Read Siyin Chin Thiampite 25 Bible Online

Thiampite 25 - Siyin Chin bible

Thiampite 25

¹TOPA in Sinai Mual tungah Moses paupui a,

²Israel mite tungah a nuai a zui tu ngeinate a piak tu in thupia hi. TOPA hong piak tu ngam ah na tum uh ciang a kum sali kum simin lothaw ngawlna taw TOPA na upat tu uh hi.

³Kum luk sung lo na poai tu uh a, na sapitbaakte tan a puuapha in, lo ante na kaikhawm tu uh hi.

⁴Ahizong a kum salina sia na leitang ii tawlngak kum hi tu a, TOPA tungah a ki aap kum hi tu hi. Tua kumin lo an ciing heak vun a, sapitkung zongh pua heak vun.

⁵Na lo sungah a lipo ante zongh la ngawlin na pua ngawl sapitngate zongh lo heak vun. Tua kum sia na leitang ii tawlngak hiithiat kum ahi hi.

⁶Tua kumin lo a kithaw ngawl hang tua lo in note, na silate, na naseamte, no taw a teang khawm ngamdangmite,

⁷na ngannote le ngamsate zongh hong vak tu hi. Tua lo pan a piang theampo kine thei tu hi.

⁸Kum sali mun salivei simna a kingawm ciang kum 49 ci in sim vun.

⁹Tua zawk tha salina, ni sawm ni, Mawsuutna Ni in ngamsung tengah lemle tum tu in mi khat na paisak tu hi.

¹⁰Hi bangin kum sawmngana kum sia na koituam tu a, ngam sungah a teang theampo tungah suatakna thu na thangsak tu uh hi. Tua kum in na zuak sa uh vanhte theampo, a nei sia kungah, ahibuale a suan a paalte kungah kipia kik tu hi, sila in a kizuaksa te zongh a innkuanpuite kungah cia kik tu hi.

¹¹Lo na tho buatu uh a, a lipo ante zongh na la buatu uh hi, na ho ngawl sapitngate zongh na lo buatu uh hi.

¹²Tua kum bup note atu in kum thiangtho hi tu a; lote pan a piang tawm teng bek na ne tu uh hi.

¹³Hi kum sungin a kizuaksa na theampo a neite kungah kilee kiksak siat tu hi.

¹⁴Tua hi a, Israel na mipuite tungah na lo na zuak ciang, ahibuale ama tung pan lo na lei ciang a kilawm ngawlin kison heak vun.

¹⁵A man sia Piakkikna Jubilee Kum kik dong hi lo pan kum bangza sung, an bangza piang tu cisia tuatin a man kitan tu hi.

¹⁶A kum a tam le a man tam tu a, ahizong a kum a tawm le a man tawm zaw tu hi, banghang ziam cile a kizuak lo sia pan a piang thei an phaza tungah kibulphu zaw hi.

¹⁷Israel na mipuite theam heak in a, TOPA na Pathian ii thu ni in.

¹⁸Hi ngam sungah ngammuang tak na nuntak thei natu in TOPA thukhamte le thupiakte theampo zui in.

¹⁹Leitang pan an hong piang tu a, na du theampo nei in, ngammuang takin na nungta tu uh hi.

²⁰Ahizong mihing khat po in tuabang lothaw ngawl, anlaak ngawl bulin, a kum sali kumin bang ne tu hi ziam, hong ci om thei tu hi.

²¹Kum nii sung an na khom thei natu uh in TOPA in a kum luk kumin leitang thupha pia tu hi.

²²A kum liat kumin lo na thaw ciang a kum lukna kumin na laak ante na ne lai tu a, tua kumin na thaw ante na laak dong neakkhom tu na nei tu uh hi.

²³Na leitang sia a tawntung atu in kizuak thei ngawl tu hi, banghang ziam cile nang neisa hi ngawl hi; Pathian neisa hi a, no sia thaw khuan a nga ngamdangmite taw na kibang uh hi.

²⁴Leitang a kizuak ciang a neipa ii tat kik thei natu a thuneina sia heak tek kul hi.

²⁵Israel te khat zawng a, a leitang zuak tu a kul le a mealheak kinaibel sia in tan kik tu hi.

²⁶A tan kik tu mealheak a nei ngawl khat sia hong hau kikin a tan kik zo zongh suak thei tu hi.

²⁷Tua thu ah a lei kik thei ni in Piakkikna Jubilee kum dong a leitang pan a nga kik tu za taw tuatin a zuakna pa tungah a man pia in tuasia tan kik tu hi.

