amate kininsak ahikom noma tum thei natu in TOPA in bengkeak hi.

²⁵Amate ngamtatna in ngam le lei ninsak ahikom TOPA in leitang daan pia in tualai ah a teang mite leitang in nialsak hi.

²⁶Amate in hi bang a kiihuainate taw a leitang ninsak uh a, ahizong note tuabang na hi bua het tu uh hi. Note theampo, Israel te ahibuale no taw teang khawm ngamdangmite in TOPA thukhamte le thupiakte zui hamtang tu nu hi,

²⁸tua hile note mai ah a teang doai biate leitang ii a nial bangin, no hong nial ngawl tu hi.

²⁹Hi bangza in a thasiathuai in a ngamta peuma sia Pathian mi khat in kingaisun nawn ngawl tu a hina thu na he uh hi.

³⁰Tuaciang TOPA in, “Kong thupiakte zui in hi ngam le lei ah note mai a teang masate ii ngamtat luheaknate na zui heak vun a, hi bang khat pawpo vawtna taw na kininsak heak vun. Keima in TOPA note ii Pathian ka hi hi,” ci hi.