Read Siyin Chin Thiampite 23 Bible Online

Thiampite 23 - Siyin Chin bible

Thiampite 23

¹TOPA in Moses tungah

²Israel mite ii a biak kikhop ciang, biakna poaite atu in a zui tu a nuai a ngeinate pia hi.

³Note in na nasep natu in ni luk sung nei nu hi, ahizong ni sali ni, Sabbath sia tawlngakna ni ahi phawk vun. Tua ni in naseam heak vun, ahizong biakpiakna vawt tu in kikhawm vun. Koisung po na teang uh zong Sabbath sia TOPA neisa ahi hi.

⁴A kisee hun a tun simin a nuai a poaite thangsak vun.

⁵TOPA patoaina in a kivawt Paisan Poai sia tha masabel ni sawm le ni li ni, nitum ciang kipan hi.

⁶Ni sawm le ni nga ni in Tol saw ngawl Anluum Poai kipan a, ni sali sung tol kisaw anluum peuma na ne buatu uh hi.

⁷Poai sung ni masabel ni in biakna vawt tu in na kikhawm tu uh a, kuama in noma ii ni sim nasep bangma seam ngawl het tu nu hi.

⁸Ni sali sung TOPA tungah an taw biakpiaknate pia vun. A ni sali ni in biakna vawt tu in kikhawm kik vun, ahizong kuama in noma ni sim nasep bangma seam heak vun.

⁹TOPA hong piakna ngam thengin an na laak uh ciang anpal taangvawng sia thiampipa pia vun.

¹¹No hong kisaan thei natu in thiampipa in TOPA tungah tuasia a tuam vilvel biakpiakna in pia tu hi. Tuasia Sabbath khuavak ni in thiampipa in pia tu hi.

¹²Antang biakpiakna na piak ni in meihal biakpiakna in a mealhem ngawl kum khat a pha tuutal khat zongh na pia tu uh hi.

¹³Tua taw an biakpiakna in olive thau taw a kihel anvui kilogramme nii na pia tu uh hi. Hi biakpiakna ii ngimnam in TOPA lungkimsak hi. Biakpiakna in sapittui litre khat zongh pia tu nu hi.

¹⁴Pathian tungah hi biakpiakna na piak uh mateng anthak peuma, a sial, a kan ahibuale anluum em ne heak vun. Hi ngeina sia na suan le na paalte theampo ii maisang hun theampo ah a zui tu ngeina ahi hi.

¹⁵TOPA tungah anpal na piak ni, Sabbath khuavak ni pan nipi sali a cin dong simto vun.

¹⁶Sabbath salivei a cin zawk ni sawmnga ni in TOPA tungah a dang antang biakpiakna thak pia vun.

¹⁷Innkuan simin anluum lum nii tek keng tu a, a tuam vilvel letsong in TOPA tungah pia tu hi. Anluum khat sia anvui kilogramme nii tol kisaw in a ki em hi tu a, laak pheang tu anpal biakpiakna in TOPA tungah pia tu nu hi.

¹⁸Tua anluum taw taangpite in a mealhem ngawl kum khat a pha, tuuno sali, khuital khat le tuutal nii pia tu uh hi. Tuate TOPA tungah meihal biakpiakna in antang biakpiakna le sapittui biakpiakna taw kipiakhawm tu hi. Hi biakpiakna ii ngimnam in TOPA lungkimsak hi.

¹⁹Mawphel biakpiakna in kealtal khat le kipawlkhop biakpiakna in kum khat a pha tuutalno nii zongh pia vun.

²⁰Thiampipa in thiampite atu in TOPA tungah a tuam vilvel letsong in anluum sia tuunote nii taw pia tu hi. Hi biakpiaknate thiangtho hi.

²¹Tua ni in kuama in noma ii ni sim nasep bangma seam heak vun, ahizong biak kikhopna nei vun. Koisung po ah na teang uh zong na suan na paalte in hi ngeina sia maisang hun theampo ah zui tu uh hi.

²²Na lo ante na laak uh ciang lomong a om ante la heak vun a, na nusiat sa ante at kik tu in pai kik heak vun; tuate sia mizawngte le ngamdangmite atu in nusia vun. TOPA sia na Pathian ahi hi.

²³A tha salina ni masabel ni sia a tuam vilvel tawlngakna ni in tang vun a, lemle hong kitum ciang biakna vawt tu in kikhawm vun.

²⁵TOPA tungah an taw biakpiakna pia vun a, noma ii ni sim nasep bangma seam heak vun.

²⁶Tha salina ni sawm ni sia mite mawmai natu in kumcin biakna a zeksa sep ni tu ahi hi. Tua ni in bangma ne heak vun a; biak kikhopna ah pai tekin TOPA tungah an taw biakpiakna pia vun.

²⁸Tua ni in naseam heak vun, banghang ziam cile tua ni sia mawna a mai natu a zeksa sep ni ahi hi.

²⁹Tua ni in an khat pawpo a ne sia, Pathian mi khatin kingaisun nawn ngawl tu hi.

³⁰Tua ni in na seam a om le TOPA ama mama in thisak tu hi.

³¹Koisung po ah a teang zong hi ngeina sia na suan na paalte theampo atu ahi hi.

³²Tua tha ni kua ni nitum pan kipan ni sawm ni nitum dong sia a tuam vilvel tawlngakna ni in na tan tu uh hi a, tua hun sungin bangma kine thei ngawl tu hi.

³³Buk poai sia tha salina, ni sawm le ni nga ni pan kipan ni sali sung hi tu hi.

³⁵Ni masabel ni in biakna vawt khawm vun a, kuama in noma ii ni sim nasep bangma seam heak vun.

³⁶Ni sali sung ni simin an taw biakpiakna na vawt tu uh hi. A ni liat ni in a bia tu le an taw biakpiakna pia tu in na kikhawm kik tu uh hi. Tua ni sia biak kikhop ni hi a, kuama naseam ngawl tu nu hi.

³⁷(Hi biakna poaite sia a kisamh bangin biakna vawt khopna nei a, ni khat zawk ni khat an taw biakpiakna, meihal biakpiakna, antang biakpiakna, sangaw biakpiakna, le sapittui biakpiakna te taw TOPA patoaina poaite ahi hi.

³⁸Hi poaite in Sabbath tan ngeina sia belapna hi a, hi biakpiaknate sia TOPA tungah na piak ngengei letsongte le kamciam taangtut biakpiaknate le thinzaw biakpiaknate belapna ahi hi.)

³⁹Lo an na laak zawk uh ciang, tha salina ni sawm le ni nga ni pan kipan ni sali sung hi poai khaam tu nu hi. Ni masabel ni sia a tuam vilvel tawlngakna ni hi tu hi.

⁴⁰Tua ni in na thingnote ii nga phabelte, palm baakte, thingtee baakboaite pawlkhat la in TOPA na Pathian patoaina in biakna poai kipan tu nu hi.

⁴¹Tua poai ni sali sung vawt tu nu hi. Hi ngeina sia na suan na paalte ii maisang hun theampo ah a zui tu ahi hi.

⁴²Israel mite theampo ni sali sung bukte sungah teang tu a,

⁴³tua hile TOPA in Egypt pan hong pusuapui lai in Israel mite ii buk sak tawmte sungah hong teensakna thu na suan na paalte in hong he thei tu hi. Ama in TOPA na Pathian ahi hi.

⁴⁴Hi bangin TOPA patoaina in biakna poaite a khaam ciang Israel mite zui tu ngeinate Moses in pia hi.