²⁸Ahizong a tat kik natu sum a cin zo buale Piakkikna Jubilee kum kik dong a leipa khut sungah om lai tu hi. Tua kum ciang tuasia a neipa tungah kipia kik tu hi.

²⁹Mihing khat in kulh taw ki uum khuapi sungah a om inn khat a zuak le, a zuak hun pan kum khat sung teng tan kik thei tu hi.

³⁰Ahizong tua kum sungin a tan kik zo buale tan kik thei nawn ngawl tu a, a inn sia a leipa le a suan le a paalte neisa hi suak tu hi; Piakkikna Jubilee kum ciang zongh in kipia kik tuan ngawl tu hi.

³¹Ahizong uumna a nei ngawl khuanote sungah innte sia lote bangin kingaisun tu a, a neipa in tan kik thei tu hi, Jubilee kum ciang kipia kik tu hi.

³²Ahizong Levi suante in a nasepna khuapite sungah a neisate bang hun po in tat kik thei natu thu nei hi.

³³Hi khuapite khat sung pan inn khat sia Levi khat in zuak a, a tan kik buale Piakkikna Jubilee kum ciang kipia kik nanak tu hi, banghang ziam cile a khuapi sungah Levi te ii innte sia Israel mite sungah a kip a kho in amate ii neisa ahi hi.

³⁴Levi khuapite kiimkot ah nganthana leitang ahile kizuak ngeingawl tu hi; tuasia a tawntung amate ii neisa ahi hi.

³⁵Na nai a, a teang Israel mipui khat zawngin ama le ama a kivaak zo buale na nai ah hong teen suak thei natu in na cial naseampa khat bangin sum na puk tu hi.

³⁶Ama tung pan a meet la heak in a, ahihang Pathian thu ni in na Israel mipuipa na nai ah teangsak in.

³⁷Ama, sum na pukna tung pan summeet la heak in a, na anzuakte tung pan a meet la heak in.

³⁸Hi thu sia Canaan ngam hong piak natu le noma Pathian ahi natu in Egypt ngam pan hong pusuapuipa TOPA na Pathian uh ii thu piak ahi hi.

³⁹Na nai a, a teang Israel na mipui khat a zawn mama hu in sila khat bangin ama le ama hong kizuak le sila nasepte na seamsak buatu hi.

⁴⁰Ama in kuli khat bangin na kungah om tu a, Piakkikna Jubilee kum dong nangma ii na seam tu hi.

⁴¹Tuasia hun ciang ama le a tate in nangma hong nusia tu a, a innkuanpuite le a taanghpupite neisa omna ah cia kik tu uh hi.

⁴²Israel mite sia TOPA ii silate hi a, ama in Egypt pan pusuapui hi; amate sila in kizuak ngawl het tu hi.

⁴³Na Pathian kiita vun a, amate vawtsia heak vun.

⁴⁴Sila na kisamh le na kiim a om minamte tung pan lei vun.

⁴⁵Note taw teang khawm ngamdangmite ii tate zongh lei thei tu nu hi. Na ngamsung pan piang tuabang patangte noma neisa suak thei a,

⁴⁶amate na tapate ii lua tu in na nusiat thei tu a, na tapate ii a nuntak laiteng a na sepsak tu hi. Ahizong Israel na mipuite peuma na vawtsia buatu uh hi.

⁴⁷Sonteena in note taw teang khawm ngamdangmite khat hong hau a, ahihang na Israel mipui khat zawngin tua pa tung ahibuale a innkuanpuite khat tungah sila in ama le ama hong kizuak hi.

⁴⁸Ama a kizuak zawk hang kitan kik thei lai hi. A suapuite khat,

⁴⁹ahibuale a pano, a suapuiseal, a kinaipui a beete khat pawpo in tan kik thei tu hi; tua ahibuale ama mama in sum a khom a thalaw le kitan in suakta thei tu hi.

⁵⁰Ama in a leipa taw kikum tu a, a lei hun a kipan Piakkikna Jubilee kum kik dong a kum simto tu a, naseampa khat a kipia nitha za taw ama suatak natu a man tan tu hi.

⁵¹Kum sim kuli naseam khat bangin ngaisun in, a taanglai kumte taw tuatin a lei man baang teng pia kik tu hi.

⁵²

⁵³A topa in vawtsia ngawl het tu hi.

⁵⁴Hi bang lam khat pawpo taw a kisuaktasak buale ama le a tate sia Piakkikna Jubilee kum kik ciang kisuaktasak nanak tu hi.

⁵⁵Israel mi khat sia sila hi top thei ngawl tu hi, banghang ziam cile Israel mite sia TOPA silate ahi uh hi. Ama in amate Egypt pan pusuapui hi; ama sia TOPA, amate ii Pathian ahi hi.