Read Siyin Chin Thiampite 22 Bible Online

Thiampite 22 - Siyin Chin bible

Thiampite 22

¹TOPA in Moses ii Aaron le a tapate a son tu in

²thupia a, “Ka min thiangtho na daisak ngawl het natu in Israel mite ii ka tungah hong aaptuam a thiangtho biakpiaknate ciliap tavun. Keima in TOPA ka hi hi.

³Na suan na paal khat po in biakna taw kisai a thian ngawl laitak, Israel mite ii ka tungah hong aaptuam a thiangtho biakpiaknate nai ah hong pai in ahile biaknatau ah naseam kik thei ngeingawl tu hi. Hisia maisang hun theampo ah a kizangh tu ahi hi. Keima in TOPA ka hi hi.

⁴“Aaron suan le paalte sung pan a kiitakhuai vun natna veite, ahibuale meima naai neite in biakna taw kisai in a thiantho mateng a thiangtho biakpiakna ante ne ngawl tu hi. Thiampi khat pawpo in mithiluang taw a kithutha a nin khat pawpo, ahibuale bawtui a tee pa khat,

⁵ahibuale a thiang ngawl nganhing, ahibuale mihing khat a tham le ama thiang ngawl hi.

⁶Thiampi khat pawpo a thiang buale nitak dongin a nin hi tu a, a kibual mateng a thiangtho biakpiakna ante ne thei ngawl tu hi.

⁷Nitum zawkciang ama thiang a, tuaciang ama an ahi a thiangtho biakpiakna ante ne thei tu hi.

⁸Ama in, ama thu in a thi thawthong nganhing ii sa ahibuale ngamsa ii thalup sate ne ngawl tu hi; tua in ama ninsak tu hi. Keima in TOPA ka hi hi.

⁹“Thiampi theampo in kong piaksa ngeinate zui tu hi. Tuabang a zui bua uh le amate a maw hi tu a thi tu uh hi, banghang ziam cile amate in a thiangtho ngeinate a zui ngawl hang ahi hi. Keima in TOPA ka hi a, amate ka thiangthosak hi.

¹⁰“Thiampi innkuanpuite bek in a thiangtho biakpiakna an pawpo ne thei tu a; kuama dang — thiampi taw a omkhawm khat, ahibuale a thacial khat zongh in ne thei ngawl tu hi.

¹¹Ahizong ama ii sum taw a lei silate ahibuale tualsuak silate in thiampi ii a nga ante ne thei tu hi.

¹²Thiampi khat ii tanu in thiampi ahi ngawl khat a teenpui le a thiangtho biakpiakna an khat pawpo ne thei ngawl tu hi.

¹³Ahizong thiampi khat ii tanu sia a pasal thi in meingong, ahibuale ta nei ngawlin a pasal in khul a, a pa inn ah bealhin a cia kik le a pa ii nga thiampi ante ne thei tu hi. Thiampi innkuanpuite bek in hi ante ne thei tu hi.

¹⁴“Thiampi innkuanpui ahi ngawl khat in a thiangtho biakpiakna ante a heak ngawlin a ne tha le ama in thiampipa tungah a man a cingin liau kik tu a, zakhat ciang kul taw belap tu hi.

¹⁵Thiampite in tua ante a ne thei ngawl tu midang khat pawpo a neaksakna taw,

¹⁶a thiangtho biakpiakna ante ninsak ngawl tu hi; a ninsakte a maw hi tu a, daan thuak tu hi. Keima in TOPA ka hi a, biakpiaknate ka thiangthosak hi,” ci hi.

¹⁷TOPA in Moses tungah,

¹⁸Aaron le a tapate le Israel mite theampo ii zui tu in a nuai a ngeinate a piak tu in thupia hi. Israel mite khat pawpo in ahibuale Israel sung a teang ngamdangmi khat pawpo in meihal biakpiakna a piak ciang, kamciam taangtutna in a piak ahizong, thinzaw biakpiakna taw a piak ahizong, a mealhem ngawl nganhing zangh tu hi.

¹⁹A kisaang thei tu in, a mealhem ngawl a tal hi nanak tu hi.

²⁰A mealhem nganno khat po na pia le TOPA in saang ngawl tu hi.

²¹Mi khat pawpo in kipawlkhop biakpiakna TOPA tungah a piak ciang, kamciam taangtutna, ahibuale thinzaw biakpiakna a piak ciang, TOPA ii saan thei tu in a mealhem ngawl nganhing hi tu hi.

²²TOPA tungah a mittaw, a peangbai, a mealhem, meima vei, vun meima balh, a khiik nei meima vei nganhing khat pawpo pia heak vun. Hi bang nganhingte biaknatau ah an biakpiakna in pia heak vun.

²³Thinzaw biakpiakna ah a khansamh ahibuale a limci tatak ngawl nganhingte pia thei tu nu hi, ahizong kamciam taangtut natu in tuate kisaang ngawl hi.

²⁴A ciltang a tamhsa, a kingetsa, a kisuthamsa, a kilakeaksa nganhing khat pawpo TOPA tungah pia heak vun. Hite sia na ngam sungah zak tu ki oai ngawl hi.

²⁵Ngamdangmite tung pan a kinga nganhing taw an biakpiakna pia heak vun. Hi bang nganhingte a sitbaang in kingaisun a, kisaang thei ngawl hi.

²⁶Khui, tuu, kealte a no a sua ciang ni sali sung a pui taw na khen buatu uh hi, ahizong tua zawkciang an biakpiakna in kisaang thei hi.

²⁸Ni khat sungin khuipui le a no, tuupui le a no, kealpui le a no, sangaw biakpiakna in piakhawm heak vun.

²⁹TOPA tungah lungdamko biakpiakna na piak uh ciang hong san thei tu in ngeinate zui vun;

³⁰tua ni in a sa ne in, a khuavak ni zingsang dong bangma khe heak vun.

³¹TOPA in, “Ka thupiakte zui vun; Keima in TOPA ka hi hi.

³²Ka min thiangtho daisak heak vun; Israel mite theampo in thiangtho ka hina hong saan kul hi. Keima in TOPA ka hi a, note kong thiangthosak hi;

³³na Pathian ka hi natu in Egypt pan note kong pusuapui hi. Keima in TOPA ka hi hi,” ci hi.