Read Siyin Chin Thiampite 21 Bible Online

Thiampite 21 - Siyin Chin bible

Thiampite 21

¹Aaron suan thiampite tungah a son tu in TOPA in Moses thupia a, “Thiampi peuma sia a nu, a pa, a tapa, a tanu, a suapuinu, a suapuipa le inn ah a om pasal nei ngawl a suapuinu a thi ciang simngawl a dang mealheak khat mithi vuina ah a kihelna hu in, biakna taw kisai in a nin kisua heak hen.

⁴Kiteenna hu in a kinai pui a mealheak te a thi ciang mithi sungah a kihel hu in ama le ama kininsak ngawl tu hi.

⁵“Thiampi peuma khuangaina lakna in a sam mun khat zongh meet ngawl tu a, a khamul zongh tan ngawlin, a ci tung kiliamsua ngawl tu hi.

⁶Ama thiangtho tu a, ka min daisak ngawl het tu hi. Ama in an taw biakpiaknate hong pia ahiciang ama a thiangtho kul hi.

⁷Thiampi khat in pumpi kizuak ngei numei khat, ngaknu thiangtho ngawl, ahibuale pasal ii khul numei khat teenpui ngawl tu hi; ama thiangtho hi.

⁸Mite in thiampipa a thiangtho in ngaisun tu hi, banghang ziam cile an taw biakpiaknate kei tungah hong pia hi. Keima in TOPA ka hi hi; keima ka thiangtho a, ka mite ka thiangthosak hi.

⁹Thiampipa tanu khat pumpi kizuak numei a suak le, a pa maimawlsak hi; ama kihallum tu hi.

¹⁰“A lu tung sathau buak sa le thiampi puan silh tu in a ki aapsa Thiampi Lianbel khat in khuangaina lakna in a sam pot ngawlin, a puante balkeak in om ngawl het tu hi.

¹¹Ama kei tungah hong ki aapsa ahiciang biakna taw kisai a thiangtho ngawl kisuaksak heak hen a, a nu a pa tatak thi le zong ka Puanbuk nusia in mithi koina inn ah a tum hu in a thiangtho ka Puanbuk ninsak heak hen.

¹³Ama in ngaknu thiangtho khat teenpui tu a,

¹⁴meingong ahibuale pasal taw kikhen sa numei, ahibuale pumpi kizuak ngei numei teenpui ngawl tu hi. Ama suante sung pan ngaknu thiangtho bekma teenpui tu hi.

¹⁵Tuabang ahibuale a thiangtho tu a tate sia biakna taw kisai in a thiang ngawl suak tu hi. Keima in TOPA hi a, ama sia Thiampi Lianbel in ka koituam zo hi,” ci hi.

¹⁶TOPA in Moses ii

¹⁷Aaron tungah a son tu in a thupiakna pan, “Na suan na paal sung pan pumpi mealhemna khat pawpo a neite in ka tungah an taw biakpiakna hong pia heak hen. Hi thu in maisang hun theampo ah zui tu ahi hi.

¹⁸Pumpi mealhem peuma in biakpiakna pia thei ngawl tu hi, tuate in mittaw, peangbai, mealhem ahibuale pumpi sitbaang;

¹⁹khutkon peangkon te;

²⁰cingkuul ahibuale mihing khansamh te; mit natna nei ahibuale vun natna nei; cil kingette ahi uh hi.

²¹Thiampi Aaron suan pumpi mealhemte in kei tungah an taw biakpiakna hong pia thei ngawl tu hi.

²²Tuabang mihing khat in ka tungah hong kipia biakpiakna, a thiangtho biakpiakna le a thiangtho mama biakpiakna ante ne thei tu a,

²³ahizong ama pumpi sitbaang ahikom a thiangtho puankhai kungah pai ngawl tu a, ahibuale biaknatau neak ngawl tu hi. Ama in hi a thiangtho nate ninsak ngawl het tu hi, banghang ziam cile Keima in TOPA ka hi a, amate ka thiangthosak hi,” ci hi.

²⁴Hi thu Moses ii Aaron, Aaron ii tapate le Israel mite theampo tungah a son thu ahi hi.