Read Siyin Chin Thiampite 2 Bible Online

Thiampite 2 - Siyin Chin bible

Thiampite 2

¹Mihing khat pawpo in antang taw TOPA biakpiakna a nei ciang, antang ngoaivui masa nanak tu hi. Ama in olive thau le ngimnamtui buak tu a,

²Aaron suan thiampite kungah paipui tu hi. Thiampipa in anvui khutdim khat, sathau le ngimnamtui theampo la in, TOPA tungah kipia siat zo hi ci in a kiheak thei natu in biaknatau ah hal tu hi. Tua an biakpiakna ii ngimnam in TOPA lungkimsak hi.

³A taanglai antang teng thiampite neisa hi a, TOPA a kipia an sung pan a laak ahikom, thiangtho mama hi.

⁴A kipia anluum sia, anluum emna bealpeu sungah em ahile, tol saw ngawl hi nanak tu hi. Tuasia olive thau taw a kihel a anluum liante ahibuale olive thau taw a kizut a muhpaate hi thei tu hi.

⁵A kipia anluum sia moh emna taw minsak ahile, olive thau le anvui a kihel hi tu a, ahizong tol saw ngawl hi tu hi.

⁶Biakpiakna in na nei ciang, tuasia balneen in a tungah sathau na buak tu hi.

⁷Beal baannei taw a kihuan anluum a kipia ahile, olive thau le anvui taw huan hi tu hi.

⁸Hi an sia TOPA tungah biakpiakna khat in paipui a, thiampipa tungah pia in, biaknatau ah paipui tu hi.

⁹A vekpi in TOPA tungah a kipia a hina thu limlakna in thiampipa in tawm la a, biaknatau tungah hal tu hi. Tua an biakpiakna ii ngimnam in TOPA lungkimsak hi.

¹⁰A taanglai biakpiaknate thiampite neisa hi a; TOPA a kipia an sung pan a kila ahikom, thiangtho mama hi.

¹¹TOPA a kipia antang taw biakpiaknate tol kisaw ngawl tu a; TOPA tungah na piak an sungah khuaitui ahibuale tol na zangh ngei buatu hi.

¹²Anpal taw biakpiakna khat kum simin na paipui tu uh a, ahizong biaknatau ah na hal buatu uh hi.

¹³Antang taw biakpiakna theampo ah ci saw vun, banghang ziam cile ci sia noma le Pathian kilaklaw ah thuciamna lim ahi hi. (Biakpiakna theampo ah ci saw nanak vun.)

¹⁴Anpal taw TOPA tungah biakpiakna na nei uh ciang, kan sa antang ahibuale ngoaivui sa an hi tu hi.

¹⁵Tua tungah olive thau helin ngimnamtui na buak tu uh hi.

¹⁶TOPA tungah an taw biakpiakna a hina, limlakna in antawm, sathau le ngimnamtui theampo zongh thiampipa in hal tu hi.