Read Siyin Chin Thiampite 26 Bible Online

Thiampite 26 - Siyin Chin bible

Thiampite 26

¹TOPA in, “Biak tu in milimte vawt heak vun, ahibuale suangkhuamte, ahibuale a kizeam suangte phut heak vun. Keima in TOPA na Pathian ka hi hi.

²Biakna poaite vawt vun a keima nong biakna mun ciliap vun. Keima in TOPA ka hi hi.

³“Ka thukham bang nungta in ka thupiakte na zui uh le,

⁴Keima in nguatui hun maanin kong pia tu a, tua hile leitang in an piangsak tu a, thingkungte a nga nga tu hi.

⁵Na lo ante tam mama tu a, sapitngate law hun dongin lo ante na la lai tu a, thaicii tuu kik hun dongin sapitnga na lo lai tu uh hi. Na du theampo na nei tu a, na ngam sungah ngammuang takin na teang thei tu uh hi.

⁶“Na ngam sungah kilemna kong pia tu a, kuama kiita ngawlin na mu thei tu uh hi. Na ngamsung pan ngamsa ngilote ka hawlkeak tu a, tua munah ngal le sa om ngawl tu hi.

⁷Na ngalte na zo tu uh hi;

⁸note mi nga in mi zakhat na zo thei tu uh a, zakhat in tulsawm na zo thei tu uh hi.

⁹Thupha kong pia tu a, ta tam mama kong pia tu hi; note taw ka vawt thuciam sia keima sang pan ka len tu hi.

¹⁰An tam mama na la tu uh a, kum khat na khom tu uh hi, tua zawkciang zong saal sungah a taanglai an kumlui teng anthakte koi natu in na heam tu uh hi.

¹¹A thiangtho ka Puanbuk sungah note taw ka teang tu a, note kong nungngat ngei buatu hi.

¹²Noma taw kong om tu a, na Pathian hi in, note keima mi na hi tu uh hi.

¹³Keima TOPA na Pathian in sila na hi nawn ngawl natu in Egypt pan kong pusuapui hi. Keima in no hong neng suk vaangletna sia ka sumai zo a, vandak sa in hi vaviau in kong kalsuansak zo hi.

¹⁴TOPA in, “Ka thu piakte na zui bua uh le daan kong pia tu hi.

¹⁵Note taw ka vawt ka thuciam paltan in, ka thukham le ka thupiakte na nial uh le,

¹⁶note daan kong pia tu hi. Na mit hong tawsak tu le na nuntakna a bo tu in note tungah tuasiatna — a dam thei ngawl natnate le cisa natnate kong tungsak tu hi. Lo na thaw ancii na poai hangin na phattuamna om ngawl tu hi, banghang ziam cile na ngalte in hong zo in na ciin po hong neaksak tu hi.

¹⁷Ngal na lel natu in kong nungngat tu a, hong ngaimaw te in hong uk tu hi; na patau mama tu uh a, hong del om ngawl napi na tatai tu uh hi.

¹⁸“Hi bang teng zawkciang ka thu nong ni bua veve uh le, na thuak tu uh daan a zaa sali in ka khangsak tu hi.

¹⁹Na thinpui kiphatsakna ka sumai tu hi; nguatui hang a, na leitangte ko in thik bangin sak tu hi.

²⁰Hanciam in na nasepna theampo a luithawthong hi tu hi, banghang ziam cile na leitang pan an piang ngawl tu a, thingnote a nga nga ngawl tu hi.

²¹“Nong nalh veve lai a, ka thu nong ni bualai uh le, na thuak daan a zaa sali in ka khangsak kik tu hi.

²²Note sungah a kiitakhuai ngamsate kong puak tu a, na tate, na ngannote hong thalupsakin, note tawm bek taanglai in na lampite uh kinusia tu hi.

²³“Hi bang teng daan na thuak zawk uh ciang ka thu nangai ngawlin nong nial veve lai uh le,

²⁴kong nungngat tu a, a masa lai sangin salivei a nasia zaw daan kong pia tu hi.

²⁵Ih thuciamna na palsat manin daan hong pia tu in no tungah ngalpi kong thengsak tu hi. Na ngammuan natu in khuapi sung na zuan zonghin a dam maw natnate kong tungsak tu a, na ngalte na lel hamtang uh kul tu hi.

²⁶Nupi sawm ii a nei anluum theampo a em natu sia anluum emna khat bek a kisap natu zaa dongin na anneak nga natu kong khaktan tu hi. Amate in hong hawmsak tu uh a, na neak zawk uh ciang ngawngawn in na ngilkial lai tu uh hi.

²⁷“Hi bang teng zawkciang ka thu ni ngawlin nong nial veve lai uh le,

²⁸no tungah ka thin uukin a masa na daan thuak uh sangin, a salivei a nasia zawin daan kong pia tu hi.

²⁹Na ngil uh kial leilam in, na tate sa na ne tu uh hi.

³⁰Mual tungah om noma biakna munte ka lalsak tu a, ngimnamtui biaknataute baltham in milim a lalte tungah na mithiluangte ka lawn tu hi. A thasiathuai tatakin,

³¹na khuapite ka lalcipsak tu a, na biakna munte siasak in, na sangaw biakpiaknate kong saang buatu hi.

³²Na leitang ka lalcipsak tu a, tuasia a lua na ngalte inghsak tu hi.

³³Ngal kong thengsak tu a, ngamdang ah kong thethaang tu hi. Na leitang kitaisan tu a, na khuapite lalcip in kinusia tu hi.

³⁴Tuasia ciang tawlngak hun na piak ngawl, na leitang ii nuamsa in a tawlngak hunnuam kumte hi tu hi. Tuasia kinusia in ngam thimtham hong suak tu a, na ngalte ngam ah sal na tan hun sung teng na leitang tawlnga tu hi.

³⁶“Saltaangin a om note kong patausak mama tu a, vui ii seam thingtee nging sia in note hong taisak tu hi. Ngal kisimna ah ngalte ii del bangin na tai tu uh a, na kiim ah ngal om ngawl napi na liik tu uh hi.

³⁷Kuama hong del om ngawl napi kipaltha in na liik tu uh a, ngalte khat zongh na sim zo buatu uh hi.

³⁸Na saltanna ah na thi tu uh a, na ngalte ii leitang in hong valhlum tu hi.

³⁹Na ngalte ngam le lei ah a taanglai sun tawmte zongh noma mawna le na taanghpupite mawna hangin na mangthang veve tu uh hi.

⁴⁰“Ahizong na suan na paalte in amate mawnate le hong nalh a hong leedo hu in amate mawnate le a taanghpupite mawnate pualaak tu uh hi,

⁴¹amate sia keima ii ka nungngat, a ngalte ngam ah salin hong puaksakte ahi uh hi. A khakbel in na suan na paalte a mawna hangin kiniamkhiak a, daan zong thuak zo ahiciang,

⁴²Jacob, Isaac, le Abraham taw ka thuciamna ka phawk kik tu a, ka mite Canaan ngam piak tu in ka kamciamna ka thaksua kik tu hi.

⁴³Ahizong hi leitang, a tawlngak hithet thei natu in a ngammite in a masabel in ngam le lei a taisat kul hi, ka thukham le ka thupiakte nial ahikom amate daan ka piak kul hi.

⁴⁴Tuabang ahitazong a ngalte ngam sungah a om hun sung zonghin ka nusia bup buatu a, ka mon buatu hi. Tuabangin vawt leng amate taw ka thuciamna bo tu hi, keima in TOPA, amate ii Pathian ka hi hi.

⁴⁵Keima in TOPA amate ii Pathian ka hi natu in Egypt ngam pan ka mite ka pusuapui na taw minam theampo tungah ka vaangletna ka lak ciang a taanghpupite taw ka vawt thuciamna ka thaksua tu hi,” ci hi.

⁴⁶Hi thukhamte le thupiakte theampo sia Israel mite atu in Sinai Mual tungah TOPA ii Moses tungah a piakte ahi hi.