Read Siyin Chin Thiampite 4 Bible Online

Thiampite 4 - Siyin Chin bible

Thiampite 4

¹TOPA in Moses tungah,

²a maw a khial mihing khat in tupkhol ngawlin TOPA thupiakte khat pawpo a paltan ciang, a zui tu a nuai a ngeinate Israel mite tungah a son natu in thupia hi.

³A maw a khial sia Thiampi Lianbelpa hi a, mipite tungah mawna khialna hong then ahile, ama mawna khialna hangin a mealhem ngawl khuital no khat TOPA tungah sangaw biakpiakna in pia tu hi.

⁴Ama in Puanbuk kongbiang ah khuital paipui tu a, a lu tungah a khut nga in TOPA mai ah ngo tu hi.

⁵Tuaciang Thiampi Lianbelpa in khuital chi pawlkhat la in, Puanbuk sungah tumpui tu hi.

⁶Ama in a khutme, chi sungah pap tu a, a thiangtho puankhai mai ah salivei the tu hi.

⁷Tuaciang ama in chi pawlkhat, Puanbuk sung ngimnamtui biaknatau kingte ii a dokna teng noai tu hi, a taanglai chi teng Puanbuk kongbiang ah a om, meihal biakpiakna in a kizangh biaknatau bul ah sung tu hi.

⁸Hi khuital tung pan a thau teng theampo, a sungthaute,

⁹a nauta le a nauta tuam a thaute, le a thinsa phabel la tu hi.

¹⁰Thiampipa in tua a thau teng la tu a, kipawlkhop biakpiakna in a kingo nganhingte tung pan a thaute a hal bangin meihal biakpiak natu in a kizangh biaknatau tungah hal tu hi.

¹¹Ahizong ama in a vun, a tak teng, a lu, a peang teng, a ngil le a ngilzangte a kihel a sungkua teng la tu a,

¹²ngiaphual puasang ah paipui in vut buakna, biakna a zeksa taw kisai a thiangthona munah thingthut in hal tu hi.

¹³Tupkhol ngawlin Israel taangpi bup in TOPA thupiakte khat paltan in a maw a khial in ahile,

¹⁴a maw a khial a kiheak po ciang taangpi taangta in khuital khat taw mawphel biakpiakna nei tu hi. Amate in TOPA ompuina Puanbuk ah paipui tu a,

¹⁵taangpi lampuite in a khui lu tungah a khutte nga in, tualai ah ngo tu uh hi.

¹⁶Thiampi Lianbelpa in khuital chi tawm Puanbuk sungah paipui tu a tua ii sungah

¹⁷a khutme papin puankhai mai ah salivei the tu hi.

¹⁸Ama in Puanbuk sung ngimnamtui biaknatau king, a dokna tengah chi tawm noai tu a, a taanglai teng Puanbuk kongbiang ah a om, meihal biakpiakna in a kizangh biaknatau bul ah sung tu hi.

¹⁹Tua zawkciang ama in a thau teng la in biaknatau tungah hal tu hi.

²⁰Ama in mawphel biakpiakna in a kizangh khuital sia taw a vawt bangma in hi khuital zongh taw a kibangin vawt tu a, mipite ii mawna hu in hi bangin sangaw biakpiakna vawt tu hi, tuaciang amate mawna kimaisak tu hi.

²¹Tua zawkciang ama in tua khuital ngiaphual pua sangah paipui in, ama mawmai natu biakpiakna khuital a hal bangin hal tu hi. Hisia in taangpite mawna maisak natu biakpiakna khat ahi hi.

²²Ngam uk khat in tupkhol ngawlin TOPA thupiakte paltan in mawna a vawt le,

²³a mawna a heak po ciang, a mealhem ngawl kealtal khat taw biakpiakna nei tu hi.

²⁴Ama in kealtal lu tungah a khut nga tu a, meihal biakpiakna in nganhing a kingawna mun biaknatau saksang ah ngo tu hi. Hisia in mawphel biakpiakna khat ahi hi.

²⁵Thiampipa in a chi sungah a khutme pap tu a, biaknatau king a kidokna tengah noai in, a taanglai teng biaknatau bul ah sung tu hi.

²⁶Tua zawkciang ama in kipawlkhop biakpiakna in a kingo nganhing thaute kihal bangma in, biaknatau ah a thau teng hal tu hi. Ngam uk khat ii mawmai natu in hi bangin thiampipa in sangaw biakpiakna nei tu a, ngamukpa mawna kimaisak tu hi.

²⁷Tupkhol ngawlin nautaang mi khat in TOPA thupiakte paltan in, mawna a vawt le,

²⁸a mawna a heak po ciang a mealhem ngawl kealnu khat taw biakpiakna nei tu hi.

²⁹Ama in keallu tungah a khut nga tu a, meihal biakpiak natu nganhing kingawna mun, biaknatau saksang ah ngo tu hi.

³⁰Nganhing chi sungah thiampipa in a khutme pap tu a, biaknatau king a dokna teng noai in, a taanglai teng biaknatau bul ah sung tu hi.

³¹Tua zawkciang ama in kipawlkhop biakpiak natu in a kingo nganthaute laak bangin a thau teng la tu a, TOPA a lungkimsak ngimnam ahi natu in biaknatau tungah hal tu hi. Hi bangin thiampipa in tua pa ii mawmai natu in, sangaw biakpiakna neisak tu a, a mawna kimaisak tu hi.

³²Mihing khat in mawphel biakpiakna in tuu khat hong paipui le, a mealhem ngawl a nu khat hi tu hi.

³³Ama in tuu lu tungah a khut nga tu a, meihal biakpiak natu in ngan kingawna mun biaknatau ii saksang ah ngo tu hi.

³⁴Thiampipa in a chi sungah a khutme pap tu a, biaknatau king ah a om a dokna teng chi noai in, a taanglai teng biaknatau bul ah sung tu hi.

³⁵Tua zawkciang ama in kipawlkhop biakpiak natu in a kingo tuu thau laak bangin a thau teng la tu a, TOPA tungah a kipia an taw biakpiaknate taw biaknatau tungah hal khawm tu hi. Hi bangin thiampipa in tua pa mawmai natu in sangaw biakpiakna nei tu a, ama mawna kimaisak tu hi.