Read Siyin Chin Thiampite 6 Bible Online

Thiampite 6 - Siyin Chin bible

Thiampite 6

¹TOPA in Moses tungah a nuai a ngeinate pia hi.

²Mihing khat tungah Israel a mipui khat in sum koi a, a koina pa in pia kik nuam ngawl ahizong, ama na nguksak ahizong, a theam ahizong,

³a bo vanh khat mu napi leilot a mu bong ci in a kiciam ahile zong, TOPA tungah maw ahikom biakpiakna khat a vawt kul hi.

⁴Hi bang khat pawpo taw mihing khat in a maw a khial ciang thumaan ngawlin a nga vanh pawpo pia kik hamtang tu hi. A khialna a kimu ni in, a neipa tungah a cingin pia kik tu a, zakhat ciang kul taw belap tu hi.

⁶Ama in TOPA tungah ama ii khialphel biakpiak natu in a mealhem ngawl tuutal ahibuale kealtal khat thiampipa kungah paipui tu hi. A man sia khensat ngeina om bang hi tu hi.

⁷Tua pa mawmai natu in, thiampipa in biakpiakna piaksak tu a, ama khialna kimaisak tu hi.

⁸TOPA in Moses tungah,

⁹Aaron le a tapate ii meihal biakpiaknate a piak ciang a nuai a ngeinate a zui tu in thupia hi. Meihal biakpiakna sia zankhuateak biaknatau tungah kinusia tu a, tuaciang tua mei sia kuang tansak tu hi.

¹⁰Tuaciang thiampipa in puanneal ngoaipuan tom le puanneal puantual sil a, biaknatau ah vut teng luakin, biaknatau pangh ah sung tu hi.

¹¹Tuaciang ama in a puan laih tu a, ngiaphual puasang biakna taw kisai a thiangthona munah vutte bua tu hi.

¹²Biaknatau ah mei kuang topsak tu a, mitsak ngeingawl tu hi. Zing simin thiampipa in thing thut thua tu a, meihal biakpiakna vawtin, kipawlkhop biakpiakna sathaute hal tu hi.

¹³Biaknatau ah mei kuang topsak tu a, mitsak ngeingawl tu hi.

¹⁴A nuai a te sia antang biakpiakna ah zui tu ngeinate ahi hi. Aaron suan thiampipa in biaknatau mai TOPA tungah antang biakpiakna pia tu hi.

¹⁵A vekpi in TOPA tungah a kipia a hina thu heaksakna in ama in khutdim khat anvui le sathau, a tungah ngimnamtuite buakin, biaknatau ah hal tu hi. Hi biakpiakna ii ngim in TOPA lungkimsak hi.

¹⁶A taanglai teng thiampite in ne tu hi. Tuate tol kisaw ngawl anluum in ki em tu a, TOPA ompuina Puanbuk suumsung a thiangtho munah kine tu hi. Tua sia an taw biakpiaknate a khensak bangin Topa ii thiampite a piaksa hi. Tua in mawphel biakpiakna le khialphel biakpiaknate bangin thiangtho mama hi.

¹⁸Maisang hun theampo atu in Aaron suan le paal peuma in TOPA tungah a kipia ante amate nga bangin ne tan thei tu uh hi. Midang khat pawpo tua biakpiakna an a thutha sia, a thianthona vaang in ngim ngasak tu hi.

¹⁹TOPA in Moses tungah,

²⁰Aaron suan thiampi khat thupha piak kipsak natu taw kisai ngeinate pia hi. Thupha piak kipsakna a nga ni in TOPA tungah anvui kilogramme khat (ni sim antang biakpiakna za taw a kikim) zingsangin a lang, nitakin a lang pia tu hi.

²¹Tuate sathau taw hel tu a, moh emna taw minsak in, balneen tu a, TOPA tungah antang biakpiakna in pia tu hi, a ngim in Topa lungkimsak hi.

²²Maisang hun theampo ah Aaron suan peuma Thiampi Lianbel a sep ciang hi biakpiakna vawt tu hi. Tua antang sia TOPA tungah sangaw biakpiakna bangin kihal tum tu hi.

²³Thiampipa ii a piak antang biakpiaknate tawm zongh kine thei ngawl hi; tua teng a kihal siat kul tu hi.

²⁴Topa in Moses tungah Aaron le a tapate in

²⁵a nuai a ngeinate mawphel biakpiakna a piak ciang a zui tu in thupia hi. Meihal biakpiak natu in sa a kingawna mun, biaknatau saksang ah mawphel biakpiak natu in nganhing kingo tu hi. Tua in a thiangtho mama biakpiakna ahi hi.

²⁶Sangaw biakpiakna a pia thiampipa in a piak nganhing sate, TOPA ompuina Puanbuk suumsung mun thiangthona ah ne tu hi.

²⁷Mihing khat pawpo ahibuale na khat pawpo in tua nganhing sa a thutha le tuasia ii thianthona vaang in ngim ngasak tu hi. Tua sachi puan khat po tungah a baang tha le tuasia mun thiangtho na ah sawp kul tu hi.

²⁸Sa huanna leibeal khat pawpo sia kisutham tu a, thikbeal a kizangh le nawt thiang in, tui taw silthiang tu hi.

²⁹Thiampi innkuanpui pa pawpo in hi biakpiakna sa ne thei tu hi; tua biakpiakna sia thiangtho mama hi.

³⁰Ahizong Puanbuk sungah sachi kipaipui in, mawmai natu in a zeksa vawtna ah a kizangh le tua sa kine ngawl het tu a; tuasia a kihal kul tu hi.