Read Siyin Chin Thiampite 24 Bible Online

Thiampite 24 - Siyin Chin bible

Thiampite 24

¹TOPA in Moses tungah,

²Israel mite in Puanbuk sungah meiinnte a kidet ngei bangin a taan suak thei natu in olive thau phabelte hong paipui natu thupia in sawl hi.

³TOPA ompuina Thiangthobel Mun sungah a om Thuciamna Thingkuang mai puankhai pua sangah meite, nitak sim Aaron in de a, zingsang dong kuangtopsak tu hi. Hi ngeina sia maisang hun theampo ah zui tu ahi hi.

⁴Khamh ciitak taw kivawt meikhuamte tungah meite Aaron in keamcing tu a, TOPA ompuina ah a ngeina bangin taangsak nanak tu hi.

⁵Anvui kilogramme sawm le nii la in, anluum sawm le ni vawt in.

⁶TOPA ompuina mun khamh ciitak taw a kituam sabuai tungah luk veu ngual nii in koi hi.

⁷Anluum taangin TOPA tungah a kipia an taw biakpiakna a kilakna in, tua a ngualte tungah ngimnamtui a thiang tawm koi in.

⁸Sabbath ni sim, maisang hun theampo ah tua anluumte TOPA ompuina ah kikoi tu hi. Hisia a tawntungin Israel te sep tu ahi hi.

⁹Hi anluumte Aaron le a suan a paalte neisa hi a, amate in mun thiangthona ah ne tu hi, banghang ziam cile thiampite atu in TOPA tungah a kipia a thiangtho mama ante ahi hi.

¹⁰Pasal khat om a, a pa sia Egypt te, a nu sia Israel te Dan minam sung pan Dibri tanu Shelomith a kici sia ahi hi. Tua ngiaphual sungah tua pa sia Israel te khat taw kihau hi. A kihau sungin tua pa in Pathian haamsiat ahikom, Moses kungah paipui uh hi,

¹²tua pa kikhumcip a, bangbang hi tu ci sia TOPA ii amate a son tu ngakin om uh hi.

¹³TOPA in Moses tungah,

¹⁴“Tua pa ngiaphual pua sangah paipui vun. Pathian a haamsiat lai in a za theampo in maw hi ci tetti lakna in tua pa lu tungah a khut uh nga tek tu a, tuaciang taangpi bup in suang taw deanglum tu uh hi.

¹⁵Tuaciang Pathian a haamsiat peuma in a piang bangin thuak tu a,

¹⁶kithatlum tu hi, ci in Israel mite tungah na son tu hi. Israel te khat pawpo ahibuale Israel te sungah a teang ngamdangmi khat pawpo TOPA a haamsiat sia taangpi bup in suang taw deanglum tu hi.

¹⁷“Mihing a that sia peuma kithat tu hi,

¹⁸ngual nganno khat a that sia peuma in liau kik tu hi. Nuntakna khat sia nuntakna khat taw lo tu ci thu ahi hi.

¹⁹“Mihing khat in midang khat a liamsua le, ama vawt babangin a tungah kivawt tu hi.

²⁰Ama in ngu khat a talsak le ama ngu khat kitalsak tu hi; ngual mittang khat a tawsak le ama mittang khat kitawsak tu hi. Ha tang khat a tongsak le ama hatang khat kithoksak tu hi. Midang khat a liamsua babangin ama tungah kithuk kik tu hi.

²¹Nganno khat a that sia in liau tu a, ahizong mihing a that sia peuma kithatlum tu hi.

²²Hi thukham sia no Israel te le note sungah hong teang ngamdangmite theampo ii zui tu ahi hi, banghang ziam cile Keima in TOPA na Pathian ka hi hi,” ci hi.

²³Hi thu Moses in Israel mite tungah a son zawkciang, tua pa ngiaphual pua sangah paipui in suang taw deanglum uh hi. TOPA ii Moses tungah a thupiak bangin Israel mite in vawt uh hi.