Read Siyin Chin Thiampite 19 Bible Online

Thiampite 19 - Siyin Chin bible

Thiampite 19

²Israel taangpite tungah a sonsawn tu in Moses tungah, “Thiangtho vun, banghang ziam cile Keima TOPA na Pathian thiangtho khi hi.

³Kong thupiak bangin note in na nu le na pa zakta vun a, Sabbath tang vun. Keima in TOPA na Pathian ka hi hi.

⁴“Kei hong taisan in milim bia heak vun; pathiante thik taw vawt tawm in bia heak vun. Keima in TOPA na Pathian ka hi hi.

⁵“Kipawlkhop biakpiak natu in nganhing na ngaw uh ciang kong piaksa ngeinate zui vun, tua hile tua biakpiakna kong saang tu hi.

⁶Sa na ngaw uh sia na ngaw ni ahibuale a zing ciang na neak nanak kul hi. Ni thum ni in a taanglai sa pawpo kihal tu hi,

⁷banghang ziam cile tua sa in biakna taw kisai in nin a, a ne a om le tua biakpiakna kong saang buatu hi.

⁸Tuasia a ne pawpo sia in ka tungah hong ki aap ante nadang thawthong bang suaksak ahikom mawnei suak a, keima mihing khat in kingaisun nawn ngawl tu hi.

⁹“Na lo ante na laak uh ciang lo kiil ah ante la heak vun, na nusiatsa ante a la tu in pai kik heak vun.

¹⁰Na makngil uh sapit bom ahibuale lei ah a taak sapitngate tawm kik tu in, pai kik heak vun; tuate mizawngte le ngamdangmite atu in nusiat vun. Keima in TOPA na Pathian ka hi hi.

¹¹“Nguta heak vun a, ngualtheam ahibuale leilot thu son heak vun.

¹²Na zui ngawl tu po ka min taw kamciam pia heak vun; tua in ka min daisak hi. Keima in TOPA na Pathian ka hi hi.

¹³“Noma meet natu in midangte vanh suttol heak vun. Noma cial sa mihing khat ii thamante, zan khat bek zongh khak heak vun.

¹⁴Nangongte haamsiat heak vun a, mittawte lutu natu in a mai ah na khat zongh koi heak vun. Kei hong kiita tavun; keima in TOPA na Pathian ka hi hi.

¹⁵Zum tung thusonnate na khen uh ciang “Thumaan le thutang taw thu khen vun; mizawngte ngum tuan heak vun, ahibuale sumhaute kiita heak vun.

¹⁶Khat pawpo taw kisai in leilot thu sonsawn heak vun a, mihing khat ii nuntakna le thina thu a kison ciang na tetti panna in ama a hu thei tu a ahile, son khe in. Keima in TOPA ka hi hi.

¹⁷“Mihing khat pawpo ngimhuat heak vun, ahizong ama hangin na maw na khial ngawl natu in na kithukim ngawl nate ama taw maitang kisi in pha tak son zaw vun.

¹⁸Kuama tungah phula heak vun a, kuama ngaimaw top heak vun. Noma le noma na ki it uh bangin na innpaamte it vun. Keima in TOPA ka hi hi.

¹⁹“Kong thupiakte zui vun. Inn ah khoai ngannote nam dang taw ta neisak heak vun. Lo khat sungah thaicii nam nii ciing heak vun. Puan nam nii taw a kivawt puan silh heak vun.

²⁰“Mi khat ii a zino ahi ama sila nu sia a kitan sa a suakta sa hi ngawl lai in, midang khat in a khialpui le a nii in daan pia tu a, ahihang a thu kikan ngawl tu a, tua nusia a sila khat ahi hu in amate kithatlum ngawl tu hi,

²¹Tua pa in ama khialphel biakpiak natu in ka ompuina Puanbuk kongbiang ah tuutal khat hong paipui tu a,

²²thiampipa in a khialphel natu in tua tuutal taw a zeksa thiansuana vawt tu a, Pathian in ama khialna maisak tu hi.

²³“Canaan ngam sungah tumin thingno kung nam khat pawpo na suan uh ciang a masa kum thum sung tua thingngate biakna taw kisai in a thiang ngawlin ngaisun vun. Tua hun sung teng tua thingnga ne heak vun.

²⁴A kum lina ciang thingnga theampo, Keima na TOPA tungah na lungdamna a lak biakpiakna in nong aap tu uh hi.

²⁵Ahizong a kum ngana ciang tua thingnga ne thei tu nu hi. Tuabang na hi uh le na thingno te in nga tamzaw nga tu hi. Keima in TOPA na Pathian ka hi hi.

²⁶“Chisan a om lai sa ne heak vun. Mitbum aisaanna tuatuamte zangh heak vun.

²⁷Mithite atu khuangai in na pangh samte meet heak vun, ahibuale na khamul meet heak vun,

²⁸ahibuale noma le noma thulkawng sun ahibuale na taksa kiliamsua heak vun. Keima in TOPA ka hi hi.

²⁹“Na tanute biakinn ah pumpi kizuakna taw a min daisak heak vun; tuabang na hisak uh le pathian dangte sang ah a pial na hi tu uh a, ngamsung teng numei le pa paktatna taw kidim tu hi.

³⁰Sabbath tang vun a, keima nong biakna mun zakta vun. Keima in TOPA ka hi hi.

³¹“Mithisate ii thaate thu a dongh thei te kungah thu dongh tu in pai heak vun. Na pai uh le, note biakna taw kisai in a thiang ngawl na hi tu uh hi. Keima in TOPA na Pathian ka hi hi.

³²“Khanghaamte zatakna lak vun a, upat vun. Keima hong thasia in ka thu ni vun; keima in TOPA ka hi hi.

³³“Noma ngam sungah hong teang ngamdangmite vawtsia heak vun.

³⁴Na lawm Israel te na vawt uh bangin vawt vun a, noma na ki it uh bangin amate it vun. Khatvei lai in Egypt ngam ah ngamdangmi na hina thu phawk vun. Keima in TOPA na Pathian ka hi hi.

³⁵“A man ngawl a sauna, a ngitna ahibuale a phakza teena taw khat pawpo theam heak vun.

³⁶A man pikhau, toaisuang le khaikhin zangh vun. Keima in TOPA na Pathian ka hi a, Egypt pan kong pusua pui hi.

³⁷Ka thukhamte le kong thupiakte theampo zui vun. Keima in TOPA ka hi hi,” ci hi.