Read Siyin Chin Thiampite 27 Bible Online

Thiampite 27 - Siyin Chin bible

Thiampite 27

¹TOPA in Moses tungah,

²Israel mite atu a nuai a zui tu ngeinate pia hi. A tuam vilvel kiciamna khat taangtutna in TOPA tungah a kipiasa mihing khat sia, a nuai a bangin sumpiakna taw tua pa kisuaktasak thei tu hi.

³Tua sumte Biakinn zak ngei khaikhin taw kitee hi: — pasal khanthin kum kul pan kum sawmluk dong: ngunntang 50 — numei khanthin: ngunntang 30 — pa a khangmoi, kum nga pan kum kul dong: ngunntang 20 — numei a khangmoi: ngunntang 10 — patangno kum nga nuaisia : ngunntang 5 — numeino: ngunntang 3 — Pasal kum sawmluk tungsia: ngunntang 15 — Nupi kum sawmluk tungsia: ngunntang 10

⁸Kamciamna a vawtpa sia zawng leih in a ngeina bangin a pia zo buale ama sia thiampipa kungah kipaipui tu a, thiampipa in a piak zawkza dong khepsak tu hi.

⁹Kamciamna a vawt sia TOPA biakpiakna in a saan thamman nganno khat ahile TOPA tungah a kipia letsong theampo biakna taw kisai in a thiangtho hi a,

¹⁰kamciamna a vawtpa in nganno dang taw laih thei ngawl tu hi. Nganno dang taw a laih le ngannote nii sia TOPA neisa hi tu hi.

¹¹Ahizong kamciamna in a piak tu nganno sia biakna taw kisai in a thiang ngawl hi a, TOPA biakpiakna in saan thei ngawl tu ahile, tua pa in tua nganno sia thiampipa kungah paipui tu hi.

¹²Thiampipa in nganno phatna le siatna taw kizui in a man tan tu a, a tan babangin kip tu hi.

¹³Tua pa in a lei kik nuam le, a man za le tua man tungah zakhat ciang kul veu belapin lei tu hi.

¹⁴Mi khat in a inn TOPA tungah a aap ciang, thiampipa in a phatna le a siatna zui in a man tan tu a, a tan babang kip tu hi.

¹⁵Tua pa in a inn a lei kik nuam le a man za le tua man tungah zakhat ciang kul veu belapin pia tu hi.

¹⁶Mihing khat in a leitang khen khat TOPA tungah a aap le, a thai ciin thei tu za tungtawnin a man kitan tu a, mangtaang kilogramme kul ciang ngunntang sawm in kituat tu hi.

¹⁷Piakkikna Jubilee kum zawk po ciang a leitang a aap le, a man a cingin tan tu hi.

¹⁸Piakkikna Jubilee kum zawk pek ciang a aap le, thiampipa in Jubilee kum kik dong a om lai kumte taw kizui in a man za see tu a, a man khiam tu hi.

¹⁹Mi khat in a aapsa lo a lei kik nuam ahile a lo man za le tua man tungah zakhat ciang kul veu belap thua in pia tu hi.

²⁰TOPA tung pan tuasia lei kik masa ngawlin mi dang khat tungah a zuak le lei kik theina thu sia a bo hi tu hi.

²¹Piakkikna Jubilee kum a cin kik ciang tua lo a tawntungin TOPA neisa suak tu a; thiampite in tang tu hi.

²²Mihing khat in ama leisa lo TOPA tungah a aap le,

²³thiampipa in mai Piakkikna Jubilee kum dong a kum tuatin a man see tu a, a see zaza tua pa in tua ni in pia nanak tu hi; tua sum teng TOPA aa ahi hi.

²⁴Piakkikna Jubilee kum a cin ciang tua lo a neiphitpa tungah ahibuale a suan a paalte tungah ki aap kik tu hi.

²⁵Biakinn zak ngei khaikhin taw kizui in na man theampo a man kitan tu hi.

²⁶Nganhing no suakciil peuma TOPA neisa hi zo ahiciang, kuama in thinzaw biakpiakna in TOPA tungah aap thei ngawl tu hi. Khuino, tuuno, ahibuale kealno khat TOPA neisa hi a,

²⁷ahizong a thiang ngawl nganhing no suakciil ahile, a man a kitan za le tua a man tung zakhat ciang kul veu belapin lei kik thei tu hi. A kilei kik buale tua nganhing sia a man a kitan za taw midang khat pawpo tungah kizuak thei hi.

²⁸TOPA tungah thudang om ngawl tu in a aap thiang sitsetsa, mihing, nganhing, ahibuale leitang khat sia kuama in zuak kik, lei kik thei ngawl tu hi. A tawntungin TOPA neisa ahi hi.

²⁹Mihing ngawngawn tuabang a ki aap thiang sitset sa te tat kik thei tu hi ngawl hi; ama sia kithatlum nanak tu hi.

³⁰Na leitang pan a piang theampo, an le thingngate sawm a khat TOPA ii neisa ahi hi.

³¹Mi khat in tuate a tan kik nuam le, a man za le a man tungah zakhat ciang kul veu belapin tan tu hi.

³²Na khoai sa ngannote sawm a khat TOPA ii neisa ahi hi. Na nganno na sim ciang a sawmna nganno sia veu TOPA ii neisa ahi hi.

³³A neipa in a sim ciang a sawmna nganno sia a tha zawmbel a teal thei natu in vawt kaltang ngawl tu a, a kitealsa khat theak kik thei ngawl tu hi. A theak kik ahile tua nganhingte nii sia TOPA ii neisa hi tu a, kilei kik thei ngawl tu hi.

³⁴Hite Israel mite atu in Sinai Mual tungah TOPA ii Moses tungah a thupiakte ahi hi.