Read Siyin Chin Thiampite 20 Bible Online

Thiampite 20 - Siyin Chin bible

Thiampite 20

²Israel mite tungah hi bang a sonsawn tu in Moses tungah, “Note khat pawpo ahibuale note taw a teang khawm ngamdangmi khat pawpo, Molech pathian biakna in a zak tu in a ta a pia pawpo sia, taangpi in suang taw deanglum tu uh hi.

³Mihing khat pawpo a tate khat Molech tungah pia in, ka Puanbuk thiangtho ninsak a, ka min thiangtho a daisak le ka nungngat tu a, ka mi khat in ka ngaisun nawn buatu hi.

⁴Ahizong tua pa ngamtatna taangpite in awlmawk ngawlin a thatlum bua le,

⁵tua pa, a innkuan bup le Molech bia in ka tungah hong thumaan ngawl theampo ka nungngat tu hi. Amate ka mi in ka ngaisun nawn buatu hi.

⁶“Mithite ii thaate tungah thu a dongh thei mihingte kungah mi khat pawpo pai in thu a dongh le ama ka nungngat tu a, ka mi khatin ka ngaisun nawn buatu hi.

⁷Note thiangtho tavun, banghang ziam cile keima in TOPA na Pathian ka hi hi.

⁸Ka thukhamte hong zui tavun, banghang ziam cile Keima in TOPA hi a, kong thiangthosak hi,” ci hi.

⁹TOPA in a nuai a zui tu ngeinate pia hi. A nu le a pa a haamsiat peuma kithatlum tu hi; ama ii thina sia ama kivawt ahi hi.

¹⁰Mi khat in Israel mipui khat ii zi a khialpui le a nii in kithatlum tu hi.

¹¹Mi khat in a pa zite khat a khialpui le a pa maimawlsak hi a, a nii in kithatlum tu hi. Amate thina in amate kivawt ahi hi.

¹²Mihing khat in a tapa zi a khialpui le a nii in kithatlum tu hi. Mealheak kuung sung numei le pa omkhop khialna vawt ahiciang amate thina in amate kivawt ahi hi.

¹³Pa khat in a dang pa khat taw a khial le a kiihuai ngamtatna hi a, a nii in kithatlum tu hi. Amate thina in amate kivawt ahi hi.

¹⁴Mi khat in numei khat le tua nu ii nu a teenpui le a thum in kihallum tu hi, banghang ziam cile amate in a min daihuai ngamtatnate vawt uh hi; note sungah hi bang ngamtatnate omsak ngawl het tu nu hi.

¹⁵Mi khat in nganhing taw a khial le, a nii in kithatlum tu hi.

¹⁶Numei khat in nganhing khat taw khial nuamin a hanciam le a nii in kithatlum tu hi. Amate thina in amate kivawt ahi hi.

¹⁷Mi khat in a suapuinu ahibuale a suapuisealnu a teenpui le, amate mipite mai ah a maizumhuai le a thasiathuai in kivawt tu a, a mihuam sung pan kihawlkhia tu hi. A suapuinu khialpui ahikom a piang bang a thuak kul hi.

¹⁸Mi khat in numei khat a nin nei laitak a khialpui le a nii in a mihuam sung pan kihawlkhia tu hi, banghang ziam cile biakna sang pan a thiang ngawl thu taw kisai ngeinate paltan ahi hi.

¹⁹Mi khat in a ni taw a khial le, mealheak kuung ahi hu in a piang bang a nii in a thuak kul tu hi.

²⁰Mi khat in a pa suapuipa zi taw a khial le, a pa suapuipa maimawlsak hi a, a nii in daan thuak tu a; tasel tu hi.

²¹Mi khat in a suapuipa zi a teenpui le, tasel in amate thi tu hi. Ama in biakna taw kisai a thiang ngawl na seam hi a, a suapuipa maimawlsak ahi hi.

²²TOPA in, “Kong paipuina Canaan leitang ii note hong nial ngawl natu in ka thukham le ka thupiakte theampo zui vun.

²³Tualai ah a teang mite ii ngeinate zui heak vun; hi ngamsung na tum thei natu in hi ngam pan tua doai bia te not keak tu khi hi. A ngamtat siatnate in hong thasiasak hi.

²⁴Ahizong hi ngamhoi ngampha lua tu in, hong ciam zo ka hi ciang kong pia tu hi. Keima in TOPA na Pathian ka hi a, minam dangte sung pan kong tuamkoi zo hi.

²⁵Tua hi a, nganhing le vacimte biakna taw kisai in a thiang le a thiang ngawl na khentel tu uh hi. A nin ahi nganhing le vacimte ne heak vun. Nin hi ka ci sa hi a, na ne uh le a nin hong suaksak tu hi.

²⁶Note na thiangtho tu uh a, keima neisa bek na hi tu uh hi, banghang ziam cile keima in TOPA ka hi a, ka thiangtho hi. Keima neisa bek na hi thei natu in minam dangte sung pan kong tuamkoi hi.

²⁷“Pa ahizong nu ahizong mithisate thaa tung thu a dongh peuma suang taw kideanglum tu hi; hi bang a ngamta pawpo ama ii thina in ama kivawt ahi hi,” ci hi